ශ්‍රී ලංකාවේ අටවැනි ජනාධිපතිවරණය පැවැත්වීම පිළිබඳ නිල නිවේදනය මැතිවරණ කොමිසම මගින් නිකුත් කර ගැසට් පත්‍රය මගින් නිවේදනය කර ඇත. මීට දෙදිනකට පෙර නිකුත් කෙරුණු එම නිවේදනය නිසා මාස ගණනාවක් පුරා ජනතාව අතර පැතිර තිබුණු කට කථා හා නොයෙක් සැක සංකා හා දැනගෙනම පතුරුවනු ලබන වැරදි තොරතුරුද යම් පමණකට නිමාවකට පත්ව ඇති ආකාරයක් දක්නට ලැබේ. මෙයට පෙර ජනාධිපතිවරණ හතකට මුහුණ දී අත්දැකීම් සහිතව සිටින ශ්‍රී ලංකා වාසී ජනතාව දේශපාලකයන් විසින් නොයෙක් ආකාරයෙන් හුවා දක්වන ලද බොළඳ කතා පිළිබඳව උපේක්ෂාවෙන් යුතුව බලා සිටියා විනා සමහරුන් කියන පරිදි ඇන්දුණේ නැත. කියන්නා කෙසේ කීවත් අසන්නා සිහිබුද්ධියෙන් ඇසිය යුතු බව ජනතාව දනිති.

මෙම යුගයේ එල්.ටී.ටී.ඊ. බෙදුම්වාදී සටනේ උග්‍ර අවස්ථාවට පැමිණ තිබුණු අතර ඔවුන්ගේ සාහසික ක්‍රියා හමුවේ ජනාධිපතිවරණයේ කටයුතුවලට ද බලපෑම් එල්ල විය. කොළඹ නගර ශාලා බිමේදී චන්ද්‍රිකා බණ්ඩාරනායක මහත්මියගේ අවසාන රැලියට එල්ල වූ මරාගෙන මැරෙන බෝම්බ ප්‍රහාරයෙන් ඇය තුවාල ලැබුවාය. එදිනම රාත්‍රී ජාඇල නගරයේ පැවැති එ.ජා.ප. ප්‍රචාරක රැස්වීමටද කොටි බෝම්බ ප්‍රහාරයක් එල්ල වූ අතර ජෙනරාල් ලකී අල්ගම මහතා ඇතුළු පිරිසක් මරණයට පත්වූහ.

එවකට රටේ පැවැති බරපතළම ප්‍රශ්නය වූයේ දිගින් දිගටම දිග ඇදී යන යුද්ධයයි. එයට නිමාවක් ලබාදීමට තිස් වසරක් තිස්සේ කිසිදු පාලනයකට හැකි නොවීය. සියලු පියවරවලින් සාර්ථකව එල්.ටී.ටී.ඊ. ය මාවිල්ආරු සොරොව්ව වසා දැමීමෙන් නැගෙනහිර පළාතේ ජනයාගේ බීමට සහ අනෙකුත් අවශ්‍යතා සඳහා ජලය සපයා ගැනීමට අවහිර කිරීම නිසා කෝපයට පත් මහින්ද රාජපක්ෂ ජනාධිපතිවරයා සහ එම රජය ප්‍රතිචාර දැක්වූවේ ත්‍රස්තවාදය මෙරටින් අතුගා දැමීමේ යුද්ධය ආරම්භ කිරීමෙනි. එය ජයග්‍රාහීව නිමාවූවේ උතුරේ නන්දිකඩාල් කළපුවේ දී ප්‍රභාකරන් ඇතුළු ඝාතකයන් මුළුමනින්ම වනසා දැමීමෙනි. එවකට ආරක්ෂක ලේකම් ගෝඨාභය රාජපක්ෂ මහතා ද මෙම ජයග්‍රාහී යුද්ධයට විශාල දායකත්වයක් පිරිනමා තිබුණි. ඒ නිසා එම රජය කෙරෙහි විශාල ජන ප්‍රසාදයක් හිමිවීම නොවැළැක්විය හැකි විය.

මෙවර මැතිවරණයට ජනාධිපති ධුරාපේක්ෂකයන් තවම නාමයෝජනා භාර දී නැත. එය සිදුවන්නේ ඉදිරි සැප්තැම්බර් 21 වැනිදාය. කොතෙක් අර්බුද මැද වුවද ශ්‍රී ලංකාවාසී ජනතාව නව ජනාධිපතිවරයෙකු පත්කර ගනු ඇත.