ඔස්ට්‍රේලියානු ජාතිකයකුගේ අත්සන ව්‍යාජ ලෙස යොදා සකස් කළ බව කියන ඇටෝර්නි බලපත්‍රයක් මගින් ඔහුට අයත් සමාගමක කොටස් විකුණා රුපියල් මිලියන ගණනක මුදලක් වංචා කිරීම හා සාපරාධී සාවද්‍යව පරිහරණය කළ බවට චෝදනා ලැබ සිටි පිවිතුරු හෙළ උරුමයේ නායක, හිටපු පාර්ලිමේන්තු මන්ත්‍රී නීතිඥ උදය ගම්මන්පිල ඇතුළු දෙදෙනා, සියලු චෝදනාවලින් කොළඹ මහාධිකරණ විනිසුරු ආචාර්ය නාමල් බණ්ඩාර බලල්ලේ විසින් නිදොස් කොට නිදහස් කරනු ලැබිණ.
මේ එම නඩු තීන්දුවෙන් පසු උදය ගම්මන්පිල සමග කළ සාකච්ඡාවක්.
ප්‍ර මේ දවස්වල ඔබ බොහොම සතුටෙන් ඉන්නවා වගෙයි පේන්නේ?
මම කවදත් සැහැල්ලුවෙන් සිනහා මුසුව කාලය ගත කරන කෙනෙක්.
ප්‍ර ඔස්ට්‍රේලියානුවාගේ වංචා නඩුවෙන් ඔබ නිදොස් කොට නිදහස් වුණා?
ඇත්තෙන්ම ඔබ දකින්න ඇති නඩු තීන්දුව බාරගන්න මම ගිය හැටි. හැම රූපවාහිනී නාළිකාවකින්ම ඒක විකාශය කළා. මම නඩු තීන්දුව බාර ගන්න ගියේ සිනාමුසු මුහුණෙන්. මොකද මට ලොකු විශ්වාසයක් තිබුණා මේ නඩුවෙන් මම නිදොස්කොට නිදහස් කරනවා කියලා.
ප්‍ර ඒතරම්ම විශ්වාසයක් ?
ඔව්. මේ නඩුවේ ප්‍රධාන සාක්ෂිකාරයා වුණු බ්‍රෑඩ් සැඩික් තමන් කූඨ ලේඛනයක් යැයි චෝදනා කරපු ඇටෝර්නි බලපත්‍රයේ තමන්ගේ බිරිඳගේ අත්සන හඳුනා ගත්තා. සාක්ෂිකාරියක් ලෙස අත්සන් කළ ඔහුගේ ලේකම්වරියගේ අත්සන හඳුනාගත්තා. ඒ විතරක් නොවෙයි. මේ උසාවියේ දී බ්‍රෑඩ් සැඩික් පිළිගත්තා තමන් ඕස්ට්‍රේලියාවේ බංකොළොත් වී සිටින පුද්ගලයකු බව. ඕස්ට්‍රේලියානු අධිකරණයේ බොරු සාක්ෂි දී වැරැදිකරුවකු වූ බව. ඔහුගේ විශ්වාසනීයත්වය ඔහු නැති කරගත්තා. ඒ වගේම ඔහු මුදලට විකිණෙන පුද්ගලයෙකු බව තහවුරු වෙන ආකාරයට ඇති ඔහුගේ පසුබිම ඔහු පිළිගත්තා. ඒ නිසා මේ නඩුවේ ජයග්‍රහණය පිළිබඳව මට ඒකාන්ත විශ්වාසයක් තිබුණා.
ඒ වගේමයි. ආණ්ඩුවෙ හැදුවෙ මේ නඩුව පාවිච්චි කරමින් මාව බිඳවට්ටන්න.
ප්‍ර ඔබ පාර්ලිමේන්තුවෙත් නැහැනේ.?
ඒ වුණාට මම පැත්ත නොබලා වැරැදි දෙයට වැරැදියි කියන මිනිහෙක්. මම චන්ද්‍රිකා, රනිල්, සිරිසේන, අනුර කුමාරගේ ආණ්ඩු විතරක් නොවෙයි, මගේම ජනාධිපතිවරුන් වූ මහින්ද රාජපක්ෂ, ගෝඨාභය රාජපක්ෂ ආණ්ඩුත් දැඩිව විවේචනය කරපු කෙනෙක්. මම බැලුවේ පැත්ත නොවෙයි. හරි වැරැද්ද මොකක්ද කියන එක ගැන විතරයි බැලුවේ. ඒ නිසා මගෙ කට වහන්නයි මේ බොරු නඩුව පැටලුවේ. සත්‍ය කවදා හෝ ජය ගනී කියනවනේ. ඒක ඒ විදියටම වුණා.
ප්‍ර ඔබ දවස් 13 ක් රිමාන්ඩ් බන්ධනාගාරයෙත් හිටියා?
ඔව්. දින 13 ක් රක්ෂිත බන්ධනාගාරයේ හිටියා. ඒක අන් අයට සාපේක්ෂව ඉතා කෙටි කාලයක් මා මිත්‍ර විමල් වීරවංශ මැතිතුමා දින 93 ක් රක්ෂිත බන්ධනාගාරගතව හිටියා. නමුත් ඒ දින 13 අපායේ ගත කළා හා සමානයි.
ප්‍ර ඇයි එහෙම කියන්නේ?
නිදාගන්න වෙන්නේ බිම. වැසිකිළි පහසුකම් ඇත්තේම නැති තරම්. ඒ වගේම අතිශයින්ම දුක් වින්ද දින 13 ක්. ලෝකයේ අන් රටවල නම් රිමාන්ඩ් බන්ධනාගාරය සාමාන්‍ය ජීවිතයකට ලැබෙන බෝඩිමක් හා සමානයි. රක්ෂිත බන්ධනාගාරගත වෙන්නේ වැරැදිකරුවන් නොවෙයි සැකකරුවන්. නමුත් අපේ රටේ රක්ෂිත බන්ධනාගාරගත වීම ද දඬුවමක්. ඒ නිසා මම දින 13 ක් දඬුවම් වින්දා කියලා කිව්වොත් නිවැරැදියි. ඒ නිසාම මට මේ අගතිය කරන්න බොරු නඩු හදපු සියලු දෙනාගෙන්ම වන්දි ගන්න නඩු ද‌ාන්න මම බලාපොරොත්තු වෙනවා.
ප්‍ර නඩු කියන්න සල්ලි තියෙනව ද?
මගේ මේ නඩුවට වගේම වන්දි නඩුවටත් මේ රටේ කීර්තිමත් නීතිඥයෝ නොමිලේ පෙනී සිටින්න සූදානම්.
ප්‍ර ඔබ කියනවා ඔබට දැම්මේ බොරු නඩුවක් කියලා. ඒ අවශ්‍යතාවය තිබ්බේ කාටද?
ඇත්තෙන්ම මම මෙතැන දී පුද්ගලයන් නම් කළාම මම සාක්ෂි ඉදිරිපත් කළ යුතුයි. මේ බොරු නඩුව පිටිපස්සේ ඉන්නේ 2015 පැවැති යහපාලන ආණ්ඩුවේ ප්‍රබලයෙක්.
ප්‍ර නඩුවෙන් දිනලා සිටිද්දිත් නම කියන්න භය ඇයි?
ඒ නම මම මීට කලින් පවසලා තියෙනවා. මම ‘මගේ අවනඩුව’ නමින් පොතක් අප්‍රේල් මාසේ නිකුත් කරනවා. ඒ පොතේ මම සාක්ෂි සහිතව පොලිසිය, නීතිපති දෙපාර්තමේන්තුව අධිකරණය තමන්ගේ දේශපාලන සතුරන් නිහඬ කරන්න භාවිත කරන ආකාරය සාක්ෂි සහිතව හෙළිකරන්න බලාපොරොත්තු වෙනවා.
ප්‍ර මේ ප්‍රශ්නය නිසා ඔබට ඔබේ බිරිඳ සහ දරුවන් රටෙන් පිටමං කරන්න වුණා?
ඇත්තෙන්ම මාව අත්අඩංගුවට ගැනීම අමතරව මගේ බිරිඳවත් අත්අඩංගුවට ගැනීමේ තර්ජනයක් එල්ල කළා. ඒ පුද්ගලයාට අවශ්‍ය වුණේ මාව රටෙන් පිටමන් කරලා පිවිතුරු හෙළ උරුමය මහ පොළොවේ පැළවෙන එක නතර කරන්න. මම ඕස්ට්‍රේලියාවේ අධ්‍යාපනය ලබපු ඕස්ට්‍රේලියාවේ මොනෑෂ් විශ්වවිද්‍යාලයේ ඉගැන්වීම් කටයුතු කළ පුද්ගලයෙක් හැටියට නැවත මට ඕස්ට්‍රේලියාවට ගොස් විශ්වවිද්‍යාලයක කථිකාචාර්යවරයකු වීමේ හැකියාව තිබෙන බව මේ ඇමැතිවරයා හොඳින්ම දන්නවා. ඒ නිසා ඔහු මට මේ සියලු තර්ජන එල්ල කළේ ඒ අරමුණෙන්. මගේ බිරිඳටත්, මගේ දරුවන්ටත් හරියට හිරිහැර කළා. දරුවන් පමණක් ගෙදර ඉන්න වෙලාවල්වල ගේ වටකරලා උද්ඝෝෂණ කළා. ඒ වගේම දරුවෝ පාසල් යද්දී වාහන වලින් පස්සෙන් එළෙව්වා. මගේ බිරිඳට මරණ තර්ජනය කරමින් දුරකථන ඇමතුම් ආවා. මගේ දරුවන් මරා දමන බවට තර්ජනය කළා. ඒ පසුබිම තුළ ඔවුන්ට ඕනෑ වුණේ දරු පවුලක් අරන් මම ඕස්ට්‍රේලියාවට යනවා දකින්නයි. ඒ නිසා මගේ බිරිඳට එහේ රැකියාවක් සූදානම් කරලා දරුවන් දෙන්නටත් ඕස්ට්‍රේලියාවට යවන්න සූදානම් කරලා මම සටන දිගටම ගෙන ගියා. ඒ නිසා නඩු දැමීමේ බලාපොරොත්තු වුණ අරමුණ නම් ඉටු වුණේ නෑ.
ප්‍ර නඩුව අවුරුදු 10 ක් පුරා විභාග වුණා. මේ දුෂ්කර කාලයේ දී ඔබට ජීවිතය ගැන සමාජය ගැන මොනව ද හිතුණේ.
ඇත්තෙන්ම වසර 25 ක මගේ දේශපාලන ජීවිතය තුළ හොරකමක්, මැරකමක්, සල්ලාලකමක් ගැන පරම හතුරෙක්වත් මට චෝදනා කරලා නෑ. ඉතින් මේ චෝදනාව එක්තරා ආකාරයකින් මට ලැබුණු සහතිකයක්. මා පාලනය කළ රාජ්‍ය ආයතන දිගින් දිගටම විගණනයට ලක් කරලා මම අඩුම තරමේ බෝල්ට් පොයින්ට් පෑනක් ගෙදර අරන් ගියා කියලා සොයා ගන්න බැරි වුණාම තමයි ඕස්ට්‍රේලියාවේ බංකොළොත් වුණ සුද්දෙක් ගෙනැවිත් මට එරෙහිව පාවිච්චි කරන්න මේ ඇමැතිවරයා තීරණය කළේ. ඒ නිසා මේ බොරු නඩුව මට ලැබුණු චරිත සහතිකයක් හැටියට මම සලකනවා. සොරකම් කළ කෙනෙකුට චෝදනා එල්ල වුණාම, නඩු වැටුණාම හිත හදාගන්න පුළුවන්. මොකද තමන් කරපු දෙයකටනේ විඳවන්නේ.නමුත් නොකළ වරදක් ගැන මට චෝදනා නැගුවාම මට මීට කලින් චෝදනා එල්ල වෙලා පුරුදුත් නැති නිසා මට ඒක මානසිකව දරාගන්න අමාරු වුණා. නින්ද යන්නේ නැති තත්ත්වයක් ඇතිවුණා. මම දිගින් දිගටම භාවනා කරලා ඉතා කෙටි කාලයක් තුළ මට ආත්ම ශක්තිය හදාගන්න පුළුවන් වුණා.
ප්‍ර මිතුරන්ගෙන් ලැබුණු සහයෝගය කොහොමද?
මුලින්ම කියන්න ඕනෑ ලංකාවේ ඉන්න කීර්තිමත්ම නීතිඥයන් තමයි මං වෙනුවෙන් පෙනී සිටියේ. මාව අත්අඩංගුවට ගැනීමට එරෙහිව මූලික මානව හිමිකම් නඩුව ගොනු කළේ ජනාධිපති නීතිඥයන් වන රොමේෂ් සිල්වා, මනෝහර සිල්වා මැතිතුමන්ලයි. මට මුලින්ම ඇප ගන්න ඉදිරිපත් වුණේ ජනාධිපති නීතිඥයන් වන කාලිංග ඉන්ද්‍රතිස්ස මැතිතුමාත් අලි සබ්‍රි මැතිතුමාත්. ඒ වගේම නඩුව කරගෙන යද්දී මට සහාය දැක්වූවේ ජනාධිපති නීතිඥ ශවේන්ද්‍ර ප්‍රනාන්දු. ඒ වගේම ජනාධිපති නීතිඥ ජයන්ත වීරසිංහ සහ ජනාධිපති නීතිඥ නලින්ද ඉන්ද්‍රතිස්ස මැතිතුමන්ලා මාව අසීරුතාවට පත් කරන්න එකම නඩුව දෙකට කඩලා තිබුණේ. වසර 10 ක් නඩු දෙකක්. මේ වගේ ජනාධිපති නීතිඥයන් සමග නඩු කියන්න සාමාන්‍ය මනුෂ්‍යයකුට මිලියන 20 ක් 30 ක්වත් වැයවන වැඩක්. නමුත් මගේ වාසනාවට මේ නඩුවේ අසාධාරණය දැකලම මේ නීතිඥවරුන් නොමිලේ පෙනී සිටින්න ඉදිරිපත් වුණා.
ඒ වගේම හිටපු අගවිනිසුරු සරත් එන් ද සිල්වා මැතිතුමා, මහාචාර්ය ජී. එල්. පීරිස් මැතිතුමා මට අවශ්‍ය උපදෙස් දිගටම ලබා දුන්නා. ඒ සියලු දෙනාම මම සිහිපත් කරන්න ඕනෑ. මොකද මෙවැනි මිතුරන් මට නොසිටියා නම් මේ බොරුව හෙළිකර ගන්න බැරිවෙලා මම වැරැදිකරු වෙන්නත් ඉඩ තිබුණා.
ප්‍ර තීන්දුවෙන් පස්සේ කවුද ඔබට කතා කළේ?
මට කතා නොකරපු කෙනෙක් නෑ. හිටපු ජනාධිපතිවරුන්, අගමැතිවරුන් ඇතුළු සියලු දෙනා කතා කරලා සුබ පැතුවා. මාලිමාවේ මිත්‍රයන් හැරුණු විට අන් සෑම පක්ෂයකම මිතුරන් කතා කරලා සුබ පැතුවා. මාත් එක්ක වැඩකරන කොට මං ගැන හැඟීමක් තියෙනවා සහෝදර දේශපාලන පක්ෂවල නායකයන්ට. ඔබට මේ තීන්දුව ලැබෙන බව දැනගෙන හිටියා කියලා ඒ හැමෝම කිව්වා. මම එදා ජාතික හෙල උරුමයෙන් එළියට ඇවිත් පිවිතුරු හෙළ උරුමය හැදුවේ නැත්නම් මට මෙහෙම නඩුවක් පැටවෙන්නේ නෑ.
ප්‍රසන්න සංජීව තෙන්නකෝන්
