(ඩයනා උදයංගනී)
සෞඛ්‍ය ක්‍ෂේත්‍රයේ හෙද, අතුරුවෙද්‍ය සහ පරිපූරක සේවාවන්ට අයත් වෘත්තීය සමිති 18ක් එක්ව අද (7) උදෑසන සිට ආරම්භ කළ වැඩවර්ජනය හේතුවෙන් රටපුරා රෝහල්වල කටයුතු අඩාල වී රෝගීහු දැඩි පීඩාවට පත්වූහ.
වැටුප් විෂමතා ඉවත්කිරීම, ඖෂධ මිල අඩුකිරීම ඇතුළු ඉල්ලීම් 7ක් මුල්කරගනිමින් ඔවුන් මෙම වැඩවර්ජනය ආරම්භ කර ඇත.
හෙද හෙදියන්, ඖෂධවේදීන්, වෛද්‍ය රසායනාගාර විද්‍යාඥයන්, මහජන සෞඛ්‍ය පරීක්‍ෂකවරුන්, විද්‍යුත් ඛන්තු රේඛන ශිල්පීන්, දන්ත කාර්මික ශිල්පීන්, ඇතුළු සෞඛ්‍ය ක්‍ෂේත්‍රයේ සේවා 18 ක් මෙම වැඩවර්ජනයට එක්ව සිටිති.
මේ හේතුවෙන් රෝහල්වල බාහිර රෝගී අංශවලින් හා සායනවලින් ප්‍රතිකාර ලබාගැනීමට පැමිණි රෝගීන්ට වෛද්‍යවරුන් විසින් ඖෂධ නියම කළත් ඖෂධවේදීන් විසින් ඖෂධ නිකුත් නොකිරීම නිසා රෝගීන් දැඩි පීඩාවකට පත්ව සිටිනු දක්නට ලැබිණි.
රෝහල්වල ඖෂධ නිකුත් නොකිරීම හේතුවෙන් ඔසුසල් ඇතුළු ඖෂධ අලෙවිසැල්වල දැඩි පෝලිම් තිබෙනු ද දක්නට ලැබිණි.
රිජ්වේ ආර්යා ළමා රෝහල, පේරාදෙණිය සිරිමාවෝ බණ්ඩාරනායක ළමා රෝහල, කාසල් වීදිය, ද සොයිසා, කේතුමතී, මහමෝදර යන කාන්තා රෝහල්, අයි.ඩී.එඩ් රෝහල, මධ්‍යම ලේ බැංකුව, මාළිගාවත්ත හා පොළොන්නරුව වකුගඩු රෝහල් යන ස්ථාන 10 හි මෙම වැඩවර්ජනය ක්‍රියාත්මක නොවේ.
වර්ජනය ක්‍රියාත්මක වුවත් අසාධ්‍ය රෝගීන් හා හදිසි රෝගී සත්කාරක සේවා හා ජීවිතාරක්‍ෂක සේවා පවත්වාගෙන යන බව සෞඛ්‍ය වෘත්තීයවේදීන්ගේ සම්මේලනයේ සම කැඳවුම්කරු, සමන් රත්නප්‍රිය මහතා පැවසීය.
රටපුරා රෝහල්වල 65,000ක් පමණ මෙම වර්ජනයට සම්බන්ධ වී සිටින බව ද ඔහු සඳහන් කළේය.
රජයෙව් ස්ථිර විසඳුමක් නොලැබුණහොත් දැනට වර්ජනය නොපවතින රෝහල් ද යම් මොහොතක වැඩවර්ජනයට ඇතුළත් කරගැනීමට සිදුවනු ඇතැයි හෙතෙම කීවේය.
ඡායාරූප - ජයමාල් චන්ද්‍රසිරි
