(අංජුල මහික වීරරත්න)
ඕනෑම රටක ඇතිවන දේශපාලන, ආර්ථික හා සමාජ අර්බුදවලදී නිවැරදි අත්දැකීම් ඇති නායකයන් ඉදිරිපත් කරන අදහස් බොහෝ සෙයින් ප්‍රයෝජනවත් වන බව නියංගොඩ විජිතසිරි මල්වතු අනු නා හිමියෝ පැවසුහ.
රට අර්බුදයට පත් වූ අවස්ථාවේ නිර්භීතව රටේ වගකීම භාරගත් ජනාධිපති රනිල් වික්‍රමසිංහ මහතා තමන්ගේ හැකියාව, අත්දැකිම් සහ අවබෝධය තුළින් මේ රටේ පැවති පීඩාකාරී තත්ත්වය බොහෝ දුරට සමනය කර ඇති බව පෙන්වා දුන් අනු නා හිමියෝ දෙස් විදෙස් සියලු දෙනාගේ සහායෙන් රට ඉදිරියට ගෙන යාමට ජනාධිපතිවරයා මේ වන විට සමත් වී ඇති බවද සඳහන් කළහ.
මල්වතු අනු නාහිමියන් මේ බව පැවසූයේ ජනාධිපතිවරණ ජයග්‍රහණය වෙනුවෙන් ජනාධිපති රනිල් වික්‍රමසිංහ මහතාට ආශිර්වාද පළ කරමින් ජනාධිපති නිල නිවසේ පැවති සෙත් පිරිත් සජ්ජායනාව ආරම්භ කිරීමට මත්තෙන් අනුශාසනාවක් කරමිනි.
ඓතිහසික මහනුවර දළදා මාළිගාව ප්‍රමුඛ මල්වතු අස්ගිරි මහා විහාර නියෝජනය කරමින් සහ කතරගම කිරිවෙහෙර, ශ්‍රී පාදස්ථානය, අනුරාධපුර අටමස්ථානය කේන්ද්‍ර කර ගනිමින් ස්වර්ණමාලි චෛත්‍යාරාමය, ලංකාරාමය ඇතුළු විහාරස්ථානයන්හි සහ මරදාන විද්‍යෝදය පරිවෙන ඇතුළු දිවයිනේ විවිධ ප්‍රදේශවලින් ජනාධිපති නිල නිවස වෙත වැඩම කළ නායක ස්වාමින් වහ්නසේලා සෙත් පිරිත් සජ්ජයනා කර ඉදිරි ජනාධිපතිවරණ ජයග්‍රහණය වෙනුවෙන් ජනාධිපතිවරයා වෙත ආශිර්වාද පළ කළහ.
ඉත්තෑපානේ ධම්මාලංකාර කල්‍යාණි සාමග්‍රී ධර්ම මහා සංඝ සභාවේ මහා නා හිමි පිරිස පංචශීලයේ පිහිටවනු ලැබූහ.
කොළඹ හුණුපිටිය ගංගාරාමාධිකාරී ආචාර්ය කිරින්දේ අස්සජි නා හිමියෝ ද මෙහිදී අදහස් දැක්වූහ.
සොලොස්මස්ථානාධිපති අස්ගිරි පාර්ශ්වයේ අනුනායක වෙඩරුවේ උපාලි , ශ්‍රී පාදස්ථානාධිපති බෙංගමුවේ ධම්මදින්න, ලංකාරාමාධිකාරි උතුරු මධ්‍යම දිසාවේ ප්‍රධාන අධිකරණ සංඝනායක රළපනාවේ ධම්මජෝති ,බෙල්ලන්විල රජමහා විහාරාධිකාරී ආචාර්ය බොරලැස්ගමුවේ පේමරතන, රුහුණු විශ්වවිද්‍යාලයේ කුලපති ආචාර්ය අකුරැටියේ නන්ද ,ස්වර්ණමාලි චෛත්‍යාරමාධිකාරී උතුරු මධ්‍යම දිසාවේ ප්‍රධාන සංඝනායක රජරට විශ්වවිද්‍යාලයේ උපකුලපති ඊතලවැටුණුවැවේ ඤාණතිලක, අනුරාධපුර සම්බුද්ධ ජයන්ති විහාරාධිපති අස්ගිරි පාර්ශ්වයේ උතුරු - උතුරු මධ්‍යම දෙදිසාවේ ප්‍රධාන සංඝනායක නුගේතැන්නේ පඤ්ඤානන්ද, සම්බුද්ධාලෝක විහාරාධිපති මහෝපාධ්‍ය, මහාචාර්ය ඉත්තදෙමලියේ ඉන්දසාර , කොළඹ හැව්ලොක් සිටි සාම විහාරය ඇතුළු විහාරගණයේ විහාරාධිපති අතපත්තු කන්දේ ආනන්ද , නාගදීප රජමහා විහාරාධිපති නවදගල පදුමකිත්ති තිස්ස , වැල්ලවත්ත යමුණා සදහම් ආශ්‍රමයේ විහරාධිපති අමරපුර මහා නිකායේ සබරගමුව පළාත් ප්‍රධාන සංඝනායක කැන්දගොල්ලේ පාලිත, පාදෙනිය පුරාණ විහාරස්ථානයේ විහාරාධිපති දේවමැදිහත්පත්තුවේ ප්‍රධාන අධිකාරණ සංඝනායක කටුමුළුවේ ශ්‍රී සුමනරත්න, පිරිවෙන් උපදේශක දොඩම්පහල රාහුල, මරදාන විද්‍යෝදය පරිවෙනාධිපති ආචාර්ය බලංගොඩ සොභිත, මිරිසවැටිය විහාරාධිකාරී වැලිහේනේ සෝභිත , නාරාහේන්පිට ඇලන් මැතිණියාරාමාධිපති උඩුවේ ධම්මාලෝක, කතරගම කිරිවෙහෙර රජමහා විහාරාධිති රුහුණු මාගම්පත්තුවේ ප්‍රධාන සංඝනායක කොබවක ධම්මින්ද, ඓතිහාසික ඔලබොඩුව රජමහා විහාරාධිපති ඔලබොඩුව ධම්මික නායක හිමි, කොටහේනේ නාරද, ආචාර්ය ගැටහැත්තේ සෝභිත, බෝමළුව විහාරවාසී කහටගොල්ලෑවේ මේධංකර නා හිමි වරු ප්‍රමුඛ මහා සංඝරත්නය මෙම අවස්ථාවට වැඩම කර සිටියහ.
