(දසුන් රාජපක්ෂ)
අපරාධ පරීක්ෂණ දෙපාර්තමේන්තුව වෙත අද පෙරවරුවේ බාර වීමෙන් අනතුරුව අධිකරණය හමුවට ඉදිරිපත් කළ ශ්‍රී ලංකන් ගුවන් සමාගමේ හිටපු ප්‍රධාන විධායක නිලධාරී ලෙස කටයුතු කළ කපිල චන්ද්‍රසේන සහ ඔහුගේ බිරිඳ ප්‍රියංකා විජේනායක මහත්මිය ලබන 19වැනි දා තෙක් රිමාන්ඩ් භාරයේ තැබීමට කොළඹ කොටුව මහේස්ත්‍රාත් රංග දිසානායක මහතා අද (6) නියෝග කළේ ය.
ශ්‍රී ලංකන් ගුවන් සමාගමට පළල් බඳ සහිත නව ගුවන් යානා ඇනියක් ප්‍රතිස්ථාපනය කිරීමේ දී ඇමෙරිකානු ඩොලර් මිලියන දෙකකට ආසන්න මුදලක් අයථා ලෙස පරිහරණය කිරීම හෝ අල්ලසක් ලෙස ලබාගෙන මුදල් විශුද්ධිකරණ පනත යටතේ වරදක් සිදු සිදු කළ බවට චෝදනා කරමින් රාජ්‍ය ව්‍යවසාය සංවර්ධන අමාත්‍යාංශයේ හිටපු ලේකම් රවින්ද්‍ර හේවාපතිරණ මහතා විසින් කරන ලද පැමිණිල්ලකට අනුව අපරාධ පරීක්ෂණ දෙපාර්තමේන්තුවේ මූල්‍ය විමර්ශන අංශය මෙම යුවල අත්අඩංගුවට ගැනීම සඳහා අධිකරණයෙන් විවෘත වරෙන්තුවක් ලබා ගෙන තිබුණේය.
ඒ අනුව සැකකාර යුවළ අද අධිකරණය හමුවට ඉදිරිපත් කරමින් අපරාධ පරීක්ෂණ දෙපාර්තමේන්තුවේ මූල්‍ය විමර්ශන අංශය සිදුකරන ලද පරීක්ෂණවල ප්‍රගතිය අධිකරණයට දැනුම් දුන්නේය.
පැමිණිල්ල වෙනුවෙන් නීතිපති දෙපාර්තමේන්තුව නියෝජනය කරමින් කරුණු දැක්වූ ජේෂ්ඨ නියෝජ්‍ය සොලිසිටර් ජනරල් තුසිත් මුදලිගේ මහතා දෙවැනි සැකකාරියගේ ගිණුමකින් මුදල් බැර කළ ගිණුමක් හිමි පුද්ගලයෙකු මෙරට තුළ සිටින බව ද ඔහු සහ ඔහුගේ ගිණුම් සම්බන්ධයෙන් ඉතා රහසිගත මට්ටමෙන් විමර්ශන කටයුතු සිදු කරන බැවින් ඒවාට බාධා නොවීමට සැක යුවළ රිමාන්ඩ් භාරයේ තබන ලෙස ඉල්ලා සිටියේය.
සැක යුවල වෙනුවෙන් ජනාධිපති නීතිඥ අනූජ ප්‍රේමරත්න මහතා සමග පෙනී සිටි ජනාධිපති නීතිඥ නලීන් ලද්දුහෙට්ටි මහතා කරුණු දක්වමින් 2013 වසරේදී ආරම්භ කළ මේ විමර්ශනයට සිය සේවාදායකයන් හැකි සෑම අවස්ථාවක දී ම උපරිම අයුරින් සහයෝගය දක්වා ඇති බව සඳහන් කළේය .
ඉදිරි විමර්ශන කටයුතු වලට ද එ ලෙසින් සහය දක්වන නිසා ඔවුන් දෙදෙනා සුදුසු ඇපයක් මත මුදා හරින ලෙස ජනාධිපති නීතිඥ නලීන් ලද්දුවහෙට්ටි මහතා වැඩිදුරටත් ඉල්ලා සිටියේය.
ඉදිරිපත් වූ කරුණු සලකා බැලූ මහෙස්ත්‍රාත්වරයා ඇප ඉල්ලීම ප්‍රතික්ෂේප කරමින් සැක යුවළ ලබන 19 වැනිදා තෙක් රිමාන්ඩ් භාරයේ තැබීමට නියෝග කළේය.
(ඡායාරූප - ඉෂාන් සංජීව)
