(අංජුල මහික වීරරත්න)
"චාන්ස් එකක්' දෙන්නැයි ඉල්ලන මාලිමාවට අවස්ථාවක් දුන්නොත් සිදුවන්නේ ජනතාවගේ "චාන්ස් එක" ගිලිහී යාම බව ජනාධිපති රනිල් වික්‍රමසිංහ මහතා කෑගල්ලේදී පැවසීය.
මාලිමාවේ ප්‍රතිපත්ති ප්‍රකාශය අනුව ඔවුන් ඉදිරිපත් කරන අයවැය මගින් අයි.එම්.එෆ් කොන්දේසි සියල්ල කැඩී ගොස් ජනතාවගේ ස්ථිර අනාගතය විනාශ වී යන බවද ජනාධිපතිවරයා කීය.
මාලිමාවට චාන්ස් එකක් දී අනාගතය නැති කරගන්නවාද? නැතිනම් රට ශක්තිමත් ස්ථිර අනාගතයකට ගෙන යනවාද? යන කාරණය ජනතාව විසින් තීරණය කළ යුතුව ඇතැයි ජනාධිපතිවරයා පැවසීය.
"ජනාධිපතිවරණයේ අන්තිම සතියට ඇතුළු වී තිබෙනවා.මං රට බාර ගනිද්දි කවුරුවත් හිටියේ නැති වුනත් අද තිස් අට දෙනෙක් ජනාධිපති ධුරය ගන්න ඉදිරිපත් වී සිටිනවා.
එදා එක්කෙනෙකුට වත් ඔබ විඳින දුක තේරුනේ නෑ.ගෑස් නැති දුක, ආහාර නැති දුක, ඩීසල් නැති දුක, බෙහෙත් නැති දුක, දරුවන්ගේ දුක ,පාසල් යන්න බැරි දුක,ඒ එක්කෙනෙකුටවත් තේරුනේ නෑ. අද ඇවිල්ලා ජනතාව ඇන්දුවාට ඔවුන් එදා හැංගිලා හිටියේ කෙහෙද?ඇඳ යටද? පැනලා ගියාද?
හරි නම් ජනතාව දුකේ සිටියදී අතහැර දමා පලා ගිය සියලු ජනාධිපති අපේක්ෂකයන් පැමිණ පලායන්නට හේතු කියා ජනතාවගෙන් සමාව ගත යුතුයි" යනුවෙන්ද ජනාධිපතිවරයා පැවසීය.
