(මුදිතා දයානන්ද)
ජනතා මතයට ගරු කරන කිසිවකුට අගමැතිට එරෙහි විශ්වාසභංගයට සහාය නොදී සිටිය නොහැකි බව පිවිතුරු හෙළ උරුමයේ නායක පාර්ලිමේන්තු මන්ත්‍රී උදය ගම්මන්පිල මහතා ඊයේ (05) පැවැසීය.
ගම්මන්පිල මහතා මෙසේ පැවැසුවේ පිටකෝට්ටේ පිහිටි පිවිතුරු හෙළ උරුමයේ ප්‍රධාන කාර්යාලයේදී පැවැති මාධ්‍ය සාකච්ඡාවකදී අදහස් දක්වමිනි.
එහිදී අදහස් දැක්වූ ගම්මන්පිල මහතා මෙසේ ද කීය.
“චෝදනා දාහතරක් යටතේ අගමැතිට එරෙහි විශ්වාසභංගය කථානායකවරයාට භාරදීමට සියල්ල සූදානම් කර තිබෙනවා. සමහරු කියනවා අගමැතිට නෙවෙයි ආණ්ඩුවට එරෙහිව ගේන්න කියලා. අගමැතිට එරෙහි වීම කියන්නේ ආණ්ඩුවට එරෙහි වීම වගේ තමයි. අගමැති ඉවත් වුණ ගමන් කැබිනට්ටුව වෙනස් වෙනවා. ඉන්පසු පාර්ලිමේන්තුවේ සිටින මන්ත්‍රීවරුන්ගෙන් වැඩිම විශ්වාසය දිනාගත් කෙනා අගමැති වෙයි. එහෙත් එයට හදිස්සි විය යුතු නැහැ. අපි අගමැති නම් කිරීමට විශ්වාසභංගයට සහාය ලබාදෙන්න බලාපොරොත්තුවෙන් ඉන්න අයට බලපෑමක් වෙන්නත් පුළුවන්. සහාය නොදී ඉන්න එයම හේතුවක් විය හැකියි.
අපි දැනට කරන ලද සාකච්ඡාවලදී එක්සත් ජාතික පක්ෂයේත් ශ්‍රී ලංකා නිදහස් පක්ෂයේත් සැලකිය යුතු පිරිසක් මේ විශ්වාසභංගයට සහාය දෙන්න සූදානම් බව ප්‍රකාශ කර තිබෙනවා. නමුත් ඒ අයගෙන් අපි විශ්වාසභංගයට අත්සන් බලාපොරොත්තු වෙන්නේ නැහැ. ඒක ඒ අයගේ ආරක්ෂාවට වගේම ඒ අයට කරන බලපෑම් නිසා අපිට ලැබෙන්න තිබෙන ඡන්ද අඩු කරගැනීමට හේතුවක් විය හැකියි. ඒ නිසා අපි ඒ ගැන දැන්ම හෙළි කරන්නේ නැහැ.
විශ්වාසභංගයට දෙමළ ජාතික සන්ධානයත් ජනතා විමුක්ති පෙරමුණත් සහාය ලබාදෙයි කියලා අපි හිතනවා. ජනතා මතයට ගරු කරන කිසිවකුට මේ විශ්වාසභංගයට සහාය නොදී ඉන්න බැහැ.
මෙහිදී අදහස් දැක්වූ පිවිතුරු හෙළ උරුමයේ නියෝජ්‍ය නායක මධුමාධව අරවින්ද මහතා මෙසේ පැවැසීය.
“අද මිනිසුන්ගේ හැමදේම දේශපාලනය බවට පත්වෙලා. කලාව, සාහිත්‍යය, ක්‍රීඩාව මේ කිසිම දෙයක් ගැන කිසිම කතාවක් නැතිව හැමෝම දේශපාලනය ගැන කතා කරන්න පටන් අරන්. කනගාටුවට කාරණය නම් දේශපාලනය නොකරන අය දේශපාලනය ගැන කතා කරද්දි දේශපාලනය කරන අය ඒ වෙනුවෙන් කිසිවක් නොකර සිටීම. ඔවුන්ට තමන් කරන්න ආ රාජකාරිය අමතක වෙලා වගේ.”
මාධ්‍යවේදීන් නැගූ ප්‍රශ්නවලට ගම්මන්පිල මහතා මෙසේ පිළිතුරු දුන්නේය.
ප්‍රශ්නය - වජිර අබේවර්ධන මහතා කියනවා අගමැතිට එරෙහිව විශ්වාසභංග ගේන්න බැහැ කියලා.
පිළිතුර - එතුමා බය ඇති අපි ගේන විශ්වාසභංගය කතා කරන්න ගන්නේවත් නැතිව අහක යයි ද කියලා. එහෙම වෙන්නේ නැහැ. කිසිම නීතිමය ප්‍රශ්නයක් ඇති නොවන යෝජනාවක් ඉදිරිපත් කරන බවට මම සහතික වෙනවා. ඒ ගැන කිසිම කෙනෙක් බිය විය යුතු නැහැ.
ප්‍රශ්නය - මේක ජයග්‍රහණය කරන්න පුළුවන් වෙයි ද?
පිළිතුර - මෙවර පළාත් පාලන මැතිවරණයේදී ජනතාවගෙන් තුනෙන් දෙකකට වැඩි පිරිසක් මේ ආණ්ඩුවට එරෙහිව ඡන්දය භාවිත කර තිබෙනවා. ඒ නිසා අඩුම තරමින් පාර්ලිමේන්තුවේ දෙකෙන් පංගුවක්වත් විශ්වාසභංගයට සහාය ලබාදෙන්න ඕන. එහෙම නැත්නම් අපිට හිතන්න වෙන්නේ පාර්ලිමේන්තුවේ දෙකෙන් පංගුවක්වත් ජනතා මතයට ගරු කරන්නේ නැහැ කියලයි.
ප්‍රශ්නය - විශ්වාසභංගයට ඇතුළත් කරුණු දාහතර මොනවා ද?
පිළිතුර - ඒක ළඟදීම බලාගන්න පුළුවන් වෙයි. අපි කරුණු දාසයකින් පටන් ගත්තේ විවිධ හේතු නිසා. දැන් තිබෙන්නේ කරුණු දාහතරයි. අනෙක් පක්ෂ සමඟ කතා කරන විට තවත් වෙනස්කම් වෙන්න පුළුවන්. ඒ නිසා කරුණු හැටියට මේවා කියලා කියන්න අමාරුයි. එහෙත් අපේ කේන්ද්‍රීය ප්‍රශ්නය වන්නේ මහ බැංකු බැඳුම්කර වංචාව හා පසුගිය වසර තුනක කාලය තුළ සිදුවූ ආර්ථික පරිහානියයි.
ප්‍රශ්නය - විශ්වාසභංගය ජය ගත්තොත් ඉන්පසුව පත් කරන අගමැති කවුද?
පිළිතුර - අගමැති පත් කරන්නේ ජනාධිපති. බහුතරයක් සිටින නොව පසුගිය කාලයේ සිදුවූ දේවල් අනුව බහුතරයකගේ විශ්වාසය දිනාගත් පුද්ගලයා යැයි ජනාධිපති විශ්වාස කරන කෙනා තමයි අගමැති වෙන්නේ. එතුමා කාව පත් කරයි ද කියලා කියන්න මට පරචිත්ත විජානනය නැහැ. අපිට දැන් අවශ්‍ය අගමැති ඉවත් කරන්න විතරයි. ඒක විතරමයි.
ප්‍රශ්නය - පළාත් පාලන මැතිවරණය පැවැත්වුවත් තවම ආයතනවල කටයුතු ආරම්භ කරන්න බැරි වෙලා. මොකක් ද මේ වෙන්නේ?
පිළිතුර - මේ ආණ්ඩුව වැඩ බැරි ආණ්ඩුවක් කියලා නැවත නැවතත් ඔප්පු කිරීම තමයි මෙයින් සිදුව තිබෙන්නේ. අඩුම තරමින් සමස්ත ඡන්ද ප්‍රතිඵලය ලබාදෙන්නවත් ආණ්ඩුව හා මැතිවරණ කොමිසම අසමත් වුණා. එක පැත්තකින් මැතිවරණ කොමිසමට දොස් කියන්න බැහැ. මේ පනතේ තිබෙන බහුබූත නිසා තමයි සභාපති මේ තත්ත්වයට පත්ව තිබෙන්නේ. මේ පනත අනුව බහුතරය දිනාගත් පක්ෂයට බලය පිහිටුවන්න බැහැ. බල්ලා විසින් වලිගය වනනවා වෙනුවට වලිගය විසින් බල්ලා නටවන තත්ත්වයක් දැන් ඇති වෙලා. වැඩිම මන්ත්‍රී ධුර දිනාගත් පක්ෂවලට සිදුවී තිබෙනවා අඩු මන්ත්‍රී ධුර ප්‍රමාණයක් දිනාගත් පක්ෂවල කොන්දේසිවලට යටත්ව ඔවුන්ගේ සහාය ලබාගෙන බලය පිහිටුවන්න.
ප්‍රශ්නය - මේක සිදුවන්නේ ඡන්දවලින් සියයට පනහට වඩා වැඩියෙන් දිනාගත් පක්ෂයට බලය පිහිටුවන්න පුළුවන් විදිහට පනත සකස් වීම නිසා නම් එය පාර්ලිමේන්තුවටත් අදාළයි නේද? එතනත් බහුතරය දිනාගන්න සුළු පක්ෂවල සහාය ලබාගන්න සිදුවී තිබෙනවා නේද?
පිළිතුර - ඔව්. එහෙත් එහි මේ ප්‍රශ්නය මේ තරම් බැරෑරුම් නොවන ආකාරයට කරුණු දෙකක් ඇතුළත් කර තිබෙනවා. පළමු කාරණාව තමයි මන්ත්‍රී ධුරයක් ලබන්න සුදුසුකම් ලබන්නේ සමස්ත ඡන්ද ප්‍රමාණයෙන් 5%කවත් ඡන්ද ප්‍රතිශතයක් ලබාගත් පක්ෂවලටයි. ඒ වගේම වැඩි ඡන්ද ලබා දිනූ පක්ෂයට බෝනස් මන්ත්‍රී ධුර හිමි වෙනවා. මගේ නම් අදහස මන්ත්‍රී ධුරයක් ලබාගන්න මූලික සුදුසුකම ලැබීම ප්‍රතිශතය සියයට දහය දක්වාවත් වැඩි කරනවා නම් මේ තත්ත්වය තවත් වෙනස් වෙනවා.
ප්‍රශ්නය - ඔබ තුමා ඔය යෝජනා කරන ක්‍රමවේදය නිසා සුළු පක්ෂවලට මහජන නියෝජිත ආයතනවලට එන්නම බැරි වෙනවා නේද? මෙයින් බල කෙරෙන්නේ ඔවුන්ටත් කවුරු හෝ පක්ෂයක් සමඟ සන්ධානගත වෙන්න ද?
පිළිතුර - රටේ සුළු පක්ෂවලටත් පරිපාලනයට සම්බන්ධ වෙන්න ඉඩකඩක් ලබාදිය යුතුයි. 2001 දී ජනතා විමුක්ති පෙරමුණ හදපු පරිවාස ආණ්ඩුවට කවුරුවත් දොසක් කියන්නේ නැහැ. ඔවුන් මේ ආයතන නියෝජනය කළ නිසා තමයි ඒ අවස්ථාව ප්‍රයෝජනයට අරන් රටට යම් යම් ජයග්‍රහණය අරන් දෙන්න පුළුවන් වුණේ. ඒ වගේම යුද්ධයේදිත් ආණ්ඩුවට වැඩිම සහාය ලබාදුන්නේ මේ වගේ සුළු පක්ෂ. ඒ නිසා ජයග්‍රාහී පක්ෂයට ලබාදෙන බෝනස් මන්ත්‍රී ධුර ප්‍රමාණය වැඩි කිරීමෙන් සුළු පක්ෂ කැපී යාමත් වළක්වාගෙන ස්ථාවර ආණ්ඩුවක් හදාගන්න ප්‍රශ්නය වඩාත් පහසුවෙන් විසඳගන්න පුළුවන්.
