(චමින්ද වැවතැන්න)
කෑගල්ල බුළුරුප්ප කෙම්පිටිය වලව්වේ හිමිකරු නිදි ඇදේ දී අත් ගැට ගසා ඇද සිටි සරම ගලවා ගෙල සිරකර ඝාතනය කොට තිබියදී ඊයේ 28 වැනිදා පෙරවරුවේ සොයා ගත් බව කෑගල්ල පොලිසිය පැවසීය.
මෙලෙස ඝාතනයට ලක්ව ඇත්තේ කෑගල්ල හෙට්ටිමුල්ල බුළුරුප්ප කෙම්පිටිය වලව්වේ පදිංචිව සිටි ක්‍රිෂාන්ත පුලස්ති මාරපන නැමැති 75 හැවිරිදි දෙදරු පියෙකි.
ඝාතනයට ලක්ව ඇති දෙදරු පියා එකොළොස් දෙනෙකුගෙන් යුත් පවුලක වැඩිමහල් සහොදරයා බවත් ඔහුගේ එකම පිරිමි දරුවා ඔස්ට්‍රේලියාවේ පදිංචිව සිටින බවත් එකම දියණිය කලකට ඉහතදී මිය ගොස් ඇති බවත් පොලිසිය පැවසීය.
ඝාතනයට ලක්ව ඇති දෙදරු පියා කෑගල්ල හෙට්ටිමුල්ල බණ්ඩාරනායක විද්‍යාලය කෑගල්ල ශාන්ත ජෝශප් බාලිකා විද්‍යාලයේ ගණිත ගුරුවරයෙකු ලෙස සේවයට කොට විශ්‍රාම ලබා ඇති බවත් ශ්‍රී ලංකා පොදුජන පෙරමුණ නියෝජනය කරමින් කෑගල්ල ප්‍රාදේශීය සභා මන්ත්‍රීවරයෙකු ලෙස වැටුපක් නොගෙන සේවය කර ඇති බවත් පොලිසිය පැවසීය.
