(යොහාන් භාසුර)
පහ ශ්‍රේණිය ශිෂ්‍යත්ව විභාගයේ ප්‍රශ්න පිටවීම සම්බන්ධයෙන් පරීක්ෂණ කිරීමට අග්‍රාමාත්‍ය හරිනි අමරසූරිය විශේෂඥ කමිටුවක් පත්කළ බවත් එම කමිටුවේ නිර්දේශ අනුව ප්‍රශ්න පත්‍ර ඇගයීමට තීරණය කළ බවත් අධ්‍යාපන අමාත්‍යංශයේ ලේකම් තිලකා ජයසුන්දර මහත්මිය අද (30) පැවසුවාය.
තිලකා ජයසුන්දර මහත්මිය අධ්‍යාපන අමාත්‍යංශයේදී අද පස්වරුවේ පැවැත්වූ විශේෂ මාධ්‍යහමුවේදී එසේ පැවසුවාය.
විභාග කොමසාරිස් ජනරාල්වරයා ඉදිරිපත් කළ වාර්තාව පිළිබඳ අධ්‍යයනය කිරීමට අග්‍රාමාත්‍යවරිය විශේෂඥ කමිටුවක් පත් කළ බව කී ලේකම්වරිය එම විශේෂඥ කමිටුව දුන් නිර්දේශ අනුව විභාගය ඇගැයීමට තීරණය කළ බව ද සඳහන් කළාය.
එම කමිටුව දේශීය සහ විදේශීය විශේෂඥ හත්දෙනෙකුගෙන් සමන්විත බවත් එයට අධ්‍යාපන මනෝවිද්‍යාව පිළිබඳ කොළඹ විශ්ව විද්‍යාලයේ අධ්‍යාපන පීඨයේ මහාචාර්ය සමුද්‍රා සෙනරත් මහත්මිය සහ ජ්‍යෙෂ්ඨ මනෝ උපදේශක සහ මනෝ චිකිත්සක වෛද්‍ය චමින්ද වීරසිරිවර්ධන මහතා ද ඇතුළත් වූ බවත් ඇය කීවාය.
සැප්තැම්බර් 15 වැනිදා පැවැති පහ ශ්‍රේණිය ශිෂ්‍යත්ව විභාගයේ පළමු ප්‍රශ්න පත්‍රය පිටවී ඇතැයි වාර්තා වූ වහාම විභාග කොමසාරිස් ජනරාල්වරයා මූලික විමර්ශනයක් පවත්වා සමාජ මාධ්‍යවල පළ වූ ප්‍රශ්න තුනක් එම ප්‍රශ්න පත්‍රයේ තිබූ බව අනාවරණය කරගත් බවත් ඉන් පසුව ඒ සම්බන්ධයෙන් විමර්ශනය කිරීම අපරාධ පරීක්ෂණ දෙපාර්තමේන්තුවට භාර දුන් බවත් ලේකම්වරිය පැවසුවාය.
අපරාධ පරීක්ෂණ දෙපාර්තමේන්තුව ඒ පිළිබඳව ඉතාමත් කඩනමින් විමර්ශනය කර එයට සම්බන්ධ පුද්ගලයකු හඳුනාගෙන ඔහු අත්අඩංගුවට ගත් බවත් ඒ පිළිබඳ විමර්ශනය තවදුරටත් ක්‍රියාත්මක වන බවත් ඇය සඳහන් කළාය.
අපරාධ පරීක්ෂණ දෙපාර්තමේන්තුව එම විමර්ශනය සම්බන්ධයෙන් අතුරු වාර්තාවක් අධ්‍යාපන දෙපාර්තමේන්තුවට දුන් බව කී ලේකම්වරිය විෂය භාර අමාත්‍යවරිය වන අග්‍රාමාත්‍යවරිය මැදිහත්වීමෙන් එම වාර්තාව පදනම් කරගෙන විභාග කොමසාරිස්වරයාගෙන් තවත් වාර්තාවක් ගත් බව ද කීවාය.
