(නිමල කොඩිතුවක්කු)
ඉදිරි මහ මැතිවරණය වෙනුවෙන් පුළුල් සන්ධානයක් ගොඩනැගීම සඳහා එක්සත් ජාතික පක්ෂය සමඟ සිදුකරනු ලැබූ සාකච්ඡා සාර්ථක නැතැයි සමගි ජන බලවේගය මහලේකම් රංජිත් මද්දුමබණ්ඩාර මහතා පැවසීය.
රනිල් වික්‍රමසිංහ මහතා ඉවත්ව පක්ෂයේ සෙසු කණ්ඩායම් සමග මහමැතිවරණය සම්බන්ධයෙන් සාකච්ඡා සිදුකළ හැකි බවට දැනුම් දී ඇතත් එක්සත් ජාතික පක්ෂයෙන් එයට යහපත් ප්‍රතිචාර ලැබී නැතැයිද මහලේකම්වරයා සඳහන් කළේය.
එමෙන්ම දූෂණ චෝදනා ලැබූ පිරිසක් එහි සිටින බැවින් ඔවුන් සමඟ සන්ධාන ගතවීම ගැටලුවක් වී ඇතැයි ද ඔහු කීවේය.
මේ හේතුවෙන් කොන්දේසි සපුරන කරන තෙක් එක්සත් ජාතික පක්ෂය සමඟ සිදු කරන සාකච්ඡා තාවකාලිකව අවසන් කිරීමට තීරණය කර ඇති බවත් ඔහු තවදුරටත් කීවේය.
සමගි ජන සන්ධානයේ ප්‍රතිපත්ති පිළිගත හැකි සියලු දෙනාට ඉදිරි මැතිවරණ වෙනුවෙන් දොරටු විවෘත කර ඇති බවත් මහලේකම්වරයා සඳහන් කළේය.
විපක්ෂ නායක සජිත් ප්‍රේමදාස මහතාගේ ප්‍රධානත්වයෙන් සමගි ජන සන්ධානය ඉදිරි මහ මැතිවරණය ජයගැනීමට අවශ්‍ය වැඩපිළිවෙල සකස් කරන බවත් ඔහු පැවසීය.
