(රන්ජන් කටුගම්පොල)
දේශබන්දු තෙන්නකෝන් මහතා පොලිස්පති ධූරයට පත් කිරීමට එරෙහිව ගොනුකර ඇති මූලික අයිතිවාසිකම් පෙත්සම් ලබන වර්ෂයේ මාර්තු 24 සහ 25 වැනි දිනයන්හි විභාගයට ගැනීමට ශ්‍රේෂ්ඨාධිකරණය දින නියම කළේය.
මේ අතර මෙම පෙත්සම් පූර්ණ විනිසුරු මඩුල්ලක් හමුවේ සලකා බලන ලෙස ඉල්ලා පොලිස්පති දේශබන්දු තෙන්නකෝන් මහතා ගොනුකොට ඇති මොෂම සහ ඊට එරෙහිව පෙත්සමකාර පාර්ශවයකින් ගොනුකොට මෝසම්ද අගවිනිසුරු ජයන්ත ජයසූරිය මහතා වෙත යොමු කරන ලෙසද ශ්‍රේෂ්ඨාධිකරණය නියෝග කළේය.
තවද නීතිපතිවරයා වෙනුවෙන් පෙනී සිටි අතිරේක සොලිසිටර් ජෙනරාල් පුල්ලේ මහතා වත්මන් ජනාධිපති වෙනුවෙන් විරෝධතා ගොනු කිරීමට අවසර ලබාදෙන ලෙස කරන ලද ඉල්ලීමටද ශ්‍රේෂ්ඨාධිකරණයෙන් අවසර ලැබිණ.
ශ්‍රේෂ්ඨාධිකරණය මෙසේ නියෝග කරනු ලැබුවේ මේ සම්බන්ධයෙන් ගොනුකොට තිබූ පෙත්සම් ශ්‍රේෂ්ඨාධිකරණය හමුවේ සලකා බැලුව අවස්ථාවේදීය.
ශ්‍රේෂ්ඨාධිකරණ විනිසුරුවරුන් වන යසන්ත කෝදාගොඩ අර්ජුන ඔබේසේකර සහ අචල වෙන්ගප්පුලි යන මහත්වරුන්ගෙන් සමන්විත ශ්‍රේෂ්ඨාධිකරණ විනිසුරු මඩුල්ලක් හමුවේ සළකා බැලිණි.
