(අංජුල මහික වීරරත්න)
රනිල් වික්‍රමසිංහ හිටපු ජනාධිපතිවරයා නැවත මැතිවරණ වලට ඉදිරිපත් වන්නේ නැතැයි එක්සත් ජාතික පක්ෂ නියෝජ්‍ය නායක රුවන් විජයවර්ධන මහතා පැවසීය.
වික්‍රමසිංහ මහතා මැතිවරණවලට ඉදිරිපත් වූයේ නැතත් එක්සත් ජාතික පක්ෂයට මෙන්ම ඉදිරි දේශපාලන බලවේග සඳහා නායකත්වය ලබා දෙනු ඇතැයි විජයවර්ධන මහතා සඳහන් කළේය.
කොළඹ මල් පාරේ පිහිටි දේශපාලන කාර්යාලයේ පැවැති මාධ්‍ය හමුවකදී විජයවර්ධන මහතා මේ බව කීය.
ජාතික ලැයිස්තුවෙන්වත් රනිල් වික්‍රමසිංහ මහතා පාර්ලිමේන්තුවට නොඑන්නේදැයි මෙහිදී මාධ්‍යවේදියකු ඇසූ ප්‍රශ්නයකට පිළිතුරු දෙමින් රුවන් විජයවර්ධන මහතා පැවසූයේ ජාතික ලැයිස්තුවෙන් වත් රනිල් වික්‍රමසිංහ මහතා පාර්ලිමේන්තුවට නොඑනු ඇති බවයි.
මෙහිදී අදහස් දක්වමින් පාර්ලිමේන්තු මන්ත්‍රී රාජිත සේනාරත්න මහතා පැවසූයේ එක්සත් ජාතික පක්ෂයේ ජනාධිපති ධුරය හෙබවූ අතීත නායකයන් ද පාර්ලිමේන්තු මන්ත්‍රී ධුරයක් පතා නැවත පාර්ලිමේන්තුවට පැමිණීමේ සම්ප්‍රදායක් අතීතයේද නොපැවති බවයි.
