මෙවර මහ මැතිවරණයට සර්ව ජන බලය පක්ෂයේ කොළඹ දිස්ත්‍රික් අපේක්ෂක කණ්ඩායමේ නායක උපාලි ජයසේකර මහතා සමග කළ සාකච්ඡාවකි.
සර්ව ජන බලය පක්ෂයේ කොළඹ දිස්ත්‍රික් නායකයා ඔබයි. මොනවද තබා තිබෙන බලාපොරොත්තු?
මේ මැතිවරණයට අපි ඉතාම හොඳ කණ්ඩායමක් ඉදිරිපත් කර තියෙනවා. ජනාධිපතිවරණයේ දී අද අපේ පක්ෂයේ නායක දිලිත් ජයවීර මැතිතුමා සමග එකතුවෙලා රට දිනවීමට සමත් වැඩපිළිවෙලක් ඉදිරිපත් කළා. වෙන අය ප්‍රතිපත්ති ප්‍රකාශන ඉදිරිපත් කරනකොට අපි ඉදිරිපත් කළේ වැඩපිළිවෙළක්. රටට කෙරෙන්න ඕනෑ දේ මොකක්ද කියලා කරන්න පුළුවන් ප්‍රායෝගික වැඩපිළිවෙළක් අපි ඉදිරිපත් කළා.
මොකක්ද ඒ වැඩපිළිවෙළේ විශේෂත්වය?
රටේ ආර්ථිකය ගත්තොත් මාසික පඩියක් ලබන ගෙදරක තියෙන ආර්ථිකේනෙ තියෙන්නේ. අපි එතැනින් එළියට එන්නනම් විශාල පිම්මක් පනින්න ඕනෑ. ගෙදර මාසික ආදායම වැඩි කරගන්න මොනවා හරි කරනවා වගේ රටේ ආදායම වැඩි කරගන්න යමක් කළ යුතුයි. රටේ දල දේශීය නිෂ්පාදනය දෙගුණයක් තුන් ගුණයක් බවට ඉතාම කෙටි කාලයකින් ගේන්න ඕනෑ. ඒකට අවශ්‍ය උපාය මාර්ගික සැලැස්මක් තමයි අපි ඉදිරිපත් කර තියෙන්නේ. අපේ රටේ තියෙන සම්පත් ප්‍රයෝජනයට අරගෙන ආර්ථීකය නංවන වැඩපිළිවෙළක් තමයි අපි ඉදිරිපත් කර තියෙන්නේ.
මොනවද ඔය ඔබ කියන සම්පත්?
අපේ රටට අයිති සම්පත් වර්ග 5ක් තියෙනවා. පළමුවැනි දේ තමයි මහ මුහුද හා ඒ ආශ්‍රිත සම්පත්. ඒ වගේම අපේ අහස සහ අහස ආශ්‍රිත සම්පත් ටික. අපට අයිති මහ පොළොව සහ එයට අයිති සම්පත් ටික. අපේ රටේ වැදගත්ම සම්පත තමයි මානව සම්පත. ඒ වගේම අපට තව සම්පතක් තියෙනවා පිටරට තියෙන සම්පත් ටික. මේ සම්පත් පහ හරියට අපි කළමනාකරණය කරලා රටේ ආර්ථිකය පොහොසත් කරලා ලෝකයේ ඉතාම දියුණු ජාතියක් හැටියට නැගී සිටින්නේ කොහොමද කියලා තමයි අපි අපේ උපායමාර්ගික සැලැස්මෙන් ඉදිරිපත් කර තියෙන්නේ. ඒ වැඩපිළිවෙළ ජනතාවට අපි ඉදිරිපත් කළා. දිලිත් ජයවීර මැතිතුමාට විශාල ජනතා ආකර්ෂණයක් වගේම මනාප විශාල ප්‍රමාණයක් ලැබුණා. මනාප ගණන් කළානම් දෙවැනි තැනට දිලිත් ජයවීර පත්වෙන්න තිබුණා.
ඔහොම වැඩපිළිවෙළක් ක්‍රියාත්මක කරන්න රාජ්‍ය බලය අවශ්‍යයි. එහෙත් ඔබලා ඉල්ලන්නේ විපක්ෂයේ බලය?
අපි මේ පාර විපක්ෂයේ බලය ඉල්ලන්නේ විපක්ෂයේ මෙච්චර කාලයක් හිටියේ නෑ දැක්මක් තියෙන පිරිසක්. 1977 න් පස්සේ මේ රටේ හිටපු කිසිම විපක්ෂ නායක කෙනකු මේ රටේ ජනාධිපති වුණේ නෑ. එක අවස්ථාවක් තියෙනවා මහින්ද රාජපක්ෂ මැතිතුමා 2002 – 2004 ඉතාම කෙටි කාලයක් විපක්ෂ නායක වෙලා හිටියා. එතුමා හැර 77 න් පස්සේ වෙන කිසිම කෙනෙක් විපක්ෂනායක වෙලා ඉඳලා ජනාධිපති වෙලා නෑ. ඒකට හේතුව තමයි ඒ කිසිම විපක්ෂනායකයකුට දැක්මක් තිබුණේ නෑ. වෙනත් රටවල පවතින රජය පෙරළුණාම බලයට එන්නේ විපක්ෂයනේ. හැබැයි ලංකාවේ එහෙම නෑ. හැමදාම වුණේ ඉන්න විපක්ෂනායක මොකක් හරි දෙයක් කරලා කාව හරි ඉදිරිපත් කරනවා. මේක වෙනස් කරන්න ඕනැ නිසා තමයි අපි විපක්ෂයට එන්න හදන්නේ. මාලිමාවේ ජනාධිපති විශාල පොරොන්දු තොගයක් ජනතාවට දීලා තියෙනවා. මේ පොරොන්දු ඉටු කරගන්න ඒගොල්ලන්ට සහාය දෙන්න පුළුවන් පිරිසක් විපක්ෂයේ ඉන්න ඕනෑ. ජනතාවට දීලා පොරොන්දු ඉටු කළොත්නේ ජනතාවට සතුටෙන් ඉන්න පුළුවන් වෙන්නේ. ඒ නිසයි දැක්මක් තියෙන විපක්ෂයක් ඉන්න ඕනෑ. ආණ්ඩුව කරන හොඳ වැඩවලට සහාය දෙන රටට අහිතකර දේ වළක්වන්න පුළුවන් හොඳ විපක්ෂයක් වගේම හොඳ විපක්ෂ නායකයකු ඉන්න ඕනෑ. ඉතින් අපේ නායකතුමාම හොඳ දැක්මක් තියෙන දුරදක්නා නුවණින් කටයුතු කරන හොඳ නායකයෙක්. එවැනි පුද්ගලයකු මේ රටේ ඊළඟ නායකයා හැටියට අපි යෝජනා කරනවා. ඒ වෙනුවෙන් තමයි අපි විපක්ෂයේ බලය ඉල්ලන්නේත්. එතුමා විපක්ෂනායක කරන්න ඉල්ලන්නේත්.
මේ මැතිවරණය අභියෝගාත්මක නැද්ද?
මේ අවස්ථාව අභියෝගාත්මක තමයි. මේ අභියෝගය අපට විශාල අවස්ථාවක් ලැබිලා තියෙනවා. වෙන කිසිම පක්ෂයකට නායකයෙක් නෑ. නායකයකු කියලා ඉන්න අය ජනතාව ප්‍රතික්ෂේප කරපු අය. විපක්ෂ කණ්ඩායම්වල ඡන්ද ඉල්ලන පක්ෂවල කිසිම නායකයකු නෑ ජනතාව පිළිගත්ත. විපක්ෂයෙන් ඡන්දෙ ඉල්ලන අපේක්ෂකයන් විශාල වශයෙන් ප්‍රතික්ෂේප වෙච්ච අය 225 ම එපා කියලනේ කිව්වේ. එයින් හැටක් විතර තමයි ඡන්දෙ ඉල්ලන්නේ නැත්තේ. තව 165 ක් ඉන්නවා. ඒ අය අතුරෙන් සියයට 95 ක් ඉන්නේ ජනතාව ප්‍රතික්ෂේප කරපු අය. ඔවුන් ගෙදර තියන්න හොඳ අවස්ථාවක් මේ මහ මැතිවරණය. සර්ව ජන බලය අපි ඉදිරිපත් කරලා තියෙන කණ්ඩායම් පෙනේරයකින් පෙරළා ගන්නවා වගේ පෙරළා ගත්ත හොඳම පිරිසක්. මම ව්‍යවසායකයෙක් වගේම වරලත් ගණකාධිකාරිවරයෙක්. මම ඡන්දෙකට එන පළමු අවස්ථාව. ව්‍යාපාර ක්ෂේත්‍රයෙන් මම දියුණු වෙච්ච කෙනෙක්. මම මේ රටේ කර්මාන්තකරුවන්ට සෘජුවම සම්බන්ධ කෙනෙක්. මට අවශ්‍ය වුණා ව්‍යවසායකත්වය රට පුරාම ප්‍රචලිත කරන්න. ඒ වෙනුවෙන් තමයි මම ඡන්දයට එන්නේ.
- ප්‍රසන්න සංජීව තෙන්නකෝන්
