(සුරංග රාජනායක)
ක්ලීන් ශ්‍රී ලංකා ආරම්භ කළ අද අලුයම එකට පමණ ගම්පොළ මාළු වෙළඳසල්වල ඇති ඉවත් කරන ලද නරක් වූ මාළු කොටස්ලොරියකින් රැගෙන ගොස් සංචාරකයන් ගමන් ගන්නා අම්බුලුවාව ජෛව විවිධත්ව සංකීර්ණය ආසන්නයේ පිහිටි පවුල් සියයක් පමණ ප්‍රයෝජනයට ගන්නා ජල මූලාශ්‍රයකට හොර රහසේ දමමින් සිටියදී රැක සිටි ගම්මු එම පිරිස අල්ලා ගෙන ඇත.
නව වසර උදාව සතුටින් සැමරීමට ලංකාවාසි සියල්ල එක්ව සිටියදී අම්බලුවාව ගම්වාසින් සූදානම්ව සිට ඇත්තේ බොහෝ කාලයක සිට කුණු මාළු දමමින් පළාතම දුර්ගන්ධය පතුරවමින් ජලය අපවිත්‍ර කර පරිසර විනාශ කරන කුණු මාළු කාරයන් අල්ලා ගැනීමටය.
නිදි වර්ජිතව සිටි තරුණ පිරිසට මෙම කුණු මාළු ලොරිය පැමිණ එහි තිබූ විශාල කුණු මාළු කොටස් ප්‍රමාණය ප්‍රධාන මාර්ගයෙන් පහළට දමමින් සිටියදී අල්ලා ගැනීමට හැකිවී ඇති අතර එහි තිබූ කුණු මාළු කොටස් ලොරියේ රියදුරු අසුන සිට සියලු තැන්වලට දමා ලොරියේ ටයර්වල හුළං ඇර සිද්ධිය පොලිසියට දන්වා ඇත.
