(එස්.ඩී.කොඩිකාර)
සිය දරුවන් දෙදෙනා පෙර පාසලට සහ උපකාරක පන්තියට තම ත්‍රී රෝද රථයෙන් රැගෙන යමින් සිටි පියෙකු දෙනියාය කිරිවැල් දොළ මාර්ගයේ බෑවුම් සහිත වංගුවකදී ත්‍රීරෝද රථය ඔහුගේ පාලනයෙන් මිදී අඩි 130 ක් පමණ ප්‍රපාතයට වැටී පියා බරපතල තුවාල දෙණියාය මූලික රෝහලට ඇතුළත් කිරීමෙන් පසු අද (02) මියගොස් ඇතැයි දෙණියාය පොලිසිය කියයි.
මෙසේ මියගොස් ඇත්තේ නාවින්නහේන ,බටයාය ලිපිනයේ පදිංචි සමන්ත පුෂ්පකුමාර අබේතුංග නැමති (45) හැවිරිදි දෙදරු පියෙකු බව මූලික පරීක්ෂණ වලින් හෙළි වී ඇත.
මියගිය පුද්ගලයා සිය දරුවන් දෙදෙනා සමග තම නිවස පිහිටි නාවින්න හේන ප්‍රදේශයේ සිට දෙනියාය නගරය කරා ගමන් කරමින් සිටින අතරතුර මෙම අවාසනාවන්ත සිද්ධියට මුහුණ පා ඇත.
අනතුරින් පස් හැවිරිදි පුතා විසි වී ගොස් සුළු තුවාල ලබා ඇති අතර (18) හැවිරිදි දියණියද තුවාල ලබා ප්‍රතිකාර සඳහා දෙනියාය මූලික රෝහලට ඇතුළත් කර ඇති බව රථවාහන අංශය සඳහන් කරයි.
