(සුජිත් හේවාජුලිගේ)
ඡන්ද පත්‍රිකාව පරණ විදිහටම මුද්‍රණය කිරීමට උත්සාහ දරන බව රජයේ මුද්‍රණාලාධිපතිනි ගංගානි කල්පනා ලියනගේ මහත්මිය ලංකාදීපයට පැවසුවාය.
කෙසේ වෙතත් මැතිවරණ කොමිෂන් සභාව සමඟ සාකච්ඡා කර අවසාන තීරණයක් ගන්නා බවද ඇය සඳහන් කළාය.
ජනාධිපතිවරණය සඳහා අපේක්ෂකයෝ 40 දෙනෙක් මෙවර ඉදිරිපත් වෙති. මේ හේතුවෙන් ඡන්ද පත්‍රිකාව තරමක් දිග එකක් වනු ඇතැයි රජයේ මුද්‍රණ දෙපාර්තමේන්තුව පවසයි.
මේ අතර මැතිවරණයට අදාළ ලියකියවිලි රැසක් මේ දිනවල මුද්‍රණය කරගෙන යන බව ලියනගේ මහත්මිය සඳහන් කළාය.
නාම යෝජනා භාර ගැනීමෙන් අනතුරුව ඉතා ඉක්මනින්ම ඡන්ද පත්‍රිකා මුද්‍රණය ආරම්භ කරන බව ඇය වැඩිදුරටත් කීවාය.
මැතිවරණයට අදාල දෑ මුද්‍රණය කරන හෙයින් රජයේ මුද්‍රණාලයේ ආරක්ෂක විධිවිධාන දෙගුණයකින් වැඩි කර ඇත.
මුද්‍රණාලයේ ආරක්ෂාව සඳහා එහි වෙනම පොලිස් මුර පොළක්ද පෙරේදා(13) පිහිටවනු ලැබීය.
හදිසි මුද්‍රණ කටයුතු හේතුවෙන් මුද්‍රණ සේවයකයන්ගේ නිවාඩුද සීමා කරනු ලැබ ඇත.
