(අංජුල මහික වීරරත්න)
විපක්ෂයේ සියලු පක්ෂ ඉදිරි මහ මැතිවරණයේදී එක ලකුණක් යටතේ තරග කිරීම සම්බන්ධ සාකච්ඡා හිටපු ජනාධිපති රනිල් වික්‍රමසිංහ මහතාගේ ප්‍රධානත්වයෙන් කොළඹ මල් පාරේ පිහිටි දේශපාලන කාර්යාලයේදී අද (26) පැවැත්විණි.
මහ මැතිවරණයේදී හිටපු ජනාධිපතිවරයාට සහාය දුන් පොදුජන පෙරමුණේ කණ්ඩායම් මෙන්ම එක්සත් ජාතික පක්ෂ නිලධාරීන් අතර අද දවස පුරා වරින් වර මෙම සාකච්ඡා පැවැත්විණි.
මෙහිදී අදහස් දක්වමින් එක්සත් ජාතික පක්ෂ හිටපු පාර්ලිමේන්තු මන්ත්‍රී ආශු මාරසිංහ මහතා පැවසූයේ මහ මැතිවරණයේදී එක්ව තරග කිරීම සඳහා සමගි ජන බලවේගය සමඟ සාකච්ඡා ධනාත්මක තත්ත්වයක පවතින බවයි.
සියලු දෙනා එක්ව මහ මැතිවරණයට ඉදිරිපත් විය යුතු බව තම ඒකමතික අදහස බවද ආශු මාරසිංහ මහතා සඳහන් කළේය.
පොදු ජන පෙරමුණේ හිටපු පාර්ලිමේන්තු මන්ත්‍රී එස්. බී දිසානායක මහතා පැවසූයේ එක කණ්ඩායමක් ලෙස මැතිවරණයට ඉල්ලීම ස්ථිර නමුත් පක්ෂය සහ ලාංඡනය ඉදිරියේදී තීරණය කරන බවයි.
මෙම සාකච්ඡා සඳහා හිටපු අග්‍රාමාත්‍ය දිනේෂ් ගුණවර්ධන මහතා ප්‍රමුඛ පොදුජන පෙරමුණේ හිටපු මන්ත්‍රීවරුද එක්සත් ජාතික පක්ෂ නියෝජනායක රුවන් විජයවර්ධන මහතා ප්‍රමුඛ එජාප නිලධාරීහු ද සහභාගී වූහ.
