රොමේෂ් මධුෂංඛ
යාපනය කන්කසන්තුරෙයි කීරිමලෙයි මුහුදු තීරයට මිය ගිය තල්මසෙකුගේ මළ සිරුරක් ගොඩගසා ඇති බවට ප්‍රදේශවාසීහු පවසති.
අඩි 25 ක පමණ දිගකින් යුක්ත මෙම දැවන්ත තල්මසා මීට දින කිහිපයකට පෙර උතුරු ගැඹුරු මුහුදේ දී මිය ගොස් ඇති බවටත් පසුව කීරිමලෙයි මුහුදු තීරයට ගොඩ ගසා ඇති බවට වෙරළාක්ෂක නිලධාරීන් පැවසූහ.
මෙම දැවන්ත තල්මසා මුහුදු වෙරළට ගොඩගැසීම හේතුවෙන් ප්‍රදේශය පුරා දැඩි දුර්ඝන්ධයක් හමන අතර තල්මසා ඉවත් කිරීමට නාවික හමුදාවේ ද සහය ලබාගන්නා බවට වෙරළාරක්ෂක නිලධාරීන් පැවසූහ.
තල්මසා මිය යාමට හේතුව නිශ්චිතවම මෙතෙක් අනාවරණය වී නොමැති අතර ධීවර ක්‍රියාකාරකමක් හෝ නැවක ගැටීමෙන් මිය යා හැකි බවට සැකකරන බව වෙරළාරක්ෂණ නිලධාරීන් වැඩි දුරටත් පැවසූහ.
