(සුජිත් හේවාජුලිගේ )
නව ජනාධිපතිවරයා පාර්ලිමේන්තුව විසුරුවා හැරියහොත් මහ මැතිවරණය පැවැත්වීම සඳහා සූදානමින් සිටින්නැයි මැතිවරණ කොමිෂන් සභාව සියලුම දිස්ත්‍රික් තේරීම් භාර නිලධාරීන්ට දැනුම් දී ඇත.
ඒ සඳහා කඩිනමින් මුදල් සොයා ගැනීම කෙරෙහිද කොමිෂන් සභාවේ විශේෂ අවධානය යොමු වී ඇත.
නව ජනාධිපතිවරයා පත්වීමෙන් පසු පාර්ලිමේන්තුව විසුරුවා හැරීමේ වැඩි ඉඩකඩක් පවතින බව දේශපාලන විචාරකයෝ විශ්වාස කරති.
ජනාධිපතිවරණයෙන් පසු පාර්ලිමේන්තුව විසුරුවා හැරීම සම්බන්ධයෙන් ඒ ඒ දේශපාලන පක්ෂද පසුගිය දිනවල වෙන වෙනම සාකච්ඡා පවත්වා ඇතැයි දැනගන්නට ඇත.
මේ අතර ඉදිරි වසර දෙකේදී මැතිවරණ කොමිෂන් තවත් මැතිවරණ හතරකට සූදානම් වෙයි.
මහ මැතිවරණය,ඇල්පිටිය ප්‍රාදේශීය සභා මැතිවරණය, පළාත් පාලන මැතිවරණය සහ පළාත් සභා මැතිවරණය එම මැතිවරණ හතරයි.
පළාත් පාලන මැතිවරණයේ නාමයෝජනා අහෝසි කරන්නැයි දේශපාලන පක්ෂ ඇතුළු පාර්ශව ගණනාවක් දැනටමත් ඉල්ලීම් කර ඇත. මැතිවරණ කොමිෂන් සභාව ඒ සම්බන්ධයෙන් නීති අංශ සමඟ සාකච්ඡා කරමින් සිටින බව දැනගන්නට ඇත.
එම නාමයෝජනා අහෝසි කරන්නේ නම් පාර්ලිමේන්තුවෙන් නොපමාව යෝජනාවක් සම්මත කරගත යුතු බව මැතිවරණ කොමිෂන් සභාවේ සහ නීති විශාරදයන්ගේ මතයයි.
