(මනෝප්‍රිය ගුණසේකර)
හිටපු පාර්ලිමෙන්තු මන්ත්‍රී ජොන්ස්ටන් ප්‍රනාන්දු මහතාට විදේශ ගතවීම වළකාලමින් කොටුව මහෙස්ත්‍රාත් තනුජා ලක්මාලි මහත්මිය විදේශ ගමන් තහනමක් අද (10) පැනවුවාය.
ලියාපදිංචි නොකළ බී.එම්.ඩබ්ලිව්. වර්ගයේ කාර් රථයක් ව්‍යාජ අංක තහඩුවක් යොදාගෙන භාවිතා කළැයි කියන සිද්ධියක් සම්බන්ධයෙන් විමර්ශන කරන බව දැනුම් දෙමින් රහස් පොලිසිය කළ ඉල්ලීමක් සළකා බැලීමෙන් අනතුරුව මහෙස්ත්‍රාත්වරිය එලෙස විදේශ ගමන් තහනමක් පැනවුවාය.
සිද්ධියට අදාළව කළ විමර්ශනවල ප්‍රගතියය දැක්වෙන වාර්තාවක් ඉදිරිපත් කළ රහස් පොලිස් නිලධාරීහු කොළඹ ප්‍රධාන පෙළේ හෝටලයක රථගාලේ සැකකටයුතු අන්දමින් කාර් රථයක් නවතා ඇති බවට ලැබුණු තොරතුරකට අනුව මෙම බී.එම්.ඩබ්ලිව්. වර්ගයේ කාර් රථය සම්බන්ධයෙන් විමර්ශන ආරම්භ කළ බව දැනුම් දුන්හ.
එම විමර්ශන වලදී ජර්මනියේ නිශ්පාදිත මෙම බී.එම්.ඩබ්ලිව්. වර්ගයේ කාර් රථය එංගලන්තයට යවන බව පවසා හොර රහසේ මෙරටට ගෙන්වා ඇති බවත් පසුව කාර් රථය මෙරට ලියාපදිංචි නොකර වෙනත් මෝටර් රථයකට නිකුත් කළ අංක තහඩුවක් ව්‍යාජ ලෙස සවිකර මෙම කාර් රථය භාවිතා කර ඇති බවත් දැනුම් දුන් නිලධාරීහු මෙම රථය මෙරටට ගෙන්වුයේ කවුද? භාවිතා කළේ කවද? යන්න පිළිබඳ පු`ථල් විමර්ශනයක් ආරම්භ කර අතැයිද දැනුම් දුන්හ.
සිද්ධිය සම්බන්ධයෙන් විමර්ශන කරන හෙයින් හිටපු පාර්ලිමෙන්තු මන්ත්‍රී ජොන්ස්ටන් ප්‍රනාන්දු මහතාට විදේශ ගතවීම වළකාලන නියෝගයක් නිකුත කරන්නැයි ඉල්ලා සිටියහ.
පොලිසියේ ඉල්ලීම පිළිගනිමින් ඒ සඳහා අවසර දුන් මහෙස්ත්‍රාත්වරිය සිද්ධියට අදාළව කරන විමර්ශන වල ප්‍රගතිය අධිකරණයට වාර්තා කිරීමට පොලිසියට නියම කළාය.
