(රංජිත් රාජපක්ෂ)
අධ්‍යාපන රාඡ්‍ය අමාත්‍ය අරුණාචලම් අරවින්ද කුමාර් මහතා අවසරයකින් තොරව සිය භාරයේ තබාගෙන සිටි බව කියන හැටන් වැවිලි සමාගමට අයත් ලිඳුල ‘හෙන්ෆොල්ඩ්’ වතුයායේ පිහිටි නිල නිවසේ තිබු අරවින්ද කුමාර් මහතාට අයත් සියලු භාන්ඩ සමඟම අදාළ නිවස නුවරඑලිය දිසා අධිකරණයේ රෙජිස්ටාර්වරිය විසින් වතු අධිකාරිවරයාට අද බාර දෙන ලදී.
එම නිවස යළි වතු අධිකාරිවරයාට බාර දෙන ලෙස නුවරඑලිය දිසා විනිසුරුවරියගේ නියෝගයකට අනුව අධිකරණ රෙජිස්ටාර්වරිය ඇතුළු පිසිකල් නිලධාරින් ලිදුල පොලිසියේ නිලධාරින්ගේ දැඩි ආරක්ෂාව මධ්‍යයේ එම නිවසට පැමිණ එහි තිබු අරවින්ද කුමාර් මහතාට අයත් සියලු භාන්ඩ ලේඛණගත කිරීමෙන් අනතුරුව වතු අධිකාරිවරයාට එලෙස බාර දෙන ලදී.
අරවින්ද කුමාර් මහතා 1987 වසරේ ලිඳුල ‘හෙන්ෆොල්ඩ්’ වතුයායේ ප්‍රධාන ලිපිකරු වශයෙන් සේවය කර ඇති අතර එම කාලයේ වතු පාලන අධිකාරිය, නිල නිවස වශයෙන් භාවිතා කිරිමට මෙම නිවස අරවින්ද කුමාර් මහාතට ලබා දි තිබුණත් අරවින්ද කුමාර් මහතා වතුයායේ රැකියාවෙන් ඉවත් විමෙන් පසු අදාළ නිල නිවස ආපසු වතු අධිකාරියට භාර නොදි එම නිවස අලුත්වැඩියා කර එහි රැදි සිටිමට එරෙහිව වතු පාලනඅධිකාරිය ඔහුට එරෙහිව නුවරඑලිය දිසා අධිකරණය හමුවේ නඩු පවරා තිබුණි.
දිර්ඝ කාලයක් පුරා නඩුව විභාග කළ නුවරඑලිය දිසාවිනිසුරුවරයා එම නිල නිවසෙන් ඉවත් වන ලෙස නියම කරමින් අරවින්ද කුමාර් මහතාට එරෙහිව තීන්දුවක ප්‍රකාශයට පත් කළ අතර නුවරඑලිය දිසාවිනිසුරුවරයා එම තීන්දුවට එරෙහිව අරවින්ද කුමාර් මහතා අභියාචනාධිකරණයටද ඉන් අනතුරුව ශ්‍රේෂ්ඨාධිකරණය හමුවේ අභියාචනා ඉදිරිපත් කළත් එම අභියාචනා දෙකම ප්‍රතික්‍ෂෙප කෙරුණු අතර නුවරඑලිය දිසාවිනිසුරුවරයා එම තීන්දුවට අනුව කටයුතු කරන ලෙස ඉහළ අධිකරණයන් විසින් නියම කරන ලදී.
ඒ අනුව නුවරඑලිය දිසා විනිසුරු්වරියගේ නියෝගය මත ලිඳුල ‘හෙන්ෆොල්ඩ්’ වතුයායේ පිහිටි නිල නිවසට ලිදුල පොලිසියේ නිලධාරින්ගේ දැඩි ආරක්ෂාව මධ්‍යයේ පැමිණි අධිකරණ රෙජිස්ටාර්වරිය ඇතුළු පිසිකල් නිලධාරින් නිවසේ තිබු අරවින්ද කුමාර් මහතාට අයත් සියලු භාන්ඩ ලේඛණගත කිරීමෙන් අනතුරුව වතු අධිකාරිවරයාට බාර දුන්නේය.
