(විමුක්ති එස් රුද්‍රිගු)
ඇමෙරිකාවෙන් ලැබෙන ආධාර නතරවේ යැයි යුක්රේන ජනපති ව්ලොදිමීර් සෙලෙන්ස්කි කණස්සල්ලෙන් පසුවෙද්දී රුසියානු ජනාධිපති ව්ලැදිමීර් පුටින් යුක්රේන යුද්ධය සම්බන්ධයෙන් ඇමෙරිකාවේ නව ජනපති ලෙස තේරී පත්වූ ඩොනල්ඩ් ට්‍රම්ප් සමග සාකච්ඡා කිරීමට සූදානම් සිටින බව විදෙස් මාධ්‍ය පසුගියදා වාර්තා කළේය.
යුක්රේන යුද්ධය සම්බන්ධයෙන් ට්‍රම්ප් සමග සාකච්ඡා කිරීමට සූදානම් යැයි ජනාධිපති ව්ලැදිමීර් පුටින් රුසියාවේ සෝචි නගරයේ පැවැති සමුළුවකදී ප්‍රකාශ කර ඇතැයි විදෙස් මාධ්‍ය පැවැසුවේය.
ඩොනල්ඩ් ට්‍රම්ප් යුක්රේන යුද්ධය අවසන් කිරීම සම්බන්ධයෙන් පළකර තිබෙන අදහස් වලට අඩුම වශයෙන් අවධානය හෝ යොමු කිරීම රුසියාවේ යුතුකම බවද ජනපති පුටින් එහිදී ප්‍රකාශ කර ඇත.
ට්‍රම්ප් ජනාධිපතිවරණයෙන් ලද ජයග්‍රහණයට සුබ පැතීමටත් එහිදී ජනපති පුටින් අමතක කර නොමැති අතර ඝාතන උත්සාහයක් ක්‍රියාත්මක වන අවස්ථාවක ජනාධිපතිවරණය ජයග්‍රහණය කිරීම අගය කළ යුතු බවද ඔහු පවසා තිබිණි.
යුක්රේනයේ අනාගතය කෙබඳුවේ දැයි මත ඉදිරිපත් වීමෙන් තිබෙන මොහොතක යුක්රේන ජනපති ව්ලොදිමීර් සෙලෙන්ස්කි සහ ඩොනල්ඩ් ට්‍රම්ප් අතර දුරකතන සංවාදයක් සිදුව ඇති බවත් එයට ලොව ධනවත්ම පුද්ගලයා වන ඊලෝන් මස්ක්ද සම්බන්ධ වී ඇති බවත් විදෙස් මාධ්‍ය පැවැසුවේය. මෙම දුරකතන සංවාදය ඇමෙරිකානු ජනාධිපතිවරණයට පසුදින සිදුව ඇති බවද විදෙස් මාධ්‍ය වාර්තා කළේය.
