(යොහාන් භාසුර)
ශ්‍රී ලංකා පොදුජන පෙරමුණේ හිටපු පාර්ලිමේන්තු මන්ත්‍රීවරු වන ප්‍රබල අමාත්‍ය ධූර දැරූ මහාචාර්ය චන්න ජයසුමන, රොෂාන් රණසිංහ සහ මිලාන් ජයතිලක යන මහත්වරු මව්බිම ජනතා පක්ෂයට අද (2) එක්වූහ.
බොරැල්ලේ පිහිටි මව්බිම ජනතා පක්ෂ මූලස්ථානයේ අද (2) පැවැති විශේෂ මාධ්‍ය හමුවේදී හිටපු මන්ත්‍රීවරු තිදෙනා එම පක්ෂයේ සාමාජිත්වය ගත්හ.
ශ්‍රී ලංකා පොදුජන පෙරමුණේ හිටපු බස්නාහිර පළාත් සභා මන්ත්‍රී රජිත හපුආරච්චි මහතා ද එහිදී මව්බිම ජනතා පක්ෂයට එක්විය.
එහිදී රොෂාන් රණසිංහ මහතා එම පක්ෂයේ සභාපති ධූරයට ද, මහාචාර්ය චන්න ජයසුමන මහතා එම පක්ෂයේ උප සභාපති ධූරයට ද, මිලාන් ජයතිලක මහතා ගම්පහ දිස්ත්‍රික් සංවිධායක ලෙස ද, පත් කළේය.
හිටපු පළාත් සභා මන්ත්‍රී රජිත හපුආරච්චි මහතා එම පක්ෂයේ කටාන ආසනයේ සංවිධායකයා ලෙස පත් කළේය.
පොළොන්නරුව දිස්ත්‍රික්කය නියෝජන කරමින් පසුගිය පාර්ලිමේන්තුවට තේරී පත්වූ හිටපු ක්‍රීඩා සහ තරුණ කටයුතු අමාත්‍ය රොෂාන් රණසිංහ මහතා පසුගිය ජනාධිපතිවරණයට ද තරග කළේය.
අනුරාධපුර දිස්ත්‍රික්කය නියෝජනය කරමින් පාර්ලිමේන්තුවට තේරීපත්වූ මහාචාර්ය චන්න ජයසුමන මහතා ගෝඨාභය රාජපක්‍ෂ ජනාධිපතිවරයාගේ ආණ්ඩුවේ සෞඛ්‍ය රාජ්‍ය අමාත්‍යවරයා ලෙස කටයුතු කළේය.
මිලාන් ජයතිලක මහතා 2020 මහ මැතිවරණයේදී මහර ආසනය නියෝජනය කරමින් ගම්පහ දිස්ත්‍රිකයෙන් පාර්මේන්තුවට තේර පත්විය.
