(ඩයනා උදයංගනී)
මෙවර ජාතික නිදහස් දින සැමරුම් උළෙලට කතෝලික සභාව නියෝජනය කරන කිසිවකු සහභාගී වන්නේ නැතැයි කතෝලික සභාවේ මාධ්‍ය ප්‍රකාශක, සිරිල් ගාමිණී ප්‍රනාන්දු පියතුමා පැවසීය.
රටේ ආර්ථිකය හා නීතියේ ආධිපත්‍යය බිඳ වැටී ඇති මොහොතක සැමරීමට ඇති අභිමානවත් නිදහස කුමක්දැයි කතෝලික සභාව ප්‍රශ්න කරන බව ද පියතුමා සඳහන් කළේය.
රට ආර්ථික වශයෙන් බංකොලොත් වී ඇති, අර්බුදකාරී අවස්ථාවක අධික මුදලක් වැයකොට පුහු නිදහස් උත්සවයක් පැවැත්වීම ජනතාවට එරෙහිව කරන මහා අපරාධයක් හා නාස්තියක් බව ද සිරිල් ගාමිණී පියතුමා කීවේය.
සිරිල් ගාමිණී පියතුමා මේ බව පැවසුවේ බොරැල්ල, අගරදගුරු නිල නිවසේ දී අද (1) පැවති මාධ්‍ය හමුවක් අමතමිනි.
ජනාධිපතිවරයා පවසන පරිදි 75 වන නිදහස් උත්සවය අභිමානවත් හා උත්කර්ෂවත් ලෙස පැවැත්වීමට මේ සා මුදල් කන්දරාවක් වැය කිරීම සම්බන්ධයෙන් කතෝලික සභාව දැඩි ලෙස විරුද්ධ බවද පියතුමා කීවේය.
නිදහසේ 75 වන සංවත්සරයේදී සිදුවිය යුතුව තිබුණේ පසුගිය 75 වසර පුරාවට දේශය බංකොලොත්භාවයට ඇද දැමූ රට පාලනය කළ සියලු දේශපාලන පක්‍ෂ වැරදි පිළිගෙන ජනතාවගෙන් ප්‍රසිද්ධියේ සමාව ඉල්ලා, රටේ සම්පත් මංකොල්ල කෑ සියල්ලන් තරාතිරම් නොබලා නීතිය ඉදිරිපත් කර ජනතා මුදල් ආපසු අයකරගැනීමත්, බදු මුදල් නොගෙවා ඇති දූෂිත ව්‍යාපාරිකයන්ගෙන් එම බදු මුදල් අයකරගැනීමත් බව පියතුමා සඳහන් කළේය.
