(රොමේෂ් මධූෂංඛ)

මන්නාරම ඓතිහාසික මරඳමඩු දේවස්ථානයේ වාර්ෂික මඩු මංගල්‍යයේ අවසන් දේව මෙහෙය පූර්ණ ආරක්ෂාවක් හමුවේ අද (15) උදෑසන උත්සවාකාරයෙන් ආරම්භ විය.

මන්නාරම් රදගුරු ෆිඩෙලිස් ලයනල් එමානුවේල් ප්‍රනාන්දු  හා මරඳමඩු දේවස්ථානයේ රදගුරු එස්.ජේ.පී. සුසෙයි පියතුමන් ඇතුළු අනුරාධපුර, බදුල්ල හා කුරුණෑගල යන ප්‍රදේශයන් හී රදගුරුවරුන්ගේ ප්‍රධානත්වයෙන් පැවැත්වෙයි.

මඩු මංගල්‍ය දිවයිනේ නන් දෙසින් මෙන්ම විදෙස් සිට ද විශාල කිතුණු බැතිමතුන් පිරිසක් වාර්ෂිකව සහභාගී වන අතරම අද පැවත්වෙන වාර්ෂික මඩු මංගල්‍යයේ අවසන් දේව මෙහෙය වෙනුවෙන් ආරක්ෂක අංශ විසින් පූර්ණ ආරක්ෂාවක් සපයා ඇත.

අවසන් දේව මෙහෙය උදෑසන 6.15ට ඇරඹෙන අතර දේව මෙහෙයෙන් පසු ඓතිහාසික මඩු මාතා පිළිරුව මඩු භූමියේ බැතිමතුනට වන්දනාමාන සිදු කිරීම සඳහා වීදි සංචාරය කරනු ලැබේ.

අද (15) උදෑසන අවසන් දේව මෙහෙය පැවත්වීමට පෙර ඊයේ (14) මැදියම් රැයේ ද විශේෂ දේව මෙහෙයක් සිදු කෙරෙයි.

වාර්ෂික මඩු  වෙනුවෙන් සහභාගී වූ බැතිමතුන් වෙනුවෙන් පහසුකම් සැපයීම මන්නාරම් දිස්ත්‍රීක් ලේකම් කාර්යාලය හා මඩු ප්‍රාදේශීය ලේකම් කාර්යාලය සමග පොලීසිය හා ත්‍රිවිධ හමුදාව දායකත්වය ලබා දෙයි.