(කේෂර ගුණතිලක)

මොනරාගල බුත්තල මාර්ගයේ හොරොම්බුව හංදිය අසලදී අද (27) දහවල් වෑන්රථයක් ත්‍රීවීල්රථ දෙකක ගැටීමෙන් සිදුවූ රිය අනතුරකින් පෙරපාසල් දරුවන් දෙදෙනෙකු ඇතුළු සිව් දෙනෙකු තුවාල ලබා ඇතැයි මොනරාගල පොලීසිය පවසයි.

බණ්ඩාරවෙල සිට මොනරාගල තැපැල් කාර්යාලය සඳහා තැපැල් මළු රැගෙන යන වෑන්රථය හොරොම්බුව හංදිය අසලදී රථයේ වේගය පාලනයකර ගැනීමට නොහැකිව හොරොම්බුව රථගාලේ නතරකර තිබූ ත්‍රීවීල්රථ දෙකක ගැටී පෙර පාසලට ගොස් ආපසු නිවෙස් වලට යාමට බසයක් එනතුරු බලා සිටි පෙරපාසල් ළමුන් දෙදෙනෙකු සහ මවක් යටකරගෙන ඉදිරියේ තිබූ කුඩා වෙළෙඳසැලක ගැටී නතරවී ඇත.

ත්‍රීරෝද රථයක සිටි එක් රියදුරෙකුටද තුවාල සිදුවී ඇත.

තුවාලකරුවන් සිව්දෙනා මොනරාගල දිස්ත්‍රික් මහ රෝහලට ඇතුලත්කර ඇති අතර ත්‍රීරෝද රථයේ සිටි එහි රියදුරුගේ තත්වය බරපතළ බව රෝහල් ආරංචිමාර්ග පවසයි.

මොනරාගල මූලස්ථාන පොලිස් පරීක්ෂක පී.එස් චාමින්ද සංජීව මහතාගේ උපදෙස් පිට රථ වාහන අංශයේ ස්ථානාධිපති ජානක රත්නසිරි මහතා පරීක්ෂණ පවත්වයි.