(*** ඩයනා උදයංගනී)
ශ්‍රී ලංකාව කොරෝනා වයිරසය පාලනය සම්බන්ධයෙන් සාර්ථක මට්ටමකට පැමිණ තිබෙන්නේ වත්මන් රජය ක්‍රියාකළ ආකාරය නිසා යැයි කොළඹ නගරාධිපතිනි රෝසි සේනානායක මහත්මිය පෙරේදා (26) පැවසුවාය.
වැරදි දෙයක් වැරදියි කීමට මෙන්ම හොඳ දෙයක් හොඳයි කීමට තමන් පැකිළෙන්නේ නැතැයි ද ඇය සඳහන් කළාය.
කොළඹ නාගරික බලප්‍රදේශයෙන් මැයි මස පළමු වැනිදායින් පසු කිසිදු කොරෝනා ආසාදිත රෝගියෙකු හමුවී නැතත් තවමත් සියල්ල නිවැරදි වී නොමැති නිසා අත්‍යවශ්‍ය කටයුතුවලදී පමණක් කොළඹ නගරයට පැමිණෙන ලෙස සියලුම ජනතාවගෙන් ඉල්ලා සිටින බව ද ඇය කීවාය.
නගරාධිපතිනිය මේ බව පැවසුවේ කොළඹ මහ නගර සභා කමිටු ශාලාවේදී පෙරේදා (26) පැවති මාධ්‍ය හමුවක් අමතමිනි.
එහිදී අදහස් දැක්වූ සේනානායක මහත්මිය මෙසේ ද කීවාය.
“කොළඹ නගරය දින 66 කට පසු ජනතාව වෙනුවෙන් විවෘත වී තිබෙනවා. මේ වන විට රට පියවරෙන් පියවර ක්‍රියාත්මක කිරීමට හැකි මට්ටමකට පත් වෙලා. ඉතිහාසයේ වැඩිම කාලයක් අඛණ්ඩව ඇඳිරි නීතිය පැනවූ අවස්ථාවද මෙය වෙනවා. මෙයට ප්‍රධානම හේතුව ලෝකයටම බලපෑ මාරාන්තික කොරෝනා වයිරසයේ බලපෑමයි.
කොළඹ මහ නගර සභාව මගින් කොළඹ නගරයේ පමණක් පී.සී.ආර් පරීක්ෂණ 3353 කට වඩා සිදු කර තිබෙනවා. කොළඹ නාගරික බල ප්‍රදේශය තුළින් මැයි මස 01 වැනිදා රෝගියෙක් වාර්තා වූ පසු මේ දක්වා කිසිදු කොරෝනා රෝගියෙකු වාර්තා වී නැහැ. මේ සම්බන්ධයෙන් කොළඹ මහ නගර සභාවේ ප්‍රධාන සෞඛ්‍ය වෛද්‍ය නිලධාරි රුවන් විජේමුණි මහතා ඇතුළු සමස්ත නිලධාරීන්ට කෘතවේදීත්වය පළ කරනවා.
කොළඹ මහ නගර සභාව ඇඳිරි නීතිය පවතින විටත් ජනතාවට අත්‍යාවශ්‍ය සේවාවන් ලබා දීමට කටයුතු කළා. මේ ව්‍යසන තත්ත්වය හමුවේ පක්ෂ පාට භේදයකින් තොරව ජනතාවට පහසුකම් සැලසීමට සියලුම නාගරික මන්ත්‍රීවරුන් එකමුතු වුණා. ජන සෞඛ්‍ය දෙපාර්තමේන්තුවට අවශ්‍ය කරන මුඛ ආවරණ, ආරක්ෂිත ඇදුම් කට්ටල, සේදුම්කාරක ආදිය ලබා ගැනීමට අවශ්‍ය මුදල් වෙන්කර ගැනීමේදීත් ඔවුන් සහය දුන්නා.
ඒ වගේම අත්‍යාවශ්‍ය කටයුතුවලදී පමණක් කොළඹ නගරයට පැමිණෙන ලෙස මම සියලුම ජනතාවගෙන් මේ අවස්ථාවේදී ඉල්ලීමක් කරනවා. අපි මේ ව්‍යසනයෙන් රට මුදවා ගැනීමට රජයට සහයෝගය ලබා දිය යුතුයි. දින 66 කට පසු ඇඳිරි නීතිය ඉවත් කළත් හැමදෙයක්ම නිවැරදි වී නැහැ. අපි නිරන්තරයෙන් අපේ වගේම අනිත් අයගේ ආරක්ෂාව පිළිබඳවත් සැලකිලිමත් විය යුතුයි. රටේ ආර්ථිකය සංවර්ධනය සඳහාත් දායක විය යුතුයි. අද අපි කොරෝනා වෛරස තත්ත්වය හමුවේ සාර්ථක මට්ටමකට පැමිණ තිබෙන්නේ වත්මන් රජය ක්‍රියාකළ ආකාරය නිසයි. එය අගය කළ යුතුයි.
දැනට විවෘත කිරීමට අවසර තිබෙන්නේ කොළඹ නගරයේ සංචාරක මණ්ඩලයේ අනුමත ලියාපදිංචි හෝටල් සහ අවන්හල් පමණයි. ඒවායේ කටයුතු මහජන සෞඛ්‍ය පරීක්ෂකවරුන් විසින් නිරන්තරයෙන් පරීක්ෂා කෙරෙනවා. කොළඹ මහ නගර සභාවේ උපදෙස් මාලාවකට අනුව සංචාරක මණ්ඩලයේ අනුමත කර නොමැති සුළු හා මධ්‍ය පරිමාණ අවන්හල් ද විවෘත කිරීමට අවසර ලබාදීමට කටයුතු කරනවා.
කොළඹ මහජන පුස්තකාලයද පාඨකයින් සඳහා ජූනි මස 08 වන දින විවෘත කිරීමටත් අපි බලාපොරොත්තු වෙනවා. මෙතෙක් අපි කොළඹ බල ප්‍රදේශයේ ජීවත් වන දුගී දුප්පත් පවුල් 13,000 ක් සඳහා මහජන ආධාර මුදල් ලබා දුන්නා. ඉදිරියේදී එම පවුල් ප්‍රමාණය 14,500 ක් දක්වා වැඩි කරනවා. පවුල් 50,000 කට නගර සභාව හරහා සහල් කිලෝ 10 බැගින් ලබා දීමට මම ආණ්ඩුකාරතුමාගෙන් ඉල්ලීමක් කළා. එයට සුභවාදී පිළිතුරක් ලැබේ යැයි බලාපොරොත්තු වෙනවා. වරිපනම් සහ අනිකුත් සේවා සඳහා ගෙවීම් සිදුකිරීමට කොළඹ මහ නගර සභාව වෙත පැමිණෙන ජනතාවට ඒ ගෙවීම් කොළඹ දිස්ත්‍රික් කාර්යාල 06 හරහා සිදු කරගැනීමටත් පහසුකම් ලබාදෙනවා. එමෙන්ම කොළඹ නගරයේ විශේෂිත බස්රථ සේවාවක් ක්‍රියාත්මක කිරීමටත් කටයුතු කරනවා.
කොරෝනා වයිරසය නිසා දෛනික ආදායම් අහිමි වූ පවුල්වලට රජයෙන් ගෙවූ රුපියල් 5,000 දීමනාව කොළඹ නගරයේ අඩු ආදායම් ලාභීන් දෙවනි වරටත් දෙන්නැයි මම ජනාධිපතිතුමාගෙන් ඉල්ලා සිටිනවා. ඔවුන්ට ලැබුණු සහන ප්‍රමාණවත් නැහැ. නගරයේ සියයට 60 ක් වන අඩු ආදායම්ලාභි පැල්පත්වාසීන් බොහෝ අසරණ වී සිටිනවා.
“ඔබතුමිය මේ ආණුඩුවට කඩේ යනවා කියා චෝදනා එල්ල වෙනවා නේද?” යනුවෙන් මාධ්‍යවේදියකු නැගූ පැනයකට පිළිතුරු දුන් නගරාධිපතිනිය මෙසේ කීවාය. “මට ගැහැනියක් හැටියට කොන්දක් තියෙනවා. මම බෙදුම්වාදී දේශපාලනය නොව සම්මුතිවාදී දේශපාලනය කරා යන කෙනෙක්. වැරදි දෙයක් වැරදියි කියන්නත් හොඳ දෙයක් හොදයි කියන්නත් මම පැකිළෙන්නේ නැහැ.
