(රෝෂන් තුෂාර)
රුපියල් කෝටි දාහකට අධික මුදල් වංචා කළේ යැයි කියන කුරුණෑගල "ජෙනිසීස් බිස්නස් ස්කූල්"නැමැති පිරමීඩාකාර නීති විරෝධී මුල්‍ය ආයතනයේ අධ්‍යක්ෂවරයා සහ ඔහුගේ බිරිඳ දෙසැම්බර් 05 දින දක්වා යළි රක්ෂිත බන්ධනාගාර ගත කිරීමට කොළඹ ප්‍රධාන මහේස්ත්‍රාත් තිළිණ ගමගේ මහතා අද (21) නියෝග කළේය.
සැකකාර අධ්‍යක්ෂකවරුන්ගේ නමින් මෙරට ප්‍රධාන බැංකු තුනක පවත්වාගෙන යන බැංකු ගිණුම් දොළහක විස්තර වාර්තා කැඳවීමටද නියෝග කළේය.
ටිමෝරයේ සිට මෙරටට පැමිණීමේදී පසුගිය 08 දින කටුනායක ගුවන්තොටුපළේදී අත්අඩංගුවට ගෙන අධිකරණයට ඉදිරිපත් කිරීමෙන් පසුව රක්ෂිත බන්ධනාගාර ගත කළ ධම්මික රණසිංහ සහ ඔහු බැලීමට කටුනායක ගුවන් තුළට පැමිණි එම සමාගමේ අධ්‍යක්ෂවරියක යැයි කියන සමුද්‍රා සුරංගි නැමති සැකකරුවන් මෙසේ රක්ෂිත බන්ධනාගාර ගත කළේය.
සැකකරුවන් අධිකරණයට ඉදිරිපත් කළ අපරාධ පරීක්ෂණ දෙපාර්තමේන්තුවේ මුල්‍ය අපරාධ විමර්ශන කොට්ඨාසයේ පොලිස් සැරයෙන් සෙනෙවිරත්න මහතා කියා සිටියේ එරා මිරකල් නමැති සමාගමක් පවත්වාගෙන ගිය සැකකාර අධ්‍යක්ෂකවරුන් ජෙනිසීස් පිරමීඩාකාර මූල්‍ය ව්‍යාපාරය පවත්වාගෙන ගොස් ඇති බවත්, එමගින් එක් රැස්කළ මුදල් ගිණුම් 36000ක් හරහා වංචා කර ඇති බවට විමර්ශන මගින් තොරතුරු අනාවරණය වන බවත්ය.
