(විමුක්ති එස් රුද්‍රිගු)
ශ්‍රී ලංකාවේ නවවැනි විධායක ජනාධිපතිවරයා ලෙස අනුර කුමාර දිසානායක මහතා තේරී පත්වීමත් සමග ශ්‍රී ලංකාව සහ චීනය අතර සබඳතා තවත් ශක්තිමත් වනු ඇති බවට චීන විශේෂඥයන් මත පළකර ඇතැයි එරට ග්ලෝබල් ටයිම්ස් ටැබ්ලොයිඩ් පුවත්පත වාර්තා කළේය.
ජනපති අනුර කුමාර දිසානායක මහතා සිය ධූර කාලය තුළදී චීනය සමඟ සබඳතා ශක්තිමත් කර ගැනීම සඳහා වඩාත් ප්‍රායෝගික සහ මිත්‍රශීලී ප්‍රවේශයක් අනුගමනය කරනු ඇතැයි අපේක්ෂා කෙරන බව විශේෂඥයන් පෙන්වාදී ඇතැයි එම පුවත්පත සඳහන් කළේය.
විශේෂයෙන් එක් තීරයක් එක් මාවතක් ව්‍යාපෘතිය අදාළ කර ගනිමින් දේශීය සංවර්ධන උපාය මාර්ගයන්ට මුල පිරීමත් සමග පසුගිය දශකයක කාලය තුළදී ශ්‍රී ලංකාව සහ චීනය අතර සබඳතාව අඛණ්ඩව වර්ධනය වී ඇතැයි එම පුවත්පත පෙන්වා දුන්නේය.
ජනපති අනුර කුමාර දිසානායක මහතාගේ නව පරිපාලනයත් සමග මෙම සබඳතා තව දුරටත් ශක්තිමත් වනු ඇතැයි අපේක්ෂා කරන බව සිංහුවා විශ්වවිද්‍යාලයේ ජාතික උපාය මාර්ග ආයතනයේ පර්යේෂණ අංශයේ අධ්‍යක්ෂ චියාන් ෆෙන්ග් මහතා ග්ලෝබල් ටයිම්ස් පුවත්පතට සම්මුඛ සාකච්ඡාවක් ලබා දෙමින් ඊයේ (22) ප්‍රකාශ කළේය. ජනපති අනුර කුමාර දිසානායක මහතා සහ ඔහු නියෝජනය කරන පක්ෂය චීනය සමඟ බොහෝ මතවාදී සමානකම් බෙදාහදා ගන්නා බවත් ශ්‍රී ලංකාව චීනය සමග ඇති සම්බන්ධය දිසානායක මහතා අගය කරන බවත් ෆෙන්ග් මහතා එහිදී පැවැසුවේය.
කෙසේ නමුත් ශ්‍රී ලංකාව චීනය සහ ඉන්දියාව සමග සමබර සබඳතාවක් පවත්වාගෙන යනු ඇතැයි අපේක්ෂා කරන බවද ඔහු ප්‍රකාශ කළේය.
