ඡන්දෙ, කට මුලටම ඇවිත්. ඊළඟ අවුරුදු කීපයක් රට කරන නායකය තමයි දැන් තෝරගන්න තියෙන්නෙ. 

කොහොමද සූදානම?

 

ඡන්දෙ තියනවද නැද්ද, කල් දානවද  නැද්ද, ජනමත විචාරණ කතා, තුනෙන් දෙකේ කතා, මහ මැතිවරණය කලින් පවත්වන කතා එකක්වත් අපි ලොකුවට ගත්තෙ නෑ. අපි දිගටම ජනාධිපතිවරණය වෙනුවෙන් වැඩ කටයුතු කරගෙන ආවා. පළාත් පාලන ඡන්දෙ කල් දැම්මට පස්සෙ, ගෙවුණු අවුරුදු එකහමාරක විතර කාලය තුළ ගම් මට්ටමේ බිම් මට්ටමේ මගඇරිල තිබුණු සංවිධාන කටයුතු කරගෙන ආවා. ඇත්තටම අපිට පුළුවන් වුණා, ගම දක්වා දිවෙන ශක්තිමත් සංවිධාන ජාලයක් ගොඩනගන්න. නායකත්වයන් ගොඩනගන්න.

අපි දැන් කැන්වසින් ව්‍යාපාර කරගෙන යනව ජනාධිපතිවරණය ඉලක්ක කරගෙන. කුඩා ජනහමු වගේම ජාතික මට්ටමේ රැස්වීම් කරනව. ජාත්‍යන්තර ප්‍රජාව හමුවෙලා එයාලව ආමන්ත්‍රණය කරනව. විවිධ කණ්ඩායම් අපි එක්ක එකතු වෙමින් තියෙනව. ජනාධිපතිවරණයේ ජයග්‍රහණය පිළිබඳව අපිට ලොකු 

විශ්වාසයක් තියෙනව.

මාලිමාවට එරෙහි කඳවුරත් දවසින් දවස ශක්තිමත් වෙනව. වෙන වෙනම ඉන්නව වගේ පෙන්නන අය එකට එකතු වෙනව වගෙත් පේනව. ලේසි නෑ වැඩේ.

මෙච්චර කල්, අවුරුදු හැත්තෑවකට වැඩි කාලයක් රට පාලනය කරපු දේශපාලන පක්ෂ එක්ක ජනතාවගේ තිබුණ ඇයිහොඳයිය ටික ටික ගිලිහෙමින් යනව. ඒව ගැන තිබුණු ජනතා විශ්වාසය බිඳිල තියෙන්නෙ. 2022 ට පස්සෙ ඒ පක්ෂ එක්ක තිබුණ ජනතා සම්මුතීන් බිඳවැටුණ. ඒකට ගෝඨාභය රාජපක්ෂ වගේ අයගෙ භූමිකාවත් තීරණාත්මකව බලපෑව.  දැන් මිනිස්සු අලුත් දේශපාලනයක් 

බලාපොරොත්තු වෙනව. 

 

ඒ ජනතාව ඇවිත් මාලිමාව තමන්ගෙ කරගත්තා.දේශපාලනයේ ඔය උඩ ස්ථරය මොන සාකච්ඡා පවත්වමින් මොන සංධාන හදමින් ආවත් පල්ලෙහා ස්තරය තීරණය කරල ඉවරයි මාලිමාවට බලය දෙන්න ඕනෑ කියල. අපිට විරුද්ධව කඳවුරු සියල්ලම එකට එකතු වුණත්, ඒක අපට මේ වෙලාවෙ අභියෝගයක් නෙවෙයි. අපි ජයග්‍රහණය කරන තත්ත්වය තහවුරු වෙලා තියෙන නිසා දෙමළ දේශපාලන පක්ෂ, මුස්ලිම් දේශපාලන පක්ෂ, කඳුකරයේ දේශපාලන පක්ෂ ඇතුළු විවිධ පක්ෂ සහ කණ්ඩායම් අපත් එක්ක එකතුවෙමින් තියෙනව. ඒක හැමදාම තිබුණ දේශපාලන ප්‍රවණතාවක්. ජයග්‍රහණය පැහැදිලි පාර්ශ්වය වටා විවිධ කොටස් එකතුවීම සාමාන්‍ය දේශපාලන ලක්ෂණයක්.

 

මේ වගේ තීරණාත්මක ඡන්දෙකදි අවසාන මොහොතේ විශාල පෙරළි සිද්ධවෙන්න පුළුවන්. නොසිතූ දේවල් වෙන්න පුළුවන්. නොයෙක් වංගු ගැහිලි වෙන්න පුළුවන්. ජයග්‍රහණය ගැන අධිතක්සේරුවක ඉඳල බොරු වළවල්වල වැටෙන්නත් පුළුවන් නේද?

අපි දේශපාලන බබ්බු නෙවෙයි. අපි දැන් කාලයක් තිස්සෙම මේ රටේ දේශපාලනය කරල හොඳට පදම් වෙලා තියෙන්නෙ. අපිට දොරේ සද්දෙයි බෙරේ සද්දෙයි හොඳට කියන්න පුළුවන්. එහෙම බැරි දේශපාලන ළදරුවො නෙවෙයි අපි.

 

 

අපි, උඩ දේශපාලන වැඩකරන හැටිත් දන්නව බිම දේශපාලන වැඩකරන හැටිත් දන්නව. අපි හොඳ දේශපාලන නාඩියකින් වැඩ කරන ව්‍යාපාරයක්.

ඒ කියන්නෙ අනුර කුමාර ඊළඟ ජනාධිපති කියන එක “වැඩේ ෂුවර් - බඩේ බත් වගේ” මට්ටමේ ද තියෙන්නෙ?

ඉස්සර කිව්වෙ බිම ජනතා විමුක්ති පෙරමුණට නෑ කියල. ගම ජනතා විමුක්ති පෙරමුණට නෑ කියල. දැන් බිමත් අපට ඉන්නව උඩත් අපට ඉන්නව. ගමත් අපට ඉන්නව. නගරෙත් අපට ඉන්නව. මාලිමාව වටා ජනතාව එකතු වුණෙ රැල්ලකට නෙවෙයි. අනුර කුමාර දිසානායක වටා ජනතාව එකතුවුණේ රැල්ලට නෙවෙයි. ඒ එකතු වුණේ විශ්වාසය මත. රැල්ලට එන අය ඡන්දෙ කිට්ටුව වෙනස් 

වෙන්නත් පුළුවන්.

 

මේ වෙලාවෙ මාලිමාව තෝරගැනීම ජනතාවගේ අවබෝධය මත සිද්ධවෙන දෙයක්. ඒක නිසා ඉතිහාසයේ  වගේ මේ වතාවෙ ජනතාව එහාට මෙහාට පනින්නෙ නෑ. දේශපාලකයො නම් ඉදිරියෙදි එහාට මෙහාට පනියි. දැන් මාලිමාව කියන්නෙ වෙන දෙයක් නෙවෙයි ජනතාවම තමයි. ජනතාව කියන්නේ මාලිමාව තමයි. මේක වෙනස් තත්ත්වයක්. රටක මෙවැනි තත්ත්වයක් ඇතිවෙන්නෙ සමහරවිට දශක ගානකින්. ඉතිං මේ වගේ තත්ත්වයක් ප්‍රතිගාමී බලවේග සසල කරන්න සමත් වෙනව තමයි. මාලිමාවේ ජයග්‍රහණය අනුර කුමාරගෙ ජයග්‍රහණය නොවැළැක්විය හැක්කක්.

 

හැබැයි, ලොහාන් රත්වත්තෙල වගේ උදවිය නම් කියන්නෙ එයාල මැරෙනකම් අනුරලට දිනන්න දෙන්නෙ නෑ, වගේ කතන්දර. බය නැද්ද මේවට?

 

කතාවක් තියෙන වනෙ පිස්සො කලබල වුණාට දොස්තරල කලබල වෙන්නෙ නෑ කියල. ඉතිං එක එක පිස්සො එක එක කතා කියයි. අපි ඕව පස්සෙ එළවන්න ඕනැ නෑ. අපි ලොහාන්ට අනුකම්පා කරනව. මොකක් හරි අවුලක් තියෙනවනම් වෙලාවට ප්‍රතිකාර ගන්න කියල තමයි එයාලට කියන්න තියෙන්නෙ. මේ වගේ අයට ඇමතිකම් දීල හුරතල් කර කර තමයි රනිල් වික්‍රමසිංහ ඊළඟ පාරත් ජනාධිපති වෙන්න හදන්නේ. රටේ ජනතාව මේ තත්ත්වය අවබෝධ කරගන්න කියල තමයි අපි මතක්  කරන්නේ.

 

ඔබ ලොහාන්ට නුවරදිම උත්තර දෙමින් කිව්ව ඉක්මනට මැරෙන්න එපා, මාලිමාව රට හදන හැටි බලලම මැරෙන්න කියල. බලය ගත්ත වගේ නෙවෙයි රට 

හදනන පුළුවන් ද?

 

අපි අපේ, රට හදන වැඩපිළිවෙළ රටට ඉදිරිපත් කරල තියෙනව. අපිට ප්‍රායෝගික සැලසුම් තියෙනව මේ රට සංවර්ධනය කරන්න. අපි එක්ක ඒ සඳහා ප්‍රාමාණික මිනිස්සු ටිකක් ඉන්නව. අපිට කැබිනට් එකට දාගන්න කවුද ඉන්නෙ කියල අහන්නෙ අවුරුදු හැත්තෑවක් රට උලා කාපු සෙට් එක. හොරකම්වලට දූෂණවලට නඩු පිට නඩු වැටිච්ච සෙට් එක.පහුගිය කාලෙ කැබිනට් එකේ රජකරගෙන ඉඳපු සමහරු හොරකම්වලට අද ඉන්නෙ හිරේ. එළියෙ හිටියට මේ සෙට් එකෙන් ගොඩක් අය ඉන්න ඕනැ හිරේ තමයි. එහෙම උන් අපෙන් අහනව කවුද කැබිනට් එකට දාන්නෙ කියල. අපි කයිවාරු ගහන්නෙ නෑ. වැඩ කරල පෙන්නන්නම්. අපේ වැඩපිළිවෙළ රට හදන්න පුළුවන් එකක් කියල අපිට තහවුරුයි. ඒක ජනතාවටත් තහවුරු වෙන දවස වැඩි ඈතක නෑ. අපි මේ වෙලාවෙ වෙනස් කරන්නේ පුද්ගලයෙක් නෙවෙයි ක්‍රමයක්. අපි මේ වෙනස් කරන්න සූදානම් වෙන්නෙ දේශපාලන සංස්කෘතියක්. මේ  දේශපාලන පෙරළියෙ කොටස්කරුවො වෙන්න කියල අපි මේ ජනතාවට කියන්න කැමතියි

සාකච්ඡා සටහන | 

ප්‍රියන්ත කොඩිප්පිලි

 

ජනාධිපතිවරණ උණුසුම රළ නඟමින් තිබේ. කුමක් වෙයිද? මේ ඒ ගැන විමසමින් සමගි ජන බලවේගයේ ගම්පහ දිස්ත්‍රික් පාර්ලිමේන්තු මන්ත්‍රී හර්ෂණ රාජකරුණා මහතා සමග 
කළ සාකච්ඡාවකි.

ජනාධිපතිවරණය ගැන දැන් තියෙන තක්සේරුව?

ජනාධිපතිවරණය සජිත් ප්‍රේමදාස මැතිතුමා අනිවාර්යයෙන්ම ජයග්‍රහණය කරනවා. ඒ ජයග්‍රහණය කාටවත් වළක්වන්න බෑ.

ජයග්‍රහණය කරන්න ජනාධිපතිවරණය පැවැත්විය යුතුයි. සමහරු කියනව පළාත් පාලන ඡන්දය වගේ ජනාධිපතිවරණයත් අතුරුදන් 
වෙයි කියලා?
මේ වෙනකොට එහෙම උත්සාහයක ඉන්න බව අපට බොහොම පැහැදිළිව පේන්න තියෙනවා. මේ වෙනකොට අධිකරණය තුළත් පාර්ලිමේන්තුව තුළත් එහෙම වංගුවක් ගහන්න උත්සාහ කරන බව අපට පේනවා. ඒක ඉතාම පැහැදිලියි.

ඒක එහෙම නම් සජබෙ මොකද කරන්නේ?

ඔව්! ඔය මොන උත්සාහය ගත්තත් අපිට ඒක වළක්වන්න පුළුවන්. රනිල් රාජපක්ෂ ආණ්ඩුවේ ප්‍රජාතන්ත්‍ර විරෝධී, නීති විරෝධී, සදාචාර විරෝධී ඕනෑම ක්‍රියා මාර්ගයකට මුහුණදීලා රටේ ප්‍රජාතන්ත්‍රවාදය ජයග්‍රහණය කරන්න සමගි ජන බලවේගය හැටියට අපි නායකත්වය අරගෙන කටයුතු කරනවා විතරක් නොවෙයි අනිවාර්යයෙන්ම ජනාධිපතිවරණය ගන්නවා. ඒ වගේම සජිත් ප්‍රේමදාස මැතිතුමා ජයග්‍රහණය කරනවා.

22 වැනි ආණ්ඩුක්‍රම ව්‍යවස්ථා සංශෝධනයට කැබිනට් අනුමැතිය ලැබිලා. ඒ පැත්තෙන් ආණ්ඩුව වේගයෙන් ඉදිරියට ඇවිත් තියෙනවා?
ඔව්. ඉතා පැහැදිළිව ඒ පැත්තෙන් වේගවත්. නමුත් 22 වැනි සංශෝධනයට පාර්ලිමේන්තුව තුළ තුනෙන් දෙක ලබා දෙන්න අපි කටයුතු කරන්නේ නෑ.

ජයග්‍රහණය කරන්න නම් සමගිය අවශ්‍යයි. නමුත් සමගි ජන බලවේගය තුළ නැත්තෙත් සමගියයි?

නෑ. එහෙම එකක් නෑ. සමගි ජන බලවේගය තුළ ඉතා හොඳ සමගියක් තියෙනවා. ඔය ඔබ කියන විදියේ කිසිම ප්‍රශ්නයක් අපේ පක්ෂය තුළ නෑ. අනික දැන් ඔක්කොම ශුද්ධ වෙලා තියෙන්නේ. දැන් අපි 
ඇත්තටම ශක්තිමත්?
ඔබේ පක්ෂයේ සභාපති කවුද? සරත් ෆොන්සේකා සජිත් ප්‍රේමදාසටයි අනිකුත් නායකයන්ටයි හතර අතේ නෙළනවා?

ඒකයි මම කිව්වේ දැන් ඔක්කොම ශුද්ධ වෙලා තියෙන්නේ කියලා. කුණු රොඩු ඔක්කොම අයින් කරලා අයින් වෙලා තියෙන්නෙ.
ඒ කියන්නේ සරත් ෆොන්සේකා සජබ සභාපති ධුරයෙන් පැන්නුවා?

නෑ. එතුමා සමගි ජන බලවේගයේ හිටියට සභාපති ධුරයේ නාමිකව හිටියෙ. එතුමා පක්ෂයේ කිසිම වැඩ කටයුත්තකට සහභාගි වෙන්නේ නෑ.
කළුතර දිස්ත්‍රික්කයේ රැස්වීම්වලට මන්ත්‍රී රාජිත සේනාරත්නට එන්න දෙන්නෙ නෑ. මෙහෙමද ඉස්සරහට යන්න හදන්නේ?

රාජිත සේනාරත්න මැතිතුමා පක්ෂයේ වැඩ කටයුතුවලට සම්බන්ධ වෙනවා. එතැන තියෙන්නේ දිස්ත්‍රික්කයේ ප්‍රශ්නයක්. එහෙම නැතිව වෙන දෙයක් නොවෙයි.
සජබ සමග ඉන්න සුළු ජාතික පක්ෂ ජනාධිපතිවරණයේදී රනිල් වික්‍රමසිංහට සහාය දේවි කියලත් කියනවා?
නෑ. එහෙම වෙන්නේ නෑ. ඉතා පැහැදිළිව ඔවුන් සමගි ජන බලවේගය තුළ ශක්තිමත්ව ඉන්නවා. ඉදිරියේදී ඔබට දැකගන්න ලැබේවි. අපේ සන්ධානය ශක්තිමත් කරන තවත් බලවේග එකතු වෙන හැටි.
පොහොට්ටුවේ සහාය ලැබුණොත්, සමගි ජන බලවේගයෙන් පළුවක් ගලවලා ගන්න සමත් වුණොත්, ඒක රනිල් වික්‍රමසිංහට වාසියි නේද?
“වුණොත්” කියලා අප හුඟක් දේවල් උපකල්පනය කරන්න පුළුවන්. නමුත් ඒවා වෙන්නේ නෑනේ. ඉතා පැහැදිළිවම පොහොට්ටුවෙන් අපේක්ෂකයෙක් ඉදිරිපත් වෙනවා. පොහොට්ටුව දෙකට කැඩෙනවා. රනිල් වික්‍රමසිංහ මැතිතුමා සමග එක්වෙන්න කිසිම කෙනෙක් සමගි ජනබලවේගය තුළ ඇත්තෙත් නෑ. අපි තව තවත් ශක්තිමත්ව ඉදිරියට යනවා.
ඒ කියන්නේ සජිත් ප්‍රේමදාස ජයග්‍රහණය සම්බන්ධයෙන් ඔබ ඉන්නේ ඒකාන්ත විශ්වාසයෙන්?
ඔව්! අනිවාර්යයෙන්ම. මේ රනිල් වික්‍රමසිංහ මැතිතුමාගේ අවසාන පොහොය කිහිපය. ඒක 
මතක තියාගන්න.
සාකච්ඡා සටහන | 
ප්‍රසන්න සංජීව තෙන්නකෝන්