(ඩයනා උදයංගනී)
ශ්‍රී ලංකා ශාසන ඉතිහාසයේ නව පරිච්ඡේදයක් සනිටුහන් කරමින් ශ්‍රී ලංකා අමරපුර සහ රාමඤ්ඤ යන මහා නිකායන් එක්කරන ‘ශ්‍රී ලංකා අමරපුර - රාමඤ්ඤ සාමග‍්‍රී මහා සංඝ සභාව’ සඳහා වන සම්මුතියට අත්සන් තැබීම කොළඹ 07, නිදහස් මාවතේ පිහිටි ශ්‍රී ලංකා පදනම් ආයතන ශ‍්‍රවණාගාරයේදී අද (16) පස්වරුවේ සිදුකෙරිණි.
ශ්‍රී ලංකා අමරපුර - රාමඤ්ඤ සාමග‍්‍රී මහා සංඝ සභාවේ සම සභාපතිවරුන් වන අග්ගමහා පණ්ඩිත කොටුගොඩ ධම්මාවාස ශ්‍රී ලංකා අමරපුර මහා නිකායේ උත්තරීතර මහ නා හිමියෝ සහ අග්ගමහා පණ්ඩිත නාපාන පෙමසිරි ශ්‍රී ලංකා රාමඤ්ඤ මහා නිකායේ මහ නා හිමියෝ එහිදී මේ සඳහා වන සාමග‍්‍රී සම්මුති පත‍්‍රයට අත්සන් තැබූහ.
බුරුම දේශයෙන් උපසම්පදාව රැගෙන විත් මෙරට ස්ථාපිත කෙරුණු ශ්‍රී ලංකා අමරපුර මහා නිකාය සහ රාමඤ්ඤ මහා නිකාය ඒකරාශී විය යුතු බවට වසර ගණනාවක් තිස්සේ කරන ලද සාකච්ඡාවල ප‍්‍රතිඵලයක් වශයෙන් මෙම සමඟි සම්මුතියට එළඹීමට සිදුකෙරිණි.
ඒ අනුව ඉදිරි රටේ ජාතික, ආගමික හා ශාසනික කටයුතුවලදී යේදී මෙම නිකායන් දෙක එක්ව ක‍්‍රියා කිරීමට නියමිතය.
එම නිකායන් නියෝජනය කරන අනු නා හිමිවරුන්, මහා සංඝරත්නය, කතානායක කරු ජයසූරිය, වැවිලි කර්මාන්ත අමාත්‍ය නවීන් දිසානායක, ජනමාධ්‍ය අමාත්‍ය සහ ආරක්‍ෂක රාජ්‍ය අමාත්‍ය රුවන් විජයවර්ධන, පාර්ලිමේන්තු මන්ත‍්‍රීවරුන් වන ලක්‍ෂ්මන් යාපා අබේවර්ධන, ලසන්ත අලගියවන්න යන මහත්වරුද මෙම අවස්ථාවට එක්ව සිටියහ.
(ඡායාරූප - ළහිරු හර්ෂණ)
