(පද්මා කුමාරී කංකානම්ගේ)
සෞඛ්‍ය ආරක්ෂිත ක්‍රමවේදයන්ට අනුකූලව දෙස් විදෙස් සංචාරකයින් සදහා කල්පිටියේ ඩොල්පින් මසුන් නැරඹුම් ඇරඹී ඇති බව ,කල්පිටිය පරිසර හිතකාමී සංචාරක පදනමේ සභාපති මඩු රාජ් ප්‍රනාන්දු පැවසීය.දෙසැම්බර් අග භාගයෙන් ඇරඹෙන ඩොල්පින් නැරඹුම් සමය අප්‍රේල් අග භාගය හෝ මැයි මුල් භාගය තෙක් දිව යයි.
ඩොල්පින් නැරඹුම් සදහා සංචාරකයින් රැගෙන යන යාත්‍රා සෑම සංචාරයකටම පෙර හා පසු විෂ බීජ හරණය,යාත්‍රාවේ ගමන් ගන්නන් අතර මීටරයේ පරතරය පවත්වාගෙන යාම,ආහාර පාන ගැනීමේ දී කොරෝනා නීතී හා ආචාර ධර්ම පිළිපැදීම මෙහිදී අනිවාර්‍ය බවද ඒ මහතා පැවසුවේ ය.ඩොල්පින් මසුන් නැරඹීමට සහහාගීවන සියලු සංචාරකයින්ගේ තොරතුරු ඇතුලත් ලේඛනයක් සෑම යාත්‍රාවකම පවත්වා ගෙන යා යුතු ය.
වන ජීවී දෙපාර්තුමේන්තුවේ කල්පිටිය ජ්‍යෙෂ්ඨ අඩවි ආරක්ෂක මංජුල කුමාර මොරතැන්න මහතා මෙසේ කීය.
"ඩොල්පින් මසුන් නැරඹීමට, වන ජීවී දෙපාර්තුමේන්තුවේ ප්‍රවේශ පත්‍ර නිකුත්කරන කවුලු තුනක් ක්‍රියාත්මකයි.කන්ද කුලිය,කුඩාව සහ ඉලන්තඩ්ය යන ප්‍රදේශවල පිහිටි එම කාර්‍යාල මගින් ඉදිරියේ දී සංචාරකයින් අධීක්ෂණ කෙරෙනවා."
"සෑම දේශීය සංචාරකයෙකු සතුවම තමා පදිංචි පළාතේ මහජන සෞඛ්‍ය ලධාරිගෙන් ලබා ගත්,තමා නිරෝධායනයට ලක් නොවන්නෙකු බව තහවුරු කෙරෙන වාර්තාවක් තිබිය යුතුය.විදෙස් සංචාරකයින් සතුව ගුවන් තොටුපලේ දී කෙරෙන පී.සී.ආර්.වාර්තාව වැදහත් වෙනවා.සියලුම සංචාරකයින්ගේ උණ බැලීමත් මේ කාර්‍යාලවල දී සිදු වෙනවා."
ඩොල්පින් නැරඹුම් යාත්‍රාවේ ගමන් ගන්නා කාර්‍ය මණ්ඩල දෙසතියකට වරක් රැපිඩ් ඇන්ටිජන් පරීක්ෂාවකට ලක්කිරීමට ද නියමිත ය. කල්පිටි අර්ධද්දීපයේ ඩොල්පින් මසුන් නැරඹුම් සදහා යාත්‍රා 116 ක්,මේ වන විට වන ජීවී දෙපාර්තුමේන්තුවේ ලියාපදිංචි වී ඇත.
