(නිමල කොඩිතුවක්කු)
කාබනික පොහොර නිෂ්පාදනය කළ නොහැකි ගොවීන්ට තම ගොවිපළ තුළ එකතු වන සත්ත්ව පොහොර තම කොට්ඨාසයේ ගොවිජන සේවා මධ්‍යස්ථාන වෙත ලබා දී එමඟින් අමතර ආදායමක් උපයා ගත හැකි ක්‍රම වේදයක් සකස් කර ඇතැයි පශු සම්පත් ගොවිපළ ප්‍රවර්ධන සහ කිරි හා බිත්තර ආශ්‍රිත කර්මාන්ත රාජ්‍ය අමාත්‍ය ඩී. බී. හේරත් මහතා පවසයි.
ඒ අනුව තම ගොවිපලේ එක් වන ගොම පොහොර , එලු පොහොර , කුකුල් පොහොර ළඟම කොට්ඨාස පශු වෛද්‍ය කාර්යාලය හරහා පශු වෛද්‍ය නිලධාරීන් ගේ හා ගොවිජන සංවර්ධන නිලධාරීන්ගේ මැදිහත් වීමෙන් අදාල නිෂ්පාදකයන් වෙත අලෙවි කිරීමේ යාන්ත්‍රණයක් ක්‍රියාත්මක බවත් රාජ්‍ය අමාත්‍යවරයා සඳහන් කරයි.
ඒ සදහා ගොවිපොළ හිමියන්ට දෛනිකව හෝ මාසිකව ලබා දිය හැකි සත්ත්ව පොහොර ප්‍රමාණයන් පිලිබදව අදාල කොට්ටාස පශු වෛද්‍ය නිලධාරීන්ව කඩිනමින් දැනුවත් කරන ලෙසත් ඔහු දැනුම් දෙනු ලැබීය.
එමඟින් කොම්පෝස්ට් පොහොර නිපදවීම සඳහා උනන්දුවක් දක්වන තරුණ ප්‍රජාවට මෙම අපද්‍රව්‍ය ලබා ගෙන රටේ කාබනික පොහොර අවශ්‍යතාවයෙන් සැලකිය යුතු ප්‍රමාණයක් සපුරා ගත හැකි බවත් ඔහු පැවසීය.
ගව, කුකුල්, සූකර, එළු සහ බැටළු පාලනයේ නිරත සුළු, මධ්‍යම හා මහා පරිමාණ ව්‍යවසායකයින්ට ඔවුන්ගේ ගොවිපළ තුලින් ලැබෙන සත්ත්ව අතුරු ඵල මඟින් කාබනික පොහොර නිෂ්පාදනය කර අමතර ආදායමක්ද ලබා ගත හැකි බවත් ඔහු කියයි.
