(මහින්ද නිශ්ශංක)

හයිලන්ඩ් යෝගට් එකක මිල රුපියල් රුපියල් 10 කින් අද (01) සිට අඩු කිරීමට මිල්කෝ කිරිපිටි සමාගම තීරණය කර තිබේ.

ඒ අනුව මෙතෙක් රුපියල් 80ට අළෙවි කළ හයිලන්ඩ් යෝගට් එකක නව මිල රුපියල් 70ක් බව මිල්කෝ කිරිපිටි සමාගමේ අලෙවි හා විකුණුම් කළමනාකරු සම්පත් ගුණරත්න මහතා පැවසීය.

මෙයට අමතරව මිල්කෝ සමාගම මඟින් නිෂ්පාදනය කරන දියර කිරි වර්ගවල මිලද අඩු කර ජනතාවට සහන සලසා ඇතැයි ද කළමණාකාර සම්පත් ගුණරත්න මහතා සඳහන් කළේය.

මෙතෙක් රුපියල් 225 අළෙවි කළ මිලිලීටර් 450 ප්‍රමාණයේ කල් තබාගැනීමේ දියර කිරි පැකට්ටුවක මිල රුපියල් 200 දක්වා ද රුපියල් 200 ට අලෙවි කළ මිලිලීටර් 450 ප්‍රමාණයේ පැකට්ටුවක මිල රුපියල් 170 දක්වා සහ රුපියල් 440 ට මෙතෙක් අළෙවි කළ මිලිලීටර් 900 ප්‍රමාණයේ දියර කිරි පැකට්ටුවක මිල රුපියල් 380 දක්වා රුපියල් 60 කින් අඩු කළ බවත් අලෙවි හා විකුණුම් කළමනාකරු පැවසීය.