දහනව වැනි ආණ්ඩුක්‍රම ව්‍යවස්ථා සංශෝධනය සම්බන්ධව දැනුමක් නැති පුද්ගලයන් එය සංශෝධනය කිරීම අපරාධයක් වශයෙන් දකින බව අධ්‍යාපන අමාත්‍ය මහාචාර්ය ඒ.එල්. පීරිස් මහතා ඉකුත් ද‌ා (31) මහනුවර දී පැවැසීය.
19 වැනි ආණ්ඩුක්‍රම ව්‍යවස්ථා සංශෝධනය මගින් රාජ්‍ය නායකයාගේ බලතල අහිමි කර තිබෙන බවද අමාත්‍යවරයා කීවේය.
‘‘ව්‍යවස්ථා සංශෝධනය කුමටද?’’ මැයෙන් මහනුවර වෘත්තීය වේදින්ගේ සංවිධානය ඉකුත්ද‌ා (31) සංවිධානය කර තිබූ සම්මන්ත්‍රණයකට එක්වෙමින් හෙතෙම මේ බව සඳහන් කළේය.
අධ්‍යාපන අමාත්‍යවරයා මෙසේද පැවැසීය.
රටේ ආරක්ෂාවට වගකිව යුතු ජනාධිපතිවරයාට ආරක්ෂාවට කැපවුණු ආරක්ෂක ඇමති පදවිය දරන්නට 19 වැනි සංශෝධනයෙන් ඉඩ තබා නැහැ.
ජනාධිපතිවරයාත් අගමැතිවරයාත් අතර පැවති බල අරගලය නිසා ජන ජීවිතය අනතුරුවලට පත්වුණු බව පාස්කු ත්‍රස්ත ප්‍රහාරයෙන් ඉතා මනාව ප්‍රදර්ශනය වූවා.
දහනව වැනි ව්‍යවස්ථා සංශෝධනයෙන් රටටත් ජනතාවටත් සිදුවන විපත අවබෝධ කරගත් ජනතාව මෙවර මැතිවරණයෙන් ශ්‍රී ලංකා පොදු ජන පෙරමුණට බලය ලබා දී ජනාධිපති ගෝඨාභය රාජපක්ෂ මහතා ශක්තිමත් කර තිබෙනවා. ජනතාව තුනෙන් දෙකටත් වැඩි බලයක් රජයට ලබා දුන්නේ 19 වැනි ව්‍යවස්ථා සංශෝධනය ඉවත් කිරීමට හා රටේ ආරක්ෂාවටත් ඉදිරිගමනටත් අවශ්‍ය ක්‍රියාමාර්ග ගැනීමට රජයට බලය ලබාදීමක් වශයෙනුයි.
රටේ ආරක්ෂාවට පමණක් නොව හදිසි අවස්ථාවකදි දින හතක් තුළ පනතක් පාර්ලිමේන්තුවට ඉදිරිපත් කිරීමේ අයිතිය පවා නැති කර තිබෙනවා. දින හතක් දින ද‌ාහතරක් බවට පත් කර හදිසි පනතක් ඉදිරිපත් කිරීමේ ක්‍රියාවට බාධා පමුණුවා තිබෙනවා.
බල කේන්ද්‍ර දෙකක් නිර්මාණය කිරීමෙන් රජයක් රටේ ආරක්ෂාව සඳහා ගත යුතු ක්‍රියාමාර්ගයන්ට බාධාවක් ඇතිකර තිබෙනවා. රාජ්‍ය නායකයා වූ ජනාධිපතිවරයා සතුව තිබුණු හා තිබිය යුතු බලතල අහෝසිකර බලකේන්ද්‍ර දෙකකට පත් කිරීම ඉතාම භයානක තත්ත්වයක්. මෙය වඩාත් භයානක වන්නේ ජනාධිපතිවරයාත් අගමැතිවරයාත් පක්ෂ දෙකකට අයත් වූ විටයි. පසුගිය කාලයේ සිදු වූ දේවල්වලින් මෙය ඉතා පැහැදිලිව දැක ගන්නට ලැබුණා.
රටේ නායකයා වූ ජනාධිපතිවරයා සතු වූ බලය ඉවත් කර 19 වැනි සංශෝධනයෙන් පොලිසියත් රාජ්‍ය සේවයත් පිළිබඳ බලය එන්.ජී.ඕ. හිතවතුන් ඇතුළු පිරිසකගෙන් යුත් මණ්ඩලයකට ලබාදුන්නා. රජයේ සේවකයන් සම්බන්ධයෙන්ද, පොලිස්පතිවරයා සම්බන්ධයෙන්ද පියවර ගැනීමට රටේ නායකයා වූ ජනාධිපතිවරයාට අයිතියක් නැහැ.
ජනාධිපතිවරයාට ඉහළින් බලය ලැබෙන එන්.ජී.ඕ (රාජ්‍ය නොවන) සංවිධානකාරයන්ගෙන් සමන්විත කොමිෂන් සභාවලට බලය ලබාදීම 19 වැනි සංශෝධනයෙන් සිදු වී තිබීම ඉතාම භයානක තත්ත්වයක්. මහාචාර්ය හූල් වැනි පුද්ගලයන් කටයුතු කරන ආකාරයෙන් මේ තත්ත්වය පැහැදිලි වෙනවා. රට ගැන හිතන ජනතාවගේ ආරක්ෂාව වෙනුවෙන් කැපවුණු ජනාධිපතිවරයෙකු පත්වීමෙන් ඉකුත් මාස කීපයක් තුළදී රටට සිදු වුණු සේවය දක්නට ලැබෙනවා.
කෝවිඩ් 19 න් ලෝකයේ රටවල් පීඩාවට පත්වී සිටින ආකාරය පැහැදිලියි. ජනාධිපති ගෝඨාභය රාජපක්ෂ මහතා ඇතුළු රජය ගත් ක්‍රියා මාර්ග නිසා ලංකාවේ සිදු වූ මරණ සංඛ්‍යාව 12 යි. මත්කුඩු ජාවාමුන්ද හා දූෂිතයන් අපරාධකරුවන්, පාතාලය මර්දනය වෙමින් පවතිනවා.
මෙම තත්ත්වයන් අවබෝධ කරගෙන රාජ්‍ය නායකයාට බලතල හිමිවන අයුරු ඇතුළුව රට යහ මගට ගැනීමට ශක්තිය ලැබෙන නව ව්‍යවස්ථාවක් සම්පාදනය වන තෙක් පවතින 19 වැනි සංශෝධනය ඉවත් කිරීමේ අවශ්‍යතාවය ජනතාව විසින් අවබෝධකර ගනු ලැබීම ඉතාම අවශ්‍ය බව මහාචාර්ය ජී.එල්. පීරිස් මහතා ප්‍රකාශ කළේය.
රාජකීය පණ්ඩිත නියංගොඩ ශ්‍රී විජිතසිරි මල්වතු පාර්ශවයේ අනුනාහිමියෝ මෙහිදී අනුශාසනාවක් කරමින් මෙසේ පැවැසූහ. 19 වැනි සංශෝධනය රටේ ස්ථාවර තත්ත්වයට විවිධ ආකාරයෙන් බලපෑම් සිදු වූ බව පසුගිය කාලයේදී පැහැදිලිව දැකගන්නට ලැබුණා. ජනාධිපතිවරයා සහ අගමැතිවරයා අතර බල අරගලය රටට අහිතකර වුණා.
අස්ගිරි පාර්ශවයේ මහා ලේඛකාධිකාරි ආචාර්ය මැදගම ශ්‍රී ධම්මානන්ද නාහිමියෝ අනුශාසනාවක් කරමින් මෙසේ පැවසූහ.
උඩරට ගිවිසුමේ පස්වැනි වගන්තිය ප්‍රකාරව බුදු දහමට වැදගත් ස්ථානයක් රටේ ව්‍යවස්ථාවෙන් තව දුරටත් ආරක්ෂාකර තිබෙන මේ රටේ ආණ්ඩුක්‍රම ව්‍යවස්ථාව හා එහි සංශෝධන ආදිය ද රටට ඉතා වැදගත් වූ වැදගත් වන්නා වූ විදේශ රටවල් සමග ඇතිකරගන්නා ගිවිසුම් ආදිය සම්බන්ධයෙන් රජය කටයුතු කරන අවස්ථාවන්හිදී ඒ පිළිබඳව අධ්‍යයනයක් කර මත පළ කිරීම සඳහා මහානායක ස්වාමින් වහන්සේලා ඇතුළු මහා සංඝයා වහන්සේලාගෙන් සමත්විත මණ්ඩලයක් පත්කළ යුතුයි. එවැනි මණ්ඩලයක් පත් කිරීමට අවකාශය රටේ ව්‍යවස්ථාවෙන්ම ඉඩකඩ සැලසිය යුතුයි.
පාර්ලිමේන්තු මන්ත්‍රී ගෙවිඳු කුමාරතුංග, පාර්ලිමේන්තු මන්ත්‍රී නීතිඥ උදයන කිරිඳිගොඩ (මහනුවර දිස්ත්‍රික්කය) සහ මහනුවර වෘත්තිය වේදින්ගේ සංගමයේ සභාපති නීතිඥ ජානක සකලසූරිය යන මහත්වරු ද මෙහිදී කතා කළහ.
ශ්‍රී ලංකා පොදුජන පෙරමුණට සම්බන්ධ වෘත්තියවේදිහු රැසක් හා පක්ෂ ක්‍රියාකාරිහු රැසක් මෙම රැස්වීමට සහභාගි වූහ.
(*** ජේ.ඒ.එල්. ජයසිංහ)
