(මනෝප්‍රිය ගුණසේකර)
නොසැළකිලිමත් අන්දමින් රිය පදවා මහබාගේ ප්‍රදේශයේ පදික මාරූවකින් පාර මාරූ වෙමින් සිටි පදිකයකු හප්පා බරපතල තුවාල කරන ලදැයි කියන සිද්ධියකට අදාළව සැකපිට අත්අඩංගුවට ගෙන අධිකරණයට ඉදිරිපත් කළ ජනාධිපති පොලිස් ආරක්ෂක අංශයේ පොලිස් රියදුරකු ලබන 28 වැනිදා තෙක් රිමාන්ඩ් බාරයට පත් කළ වැලිසර මහෙස්ත්‍රාත් තුසිත ධම්මික උඩුවවිදාන මහතා ඔහුගේ රියදුරු බලපත්‍රය නැවත දැනුම් දෙනතුරු අත්හිටුවීමටද නියම කළේය”
මෙම රිය අනතුර දුටුවන්ගෙන් ප්‍රකාශ සටහන් කරගනිමින් සහ සී.සී.ටී.වී. දර්ශන පරීක්‍ෂා කර බලමින් සිද්ධිය පිළිබඳ විමර්ශනය කරන බව සඳහන් කරමින් මහබාගේ පොලිසියේ සැරයන් කුලරත්න මහතා කළ ඉල්ලීමක් පිළිගත් මහෙස්ත්‍රාතවරයා එලෙස නියම කළේය.
සිද්ධියට අදාළව සැකපිට අත්අඩංගුවට ගෙන අධිකරණයට ඉදිරිපත් කිරීමෙන් අනතුරුව මෙලෙස රිමාන්ඩ් බාරයට පත් කරන ලද්දේ ජනාධිපති පොලිස් ආරක්ෂක අංශයේ පොලිස් රියදුරු (100949) වන බෙලිඅත්ත ඉහළ බෙලිගල්ලේ පදිංචි සජිත් කුමාර විතානගේ නමැත්තාය.
සිද්ධියට අදාළව කළ විමර්ශන වල ප්‍රගතිය දැනුම් දුන් මහබාගේ පොලිසියේ සැරයන් කුලරත්න මහතා පසුගිය 24 වැනිදා රාත්‍රී 10.30ත් 11.00ත් අතර කාලයේ මහබාගේ හන්දියේ ඇති පදික මාරූවෙන් 65 හැවරිදි වයෝවෘද්ධ පුද්ගලයකු පාර මාරූ වෙමින් සිට ඇති බවත් ඒ අවස්ථාවෙදී සැකකරු ඩබ්ලිව්.පී. පී.එෆ්. 7310 දරණ කැබ් රථය නොසැළකිලිමත් ලෙස පදවමින් පදික මාරූවෙන් පාර මාරූ වෙමින් සිටි පුද්ගලයා හප්පා ඇතැයි දැනුම් දුන්නේය.
මෙම අනතුරින් බරපතල තුවාල ලැබු පදිකයා වහාම රෝහල් ගත කර ඇති නමුත් මේ වන විට ඔහු කොළඹ ජාතික රෝහලේ දැඩි සත්තාර ඒකකයේ ප්‍රතිකාර ලබන්නේ යැයි කී සැරයන් කුලරත්න මහතා මෙම රිය අනතුර දුටුවන්ගෙන් ප්‍රකාශ සටහන් කරගනිමින් සහ සී.සී.ටී.වී. දර්ශන පරීක්‍ෂා කර බලමින් සිද්ධිය පිළිබඳ විමර්ශනය කරන්නේ යැයිද කීය.
තුවාලකරු කොළඹ ජාතික රෝහලේ දැඩි සත්තාර ඒකකයේ ප්‍රතිකාර ලබන හෙයින් ඔහුගෙන් සිද්ධියට අදාළව ප්‍රකාශයක් ගැනීමට තවමත් නොහැකි වී අතැයිද සැරයන් කුලරත්න මහතා වැඩිදුරටත් කීය.
