(ක්‍රිෂාන් ජීවක ජයරුක්)
ඉකුත් පාර්ලිමේන්තුව නියෝජනය කළ මාතර දිස්ත්‍රික්කයේ හිටපු පාර්ලිමේන්තු මන්ත්‍රීවරුන් වන කථානායක මහින්ද යාපා අබේවර්ධන, හිටපු අමාත්‍ය ඩලස් අලහප්පෙරුම හා මන්ත්‍රී කරුණා කොඩිතුවක්කු යන මහත්වරු මෙවර මහ මැතිවරණය සදහා මාතර දිස්ත්‍රික්කයෙන් තරග නොකිරීමට තීරණය කර ඇත.
සමගි ජන සන්ධානය හා නව ප්‍රජාතන්ත්‍රවාදී පෙරමූණ මාතර දිස්ත්‍රික් තේරිම් භාර නිලධාරී ගනේෂ අමරසිංහ මහතා වෙත නාම යෝජනා භාර දුන් අතර ඔවුන්ගේ නම් එම ලේඛන වල ඇතුලත් නොවීය.
2020 මහ මැතිවරණයේ දී ශ්‍රී ලංකා පොදුජන පෙරමුණ යටතේ තරග කොට මනාප ඡන්ද 114319 ක් ලබා ගනිමින් කරුණා කොඩිතුවක්කු මහතා මාතර දිස්ත්‍රික්කයෙන් දෙවැනි තැනද මනාප ඡන්ද 103534 ක් ලබා ගත් ඩලස් අලහප්පෙරුම මහතා තෙවැනි තැනද මනාප ඡන්ද 80595 ක් ලබා ගත් මහින්ද යාපා අබේවර්ධන මහතා පස් වැනි තැනද ලබා ගනිමින් පාර්ලිමේන්තුවට තේරී පත් විය.
එහෙත් පසුගිය ජනාධිපතිවරණයේ දී ඩලස් අලහප්පෙරුම හා කරුණා කොඩිතුවක්කු යන මහත්වරු සමගි ජන සන්ධානයේ ජනාධිපති ධුර අපේක්ෂක සජිත් ප්‍රේමදාස මහතාට සහාය පල කරමින් එම පක්ෂයට එකතු විය.
කථානායක මහින්ද යාපා අබේවර්ධන මහතාගේ සමීපතමයින්ගේ සහාය හිමි වූයේ හිටපු ජනාධිපති රනිල් වික්‍රමසිංහ මහතාටය.
ඔහුටම සහාය පල කළ හිටපු විදුලි බල හා බල ශක්ති අමාත්‍ය කංචන විජේසේකර මහතා මෙවර මහ මැතිවරණය සදහා නව ප්‍රජාතන්ත්‍රවාදී පෙරමූණ යටතේ තරග කිරීමට නාම යෝජනා භාර දුන් අතර එම නාම යෝජනා පත්‍රයේ මහින්ද යාපා අබේවර්ධන මහතාගේ නම ඇතුලත් නොවීය. ඔහු වෙනුවට ඒ මහතාගේ පුත් චමීර යාපා අබේවර්ධන මහතා මෙවර මහ මැතිවරණයට ඉදිරිපත් වී ඇත.
ඊට අමතරව දකුණු පලාත් හිටපු ආණ්ඩුකාර ලක්ෂ්මන් යාපා අබේවර්ධන මහතාද මෙවර තරග නොකරන අතර ඔහුගේ පුත් පසද යාපා අබේවර්ධන මහතාද නව ප්‍රජාතන්ත්‍රවාදී පෙරමූණ යටතේ නාම යෝජනා භාර දී තිබේ.
2020 මහ මැතිවරණයේ දී මාතර දිස්ත්‍රික්කයේ ප්‍රථමයා වු නිපුණ රණවක මහතා ශ්‍රී ලංකා පොදුජන පෙරමුණ යටතේ ද හය වැනියා බවට පත් වු වීරසූමන වීරසිංහ මහතා සර්ව ජන බලය පක්ෂය යටතේ ද මෙවර මහ මැතිවරණය සදහා තරග කිරීමට නාම යෝජනා භාර දීමට නියමිතව ඇත.
මීට අමතරව සමගි ජන බලවේගය නියෝජනය කරමින් පාර්ලිමේන්තුවට තේරී පත් වු බුද්ධික පතිරණ මහතා මෙවරද එම පක්ෂයෙන් තරග කිරීමට නාම යෝජනා භාර දී තිබේ.
ජාතික ජන බලවේගයේ මාතර දිස්ත්‍රික් කණ්ඩායම් නායක සුනිල් හදුන්නෙත්ති මහතා ද සිය කණ්ඩායමේ නාම යෝජනා පත්‍රය භාර දුන්නේය.
සමගි ජන බලවේගයේ නාම යෝජනා ලැයිස්තුව
බුද්ධික පතිරණ, චතුර ගලප්පත්ති, කපිල ගමගේ, රංජිත් මුණසිංහ, නිරෝෂන් ප්‍රේමරත්න, කලුතන්ත්‍රිගේ මහින්දරත්න, රෙහාන් ජයවික්‍රම,බිමල් ජයසිරි,නිර්මාල් සමරසිංහ,තුෂාර විජේසූරිය.
ජාතික ජන බලවේගයේ නාම යෝජනා ලැයිස්තුව
සුනිල් හදුන්නෙත්ති,සරෝජා සාවිත්‍රී පෝල්රාජ්,උපුල් කුමරප්පෙරුම,අබේවික්‍රම ලියනගේ මෙත්තපාල,මුහම්මදු ඉල්යාස්,විජිත රුවන් වික්‍රම ආරච්චි,ජයන්ත පතිරණ,ලාල් ප්‍රේමනාත්,අජන්ත ගම්මැද්දගේ,නුවන්ජිත් සෙල්ලහේවා
නව ප්‍රජාතන්ත්‍රවාදී පෙරමුණ
කංචන විජේසේකර,ගයාන් සංජීව,පසද යාපා අබේවර්ධන,විජය වීරසිංහ,සරත් ද අල්විස්,දිමුතු දර්ශන අබේවික්‍රම,බී ජී.චන්දන ප්‍රියන්ත,ධම්මික සොලමන්, තිවංක ජනිත්, චමීර යාපා අබේවර්ධන
