(ගයාන් සූරිය ආරච්චි)
කොළඹ ජාතික රෝහලේ නේවාසිකව ප්‍රතිකාර ලබන සිය මව බැලීමට පැමිණ සිටි කාන්තාවකගේ රන් බඩු වංචනිකව සොරාගත් වෛද්‍යවරයෙකු ලෙස පෙනීසිටි සාත්තු සේවකයෙකු අත්අඩංගුවට ගත් බව මරදාන පොලිසිය පවසයි.
මෙසේ අත්අඩංගුවට ගෙන ඇත්තේ කොළඹ ජාතික රෝහලේ සාත්තු සේවයේ නියුතු 42 හැවිරිදි පොළොන්නරුව ප්‍රදේශයේ පදිංචි පුද්ගලයෙකි.
රන්බඩු සොරාගත් කාන්තාවගේ මව දැනට මාසයක පමණ කාලයක සිට සිට කොළඹ ජාතික රෝහලේ නේවාසිකව ප්‍රතිකාර ලබන අතර රෝගියා බැලීම සඳහා සිද්ධියට මුහුණ දුන් කාන්තාව සහ ඇගේ නැගණිය පැමිණ සිට ඇත.
එම අවස්ථාවේදී රෝගීන් බැලීම සඳහා පැමිණෙන වෛද්‍යවරයකු ලෙස පෙනී සිටි සැකකරු පැමිණිලිකාර කාන්තාවගේ මවගේ වාර්තා පරීක්ෂා කර මවගේ රෝගී තත්ත්වයට අනුව ඇයට රුධිරය ලබාදීමට අවශ්‍ය බව ප්‍රකාශ කර ඇති බව පොලිසිය කියයි.
පසුව සැකකරු විසින් මෙම කාන්තාවන් දෙදෙනාගෙන් එක් අයෙකුගෙන් රුධිරය ලබා ගැනීමට අවශ්‍ය බව පවසා වාට්ටුවකට රැගෙන ගොස් ස්කෑන් පරීක්ෂණයක් කිරීම සඳහා රත්තරන් බඩු සියල්ලම ගලවා තබන ලෙස සැකකරු දැන්වූ බව පොලිසියය පවසයි.
පසුව එම කාන්තාව තම රත්තරන් බඩු තම නැගණියට ලබාදීමට අවශ්‍ය බව පැවසූ අවස්ථාවේදී සැකකරු විසින් ව්‍යාජ ලෙස හඬ පටයක් ඉදිරිපත් කරමින් නැගෙණිය වාට්ටුවෙන් පිට සිටින බව හඟවා ඇති බව පොලිසිය කියයි.
පසුව මෙම කාන්තාව තමාගේ රන් භාණ්ඩ එම පුද්ගලයාගේ අතට ලබා දී ඇති අතර පසුව සැකසිතී බලන විට සැකකරු එම ස්ථනයෙන් පලාගොස් ඇත.
මෙම සිද්ධිය පිළිබඳව රෝහලේ සිටින රොහල් ආරක්ෂක නිලධාරීන්ට පැවසීමෙන් පසු සැකකරුගේ තොරතුරු අනාවරණය වී ඇති අතර ඒ පිළිබඳව මරදාන පොලිසියට පැමිණිලි කර ඇත.
සැකකරු වෛද්‍යවරයකු ලෙස පෙනී සිටිමින් මීට ඉහතදී මෙවැනිම වංචා සිදුකර ඇති බව පැවසේ.
අත්අඩංගුවට ගත් සැකකරු මාළිගාකන්ද මහේස්ත්‍රාත් අධිකරණයට ඉදිරිපත් කිරීමට නියමිතව තිබුණි.
මධ්‍යම කොළඹ කොට්ඨාශ භාර ජෙෂ්ඨ පොලිස් අධිකාරි සුගත් ගලගමගේ මහතාගේ උපදෙස් පරිදි මරදාන පොලිසිය ස්ථානාධිපති ප්‍රධාන පොලිස් පරීක්ෂක කුමාර ඇපලතොටුව මහතා ඇතුළු නිලධාරීහු වැඩිදුර විමර්ශන සිදුකරති.
