යුරෝපයේ හැර ලෝකයේ සෑම කලාපයකම පාහේ මෙම වසරේ පළමු මාස තුනේදී අයි ෆෝන් සඳහා ඇති ඉල්ලුම සියයට දහයකට වඩා වැඩි ප්‍රමාණයකින් පහත වැටී ඇතැයි ඇපල් සමාගම ප්‍රකාශ කළේය.
අවුරුද්දකට වඩා වැඩි කාලයකදී සිදු වූ විශාලතම අලෙවිය පහත වැටීම මෙම වසරේ පළමු මාස තුනේදී වාර්තාකර ඇති බවත් සංඛ්‍යා ලේඛනවලට අනුව අයි ෆෝන් අලෙවි කිරීමෙන් ලැබෙන ආදායම මෙම වසරේ පළමු මාස තුනේ දී සියයට හතරකින් පහත වැටී ඇති බවත් ඇපල් සමාගම පැවසුවේය.
අයි ෆෝන් අලෙවිය පහත වැටීම ඇපල් සමාගමේ ප්‍රධානී ටිම් කුක් සාධාරණීකරණය කිරීමට උත්සාහ දරමින් පසුගිය වසරේ පළමු මාස තුනේදී කෝවිඩ් වසංගතය අවසානවීම හේතුවෙන් අයි ෆෝන් සඳහා විශාල ඉල්ලුමක් තිබී ඇති බවත් වෙළඳපොළ සාමාන්‍ය තත්ත්වයට හැරීමෙන් පසුව මෙම වසරේ පළමු මාස තුනේදී සාමාන්‍ය පරිදි දුරකථන අලෙවි වී ඇති බවත් ප්‍රකාශ කර ඇතැයි විදෙස් මාධ්‍ය වාර්තා කළේය.වසර දෙක සංසන්දනය කරන විට මෙම වසරේ පළමු මාස තුනේදී අයි ෆෝන් අලෙවිය පහත වැටී ඇති බවට දත්ත වාර්තා පෙන්නුම් කරන බවද ටිම් කුක් ප්‍රකාශ කර ඇතැයි විදෙස් මාධ්‍ය සඳහන් කළේය.
