(රෝෂන් තුෂාර)
අයිස් මත්ද්‍රව්‍ය සමඟ අත්අඩංගුවට පත්ව මාසයකට අධික කාලයක් රක්ෂිත බන්ධනාගාර ගතව සිටි මත්ද්‍රව්‍ය සැකකරුවෙකු නිදහස් කිරීමට කොළඹ අතිරේක මහේස්ත්‍රා පසන් අමරසේන මහතා නියෝග කළේය.
සැකකරුට එරෙහිව සිදු කරන විමර්ශනයට අදාළ පැමිණිල්ල කැඳවූ අවස්ථාවේදීී පොලිසිය අධිකරණයේ පෙනී නොසිටීම ඇතුළු කරුණු සලකා බැලූ මහේස්ත්‍රාත්වරයා සැකකරු නිදහස් කිරීමට නියෝග කළේය.
අයිස් ග්‍රෑම් 10කට අධික ප්‍රමාණයක් සන්තකයේ තබා ගැනීම හා ජාවාරම් කිරීම යන සැකයට සැකකරු පසුගිය නොවැම්බර් 24 වෙනි දින අත්අඩංගුවට ගෙන අධිකරණයට ඉදිරිපත් කිරීමෙන් පසුව රක්ෂිත බන්ධනාගාර ගත කර ඇත.
අත්අඩංගුවට පත්වීමෙන් පසුව රැඳවුම් භාරයේද සිට ඇති අංගොඩ ප්‍රදේශයේ පදිංචි සැකකරු බන්ධනාගාර නිලධාරීන් මගින් අධිකරණයට ඉදිරිපත් කළේය.
පැමිණිල්ල වෙනුවෙන් කිසිදු පොලිස් නිලධාරියකු අධිකරණයෙ පෙනී සිටීනු දක්නට නොලැබිණ.
එම අවස්ථාවේදී විමර්ශන ගොනුව සලකා බැලූ මහේස්ත්‍රාත්වරයා අදාළ ගොනුවට සාක්ෂි සම්පින්ඩන වාර්තාවක් ඉදිරිපත් නොකිරීම , අත්අඩංගුව ගත් නඩු භාණ්ඩ රජයේ රස පරීක්ෂකවරයාට යොමු නොකිරීම සම්බන්ධයෙන් සටහනක් පැමිණිලි ගොනුවෙ නොමැති බව නිරීක්ෂණය කළේය.
සැකකරුවන්ට එරෙහිව පැමිණිල්ල පියවර නොගන්නේ නම් සාක්ෂි නොමැති සැකකරුවන් තවදුරටත් රක්ෂිත බන්ධනාගාර ගත කිරීමට අධිකරණයට නොහැකි බව පෙන්වා දුන් මහේස්ත්‍රාත්වරයා සැකකරු නිදහස් කරන බවට නියෝග කළේය.
අදාල නඩු කටයුත්තෙන් සැකකරු නිදහස් කළද සැකකරුට එරෙහිව තවත් මත්ද්‍රව්‍ය සම්බන්ධයෙන් තවත් නඩු ගණනාවක් පවතිනි බැවින් තවදුරටත් ඔහු රක්ෂිත බන්ධනාගාරයේ පසුවන බව බන්ධනාගාර නිලධාරියෙක් එසැන සමග පැවසීය.
