(නිමල කොඩිතුවක්කු)
ගෝඨාභය රාජපක්ෂත් රනිල් වික්‍රමසිංහත් ඒකාධිපති ආඥාදායකත්වයක් ගෙන ගිය විධායක ජනාධිපති ක්‍රමය අහෝසි කරන බව සමගි ජන සන්ධානයේ ජනාධිපති අපේක්ෂක විපක්ෂ නායක සජිත් ප්‍රේමදාස මහතා කොළඹදී පැවසීය.
ආණ්ඩුක්‍රම ව්‍යවස්ථාවට ගරු කර එහි ප්‍රතිපාදන පලුදු නොකරන පොදුජනවාදී ප්‍රජාතන්ත්‍රවාදී රාජ්‍ය පාලනයකට නායකත්වය ලබා දෙන බවත් විපක්ෂ නායකවරයා සඳහන් කළේය.
2019 ජනාධිපතිවරණයේ පසුබෑමෙන් පසුව දෙආකාරයක ආඥාදායක පාලන ක්‍රමවේදයකින් රටේ ප්‍රජාතන්ත්‍රවාදය විනාශ කරන්නට කටයුතු කළ බවත් ඔහු කීවේය.
කොළඹදී පැවති නීතිඥ සමුළුව අමතමින් සමගි ජන සන්ධානයේ ජනාධිපති අපේක්ෂක විපක්ෂ නායක සජිත් ප්‍රේමදාස මහතා මේ බව පැවසීය.
රට තුළ ඒකාධිපතීත්වය වපුරා, ජාතිවාදය ජාතිභේදය ආගම්වාදය රාජ්‍ය න්‍යාය පත්‍රයේ ඉහළම තලයට ගෙනවිත් රට විනාශ කළ බවත් විපක්ෂ නායකවරයා සඳහන් කළේය.
ත්‍රිපාර්ශ්වීය ප්‍රජාතන්ත්‍රවාදී ක්‍රමවේදය වන ව්‍යවස්ථාදායක විධායකය සහ අධිකරණයේ සංවරණ හා තුලන මෙන්ම බලය බෙදී ගිය වැඩපිළිවෙළ අමු අමුවේ උල්ලංගනය කර විධායකයේ ශක්තිය තර කරන ව්‍යායාමකට ගිය බවත් ප්‍රේමදාස මහතා පැවසීය.
එම දුර්දාන්ත පාලනය ප්‍රජාතන්ත්‍රවාදී අරගලයක් හරහා ඉවත් කළත් වර්තමානයේ ද අනුප්‍රාප්තික ජනාධිපතිවරයා හරහා නවතම ඒකාධිපති ආඥාදායකත්වයක් ඇති කර ඇති බවත් ඔහු සඳහන් කළේය.
විධායකය වටා බලය කේන්ද්‍ර කර ගෙන හිතුමතේ ආණ්ඩුක්‍රම ව්‍යවස්ථාවේ ප්‍රතිපාදන අමුඅමුවේ උල්ලංඝනය කර ඔවුන් කැමති පොලිස්පති පත් කරන්න ආණ්ඩුක්‍රම ව්‍යවස්ථාව පවා උල්ලංඝනය කරමින් කටයුතු කළ බවත් මේ වන විට එය ශ්‍රේෂ්ඨාධිකරණය අත්හිටවූ බවත් විපක්ෂ නායකවරයා පැවසීය.
අනුප්‍රාප්තික ජනාධිපතිවරයා මෙරට ජනතාවගේ සර්වජන ඡන්ද බලය උල්ලංඝනය කර පළාත් පාලන මැතිවරණය නොපැවැත්වීම තුළ ඔහු මූලික අයිතිවාසිකම් කඩ කරන්නෙක් බවට අධිකරණය ඒකමතිකව තීන්දුවක් දුන් බවත් ප්‍රේමදාස මහතා කීවේය.
මෙවැනි තත්ත්වයක් තුළ සමගි ජන බලවේගය විශ්වාස කරන්නේ රටක ව්‍යවස්ථාව පුද්ගල කේන්ද්‍රීයව නොව ප්‍රජාතන්ත්‍රවාදය නිදහස ජනතා අයිතිය හා ජාතික ආරක්ෂාව සුරක්ෂිත වන ආකාරයට සකස් විය යුතු බවත් විධායක ජනාධිපති ක්‍රමය අහෝසි කරන ව්‍යවස්ථාවකට නායකත්වය ලබා දෙන බවත් විපක්ෂ නායක සජිත් ප්‍රේමදාස මහතා පැවසීය.
ක්‍රමයේ වෙනසක් උදෙසා නීති ප්‍රතිසංස්කරණය කිරීම තමාගේ අරමුණ හා වැඩපිළිවෙළ බවත් ඔහු සඳහන් කළේය.
මුලික අයිතිවාසිකම් කොටස සිවිල් හා දේශපාලන අයිතිවාසිකම්වලට පමණක් සීමා නොකර ආර්ථික සමාජිය සංස්කෘතිය ආගමික ආදී අනෙකුත් අයිතිවාසිකම් දක්වා විහිදිය යුතු බවත් දූෂණ විරෝධී වැඩපිළිවෙළ ද ශක්තිමත් කළ යුතු බවත් විපක්ෂ නායකවරයා පැවසීය.
රට බංකොලොත් කළ අය අනාවරණය කිරීම මෙන්ම වී. එෆ්. එස්. ගනුදෙනුවද අනාවරණය කළේ සමගි ජන බලවේගය බවත් එම නිසා කුප්‍රකට දේශපාලන ගනුදෙනුවලට ඩීල්වලට ඉඩ නොතබන බවත් ප්‍රේමදාස මහතා කීවේය.
පසුගිය වසර 5කට ආසන්න කාලය තුළ අභියෝග රැසක් පැමිණියත් ප්‍රතිපත්ති ගරුකව ස්ථාවරව සිටි බවත් ඔහු පැවසීය.
මුදලින් මන්ත්‍රීවරුන් බා ගැනීමට කටයුතු නොකළ බවත් ඉදිරියටත් ඒ ප්‍රතිපත්තියේ ම සිටිමින් දුෂිත සංස්කෘතියට නැවතීමේ තිත තබන බවත් විපක්ෂ නායකවරයා සඳහන් කළේය.
තමාට හොරු සමග ඩීල් නොමැති නිසා එදා හොරු සමඟ එක්ව තනතුරු බාර ගැනීමට කැමැති නොවූ බවත් ඔහු කීවේය.
තමාට අගමැති වෙන්න 71 වතාවක් ආරාධනා කළ බවත් ගෝඨාභය රාජපක්ෂ පවා අගමැතිකම බාර ගන්න කතා කළත් ප්‍රතිපත්ති පාවා නොදුන් බවත් විපක්ෂ නායක සජිත් ප්‍රේමදාස මහතා සඳහන් කළේය.
වත්මන් ජනාධිපතිවරයා මෙන් තමන් හොරු සමඟ එකට වාසය නොකළ බවත් රට හොරා කෑ හොරුත් එක්ක දේශපාලන දීග කන්න තමාට ලැජ්ජා බවත් විපක්ෂ නායකවරයා පැවසීය. ව්‍යවස්ථාව තුළ ජනාධිපතිවරයාට විවිධ ක්ෂේත්‍ර යටතේ පත්වීම් කළ හැකි බලය ලැබෙන බවත් ඒවා ද තමා තනි මතයට කරන්න සූදානම් නොමැති බවත් ඔහු සඳහන් කළේය.
ඒ සඳහා පාර්ශ්වකරුවන්ගෙන් විවෘතව මත විමසා වඩාත් නිවැරදි ප්‍රශස්ත දේ කරන්න කටයුතු කරන බවත් ප්‍රේමදාස මහතා කීවේය.
රටේ පාලනය යනු සදාකාලික සින්නක්කරව ලියා දුන් දෙයක් නොව එය තාවකාලික බාරකාරත්වයක් බැවින් එය නිහතමානීව බාර ගෙන රට දැය දේශය වෙනුවෙන් කරන්නා වූ සෑම ගනුදෙනුවක් ම ජාතික අවශ්‍යතාව ගැන සිතා කටයුතු කරන බවත් විපක්ෂ නායක සජිත් ප්‍රේමදාස මහතා තවදුරටත් පැවසීය.
