(චාපා මධුභාෂිණී)
මෙවර ගණිත අංශයෙන් අ.පො.ස උසස් පෙළ විභාගයට පෙනී සිටීමට නියමිත මැදිරිගිරිය ජාතික පාසලේ සිසුවෙකුගේ සියලු පොත්පත් ආදිය ගිනිතබා විනාශ කළ බව කියන පුද්ගලයෙකු ප්‍රදේශයෙන් පලාගොස් ඇතැයි මැදිරිගිරිය පොලිසිය කියයි.
මෙම සිද්ධියෙන් පොත්පත් සියල්ල අහිමි වූයේ ගණිත අංශය මෙවර අපොස උසස් පෙළවිභාගයට පෙනී සිටීමට සිටින එච්.එම්.ජි ධනුෂ බණ්ඩාර නම් සිසුවාගේය.
දැනට ප්‍රදේශයෙන් පලාගොස් ඇති බව කියන පුද්ගලයා මෙම දරුවාගේ නිවස ඉදිරිපිට නිවසේ වාසය කරන අධික ලෙස මත්ද්‍රව්‍යන්ට ඇබ්බැහිවූ පුද්ගලයෙකු බව පොලිසිය කියයි.
මෙම පුද්ගලයා පසුගිය දා පොරොවක්, ගල් කඩන උපකරණයක් සහ තියුණු ආයුධයක් අතැතිව මෙම නිවසට පැමිණ නිවසේ දොරට ආයුධවලින් පහරදී දොරගුලු කඩා ඇතුළු වී නිවසේ විදුලි උපකරණ සහ ගෘහ භාණ්ඩ රැසකට හානි සිදුකොට මෙම දරුවාගේ වසර දෙකකම සියලු සටහන් සහිත පොත් ගිණිතබා ගොස් ඇත.
දැනට මෙම නිවැසියන් අලුතින් ඊට යාබදව ඉදි කරනු ලබන නිවසේ වැඩ කරමින් සිටි මේසන් බාස්වරයෙකුටද මොහු විසින් තියුණු ආයුධයකින් පහරදී තුවාල සිදුකොට ඇත.
මෙලෙස ඔහුට තුවාල සිදු කරන අවස්ථාවේ ඔහුගේ සහයට සිටි අනෙක් පුද්ගලයා විසින් මට්ටම් ලීයකින් මොහුගේ හිසට පහරදී ඇති අතර පසුව මොහු තුවාල සහිතවම මැදිරිගිරිය පොලිසියට භාර වීඇත.
සැකකරු ආයුධ සහිතව නිවසට ඇතුළුවන අවස්ථාවේ මෙම දරුවාගේ මව සහ බාල සොහොයුරා සිට ඇති අතර ඔවුන් නිවසින් දිවගොස් දිවි ගලවාගෙන ඇත.
දැනට ප්‍රදේශයෙන් පළා ගොස් ඇති බව කියන සැකකරු සොයාමැදිරිගිරිය පොලිසිය මේ වන විට විමර්ශන ආරම්භ කොට ඇත.
