(අංජුල මහික වීරරත්න)

කවුරු තරහ වුනත් කවුරු දාලා ගියත් විදුලි ඒකකයක් රුපියල් 25ට මිලදී ගන්නේ නැතැයි ජනාධිපති අනුර කුමාර දිසානායක මහතා බුත්තල ජන රැළියේදී පැවසීය.

මන්නාරමේ හදන සුළං විදුලි බලාගාරයකින් විදුලි ඒකකයක් ඩොලර් ශත 8.26ට හෙවත්  රුපියල් 25කට මිලදී ගැනීමට රනිල්ගේ ආණ්ඩුව එකඟ වී සිටි බව කී ජනාධිපතිවරයා ජාතික ජන බලවේග රජය පැමිණ විදුලි ඒකකයක් ඩොලර් සත 4.58ට හෙවත් රුපියල් 13 කට මිලදී ගන්නා ගිවිසුම අත්සන් කළ බව සඳහන් කළේය.

ජනාධිපතිවරයා මේ බව සඳහන් කළේ 'ජය නියතයි - ගම අපිටයි' පළාත් පාලන මැතිවරණ  රැලි මාලාවේ  මොනරාගල දිස්ත්‍රික් ජන රැලිය අමතමිනි. මෙම ජනරැළිය බුත්තල නගරයේදී  පැවැත්විණි.

"රුපියල් දහතුනට විදුලිය ගන්න පුළුවන්කම තියෙද්දි විසිපහට ගන්න ඕනද?ඒක නතර කරන එක බරපතල අපරාධයක් කියා හිටපු ජනාධිපතිතුමා පවසා තිබුණා.ඒක කරන එක තමයි අපරාධය.අපි කියන්නේ 13 ට ගන්න පුළුවන්කම තියෙද්දි 25ට ගන්නේ නෑ.ඉස්සර මොකද කරන්නේ. 13 ට හදන්න පුළුවන්කම තියෙද්දි 25ට ගන්නවා.ඉතුරු දොළහ ඒගොල්ලෝ අතර බෙදෙනවා.

අපි හැම ව්‍යාපෘතියක් ගැනම කල්පනා කරන්නේ රට සහ ජනතාව පැත්තෙන්.මෙතෙක් හිටපු ආණ්ඩු ව්‍යාපෘති ගැන කල්පනා කළේ තමන්ට කීයක් ලැබෙනවද කියලයි" යනුවෙන්ද ජනාධිපතිවරයා පැවසීය.