(විමුක්ති එස් රුද්‍රිගු)
සේවා කොන්දේසි කඩකළ සහ සේවයේ නියුතු අන් අයට බලපෑම් කළ ශ්‍රී ලාංකිකයකු පිටුවහල් කිරීමට රැගෙන ගිය අවස්ථාවේදී ඊශ්‍රායල ටෙල් අවිව් ගුවන් තොටුපොළෙන් පැන ගොස් ඇතැයි ඊශ්‍රායලයේ ශ්‍රී ලංකා තානාපති නිමල් බණ්ඩාර මහතා පසුගියදා ප්‍රකාශ කළේය.
මෙම ශ්‍රී ලාංකිකයා ඉදිකිරීම් සේවකයකු ලෙස ඊශ්‍රායලයට පැමිණ ඇති බවත් ඔහු සති දෙකක කාලයක් සේවයට නොපැමිණ ඇති බවත් බණ්ඩාර මහතා පැවැසුවේය. එසේම ඔහු එම සේවා ස්ථානයේ සේවයේ නියුතු බලපෑම් කිරීමට උත්සාහ කළ බවටත් කඩාකප්පල්කාරී ලෙස හැසිරුණු බවටත් චෝදනා එල්ල වී ඇති බවද බණ්ඩාර මහතා ප්‍රකාශ කළේය.
එවැනි චෝදනා එල්ල වීම හේතුවෙන් ඊශ්‍රායල ආගමන ආයතනයේ අවසරය ලබාගෙන එම ශ්‍රී ලාංකිකයා ඊශ්‍රායලයේ සේවයේ යෙදවූ මෑන්පවර් ආයතනයේ කාන්තා නිලධාරිනියක් ඔහුව ටෙල් අවිව් ගුවන් තොටුපොළ වෙත රැගෙන ගිය බවත් එම අවස්ථාවේදී මෙම ශ්‍රී ලාංකිකයා නිලධාරිනිය අත තිබූ ඔහුගේ විදේශ ගමන් බලපත්‍රය උදුරාගෙන පැන ගොස් ඇති බවත් තානාපති නිමල් බණ්ඩාර මහතා පැවැසුවේය.
මෙම ශ්‍රී ලාංකිකයා මිනුවන්ගොඩ ප්‍රදේශයේ පදිංචිකරුවකු බවත් මින් ඉදිරියට මෙවැනි වරදවල් කරන පුද්ගලයන් මින් ඉදිරියට රැගෙන යාමට වන්නේ මාංචු යොදා ආරක්ෂක නිලධාරීන් සමග බවත් තානාපතිවරයා ප්‍රකාශ කළේය. ඊශ්‍රායලයට පැමිණෙන ශ්‍රී ලාංකිකයන් රටේ නම ආරක්ෂා කර ගනිමින් විනයගරුකව ඊශ්‍රායල නීති රීති පිළිපැදීමට කටයුතු කළ යුතු බවද තානාපති නිමල් බණ්ඩාර මහතා පැවැසුවේය.
