(අංජුල මහික වීරරත්න)
පොල් වගා කිරීමේ මණ්ඩලය ජංගම අලෙවි රථ මඟින් අඩු මුදලකට පොල් විකිණීමේ වැඩසටහනක් අද (23) සිට ක්‍රියාත්මක කළේය.
පොල් මිල වැඩි වීම හමුවේ පාරිභෝගික ජනතාව මුහුණ දී තිබෙන දුෂ්කරතාවයට විසඳුමක් ලෙස මෙම වැඩසටහන ක්‍රියාත්මක කරන බව පොල් වගා කිරීමේ මණ්ඩලය පවසයි.
එහි පළමු අදියර කොළඹ, ශ්‍රී ජයවර්ධන පුර කෝට්ටේ, කඩුවෙල නගර සභා බල සීමා ප්‍රදේශ වල ක්‍රියාත්මක කරන බවද පොල් වගා කිරීමේ මණ්ඩලය කියයි.
කොළඹ බල ප්‍රදේශයේ වැලිකඩ පොලීසිය අසල, කිරුළපන පොදු වෙළද පොළ සහ මුදල් අමාත්‍යාංශ පරිශ්‍රය ආසන්නවත් ජංගම ලොරි රථ මගින් බෙදා හැරීම් සිදු වන බවත් ශ්‍රී ජයවර්ධන පුර කෝටටේ නගර සභා සීමාවට අයත් වැලිකඩ පොලිසිය ආසන්නව සහ නුගේගොඩ ආනන්ද සමරකෝන් එලිමහන් රංග පීඨය අසල ද පොල් බෙදා හැරීමේ ජංගම වැඩසටහන ක්‍රියාත්මක වන බවත් මණ්ඩලය කියයි.
කඩුවෙල සහ බත්තරමුල්ල බල ප්‍රදේශයන් ආවරණය කරමින් සෙත්සිරිපාය රජයේ කාර්යාල පරිශ්‍රය ආසන්නව සහ ඩෙන්සිල් කොබ්බෑකඩුව පොල් වගා කිරීමේ මණ්ඩලය පිහිටි ස්ථානය ආසන්නව පාරිභෝගිකයින්ට පොල් මිලදී ගැනීමට පහසුකම් සපයා තිබෙන බව පොල් වගා කිරීමේ මණ්ඩලය පවසයි.
පසුව සියලු දිස්ත්‍රික්ක ආවරණය වන පරිදි මෙම වැඩසටහන ක්‍රියාත්මක වීමට නියමිතය.
රුපියල් 100-120 අතර මිලකට මෙහිදී පොල් විකිණීම සිදුකරන බව බවද පොල් වගා කිරීමේ මණ්ඩලය වැඩිදුරටත් කියයි.
(ඡායාරූප ශාන්ත රත්නායක)
