(යොහාන් භාසුර)
ශ්‍රී ලංකා කොමියුනිස්ට් පක්‍ෂය ඉදිරි ජනාධිපතිවරණයේදී ‘සර්වජන බලය’ සන්ධානයෙන් තරග කරන දිලිත් ජයවීර මහතාට සම්පූර්ණ සහයෝගය දෙන බවත් ජයවීර මහතා කොමියුනිස්ට් පක්‍ෂයේ ලකුණ වන ‘තරුව’ ලකුණෙන් ජනාධිපතිවරණයට ඉදිරිපත් වන බවත් ශ්‍රී ලංකා කොමියුනිස්ට් පක්‍ෂයේ ලේකම් වෛද්‍ය ජී. වීරසිංහ මහතා අද (21) පැවසීය.
වෛද්‍ය ජී. වීරසිංහ මහතා බොරැල්ලේ පිහිටි ශ්‍රී ලංකා කොමියුනිස්ට් පක්‍ෂ මූලස්ථානයේදී විශේෂ මාධ්‍ය හමුවක් පවත්වමින් එසේ පැවසීය.
එම පක්‍ෂයේ අදහස් සමඟ කිට්ටුවෙන් යන පක්‍ෂ රැසක් එකතුව සිටින ‘සර්වජන බලය’ සන්ධානයට එකතු වූ බවත් ජනාධිපතිවරණයේදී තරග කිරීමට එම පක්‍ෂයේ ලකුණ වන ‘තරුව’ ලකුණ ජයවීර මහතා ඉල්ලා සිටි බවත් වීරසිංහ මහතා කීය.
‘සර්වජන බලය’ සන්ධානයේ සෙසු පක්‍ෂ වර්තමානයේ ශ්‍රී ලංකාව මුහුණදී සිටින ආර්බුය විග්‍රහ කරන ආකාරය පිළිබඳව එකඟතාවක් ඇති බවත් මෙම අර්බුදයට හේතුව නව ලිබරල්වාදී ආර්ථික උපායමාර්ග යැයි එම පක්‍ෂ පිළිගන්නා බවත් වීරසිංහ මහතා සඳහන් කළේය.
රට නිෂ්පාදන ආර්ථිකයට යෑම, ආර්ථිකය තුළ රාජ්‍ය, සමුපකාර සහ පෞද්ගලික යන අංශය තිබිය යුතු යැයි එම පක්‍ෂ පිළිගන්නා බව කී වීරසිංහ මහතා පැවසුවේ එම පක්‍ෂ අතර දේශපාලන ප්‍රතිසංස්කරණ සඳහා එකඟතාවක් ඇති බවත්ය.
