(සිරංගිකා ලොකුකරවිට)
"කැච් එක අල්ලගත්තොත් මැච් එක දිනුම්. කැච් එක අතඇරියොත් මැච් එක පරාදයි. මේ අපට ලැබෙන අවසන් අවස්ථාව. මේ වෙලාවේ කැච් එක අතඅරින්න එපා." යැයි අග්‍රාමාත්‍ය රනිල් වික්‍රමසිංහ මහතා අද (22) ගාල්ලේ වැකුණුගොඩ 'නිල සෙවණ' පොලිස් නිල නිවාස 100ක් භාරදීමේ උත්සවයේ දී කීවේය.
අග්‍රාමාත්‍යවරයා මෙහි දී වැඩිදුරටත් මෙසේ ද කීවේය.
දේශපාලන යන්ත්‍රණයේ සමහර ප්‍රශ්නවලට පිළියම් නැති වුණාම ත්‍රස්තවාදයෙන් භීෂණයේන ප්‍රශ්න විසඳන්න හිතනවා. ඒ නිසා ඕනම රටක් තමන්ට ඇති දේශපාලන ප්‍රශ්න හැකි සෑම විටම විසඳන්න පියවර ගතයුතුයි. උතුරේ යුද්ධය ඇතිවුණේ දේශපාලන ප්‍රශ්නයක් නිසා යුද්ධයෙන් පස්සේ විසඳන්නත් බැරි වුණා. දකුණේ ප්‍රධාන දේශපාලන පක්ෂත් සිංහල මුස්ලිම් දේශපාලන පක්ෂත් ඒකීය රාජ්‍යයක් අවශ්‍යයි කියන මතයේ නිතරම හිටියා.
නමුත් පෙඩරල් ක්‍රමයක් ඕන කියලා ද්‍රවිඩ ප්‍රශ්න වලින් කිව්වා. යුද්ධයේ දීත් වෙනම රාජ්‍යයක් ඉල්ලුවා. ඒක විසඳන්න අපි ක්‍රියාකලා. අපේ ව්‍යවස්ථාදායක සභාවේ මෙහෙයුම් කමිටුවේ අන්තර් වාර්තාවේ එකට විසඳුම් හොයාගන්න පුළුවන් වෙලා තියෙනවා. මේ වාර්තාවේ පළමු ඡේදයේ තිබෙන යෝජනා ගැන ප්‍රධාන පක්ෂ දෙක අවධානය යොමු කරලා තියෙනවා.
උපරිම බලය බෙදා හැරීම පාර්ලිමේන්තුවට අමතරව සෙනට් සභාවක් ඇතිකිරීම. මදිපුංචිකම් වලට ඉඩ නොදෙන මානව හිමිකම් ක්‍රමයක් ඇතිකිරීම, ස්වාධීන අධිකරණ ක්‍රමයක් ඇතිකිරීම, යුද්ධයෙන් අවතැන් වූවන් වහාම පදිංචි කිරීම කියන කාරණාවලට ප්‍රධාන පක්ෂ දෙක එකඟවෙනවානම් විසඳුමක් ලෙස ඒකීය රාජ්‍යයට හා බුද්ධ ශාසනයට ප්‍රමුඛත්වය ලබා දීමටත් තමන් එකඟ වෙනවා කියා සුළු ජාතීන් නියෝජනය කරන පක්ෂ එකඟ වෙලා තියෙනවා. මම මේ ගැන එයාලා සමග සාකච්ඡා කරා.
මේ ප්‍රශ්න ගැන එක්සත් ජාතික පක්ෂයත් ශ්‍රී ලංකා නිදහස් පක්ෂයත් හැමදාම කඹ ඇද්දා. නමුත් එදා ජනාධිපති මෛත්‍රීපාල සිරිසේන ජනාධිපති කරන්න පොදු අපේක්ෂකයා වටා එකතුවුණේ මේ සියල්ලට විසඳුම් හොයන්න. එදා සිවිල් සමාජය හා සුළු ජාතික පක්ෂත් එකතු වුණා.
අද අපිට එකම මතයකට එන්න පුළුවන් වෙලා තියෙනවා. ශ්‍රී ලංකා නිදහස් පක්ෂය සමඟ අපි ජාතික ආණ්ඩුවක් හැදුවේ මේ ප්‍රධාන පක්ෂය විසඳන්න. ඇතැම් අය අපෙන් ඇහුවා ඇයි මේ ජාතික ආණ්ඩුවක් හදන්නේ කියලා. අපිට තනි පක්ෂයක් හැටියට ලැබෙන වාසිය ටිකක් අඩු කරගත්තත් කමක් නැහැ. රටේ තියෙන ප්‍රධාන ප්‍රශ්න විසඳාගන්න ප්‍රධාන පක්ෂ දෙක එකතු වෙලා ජාතික ආණ්ඩුවක් හැදුවා.
2016 ජනවාරි මාසයේ දී පාර්ලිමේන්තුව ව්‍යවස්ථාදායක සභාවක් බවට පත් කළේ. ඒ කෙටුම්පත අපි පාර්ලමේන්තුවෙන් සම්මත කරා. දෙවැනි පියවර හැටියට මෙහෙයුම් කොමිටියක් පත් කළා. අවුරුද්දකට වඩා ඒ කමිටුවේන සාකච්ඡා කළා. තමන්ගේ ස්ථාවරය. තමන් අතර තිබෙන වෙනස ප්‍රශ්නය විසඳන්න පුළුවන් ද බැරිද කියා කත කළා. වාද කළා. විවාද කළා. මගෙන් සමහරු ඇහුවා සභාපති වෙලා කල්ගත කරනවා ද කියා.
මම මේ කාර්යයට කල් ගත්තේ හැමෝටම අදහස් දක්වන්න. විසඳුම් යෝජනා කරන්න. දෙවැනි ඡේදයේ තියෙනවා තමන්ට අවශ්‍යනම් තමන්ගේ පක්ෂයේ ස්ථාවරය ප්‍රකාශ කරලා ඒ කාරණාවලට එකඟ වෙන්නේ කොහොමද කියලා. දැන් අපි සම්පූර්ණ වාර්තාව දීලා තියෙනවා. එතැන බහුතරයක් නෑ. සුළුතරයක් නෑ. පක්ෂ විපක්ෂ ඒකාබද්ධ විපක්ෂ අදහස් ඔක්කොම තියෙනවා. එක එක පක්ෂවල මූලධර්ම සියල්ල තියෙනවා.
අපි මේ ගමන ඉදිරියට ගෙනයන්න ඕන. මෙහෙයුම් කමිටුවෙන් අපි කරන්න ඕන දේ කරා. දැන් රටට ජනතාවට භාර දෙනවා ඉතිරි වැඩ ටික කරන්න. මේක අපිට ලැබෙන අවසන් අවස්ථාව. සමහරු කෑ ගහනවා පොලිසිය උතුරට දීලා කියලා දෙමළ අය කියනවා තමන්ගේ අය බඳවාගෙන නැහැ කියලා. සම්පූර්ණ ඇබෑර්තු 7000යි පළමු වටයේ ද්‍රවිඪ නිලධාරීන් 700ක් බඳවා ගන්නම් කිව්වා.
නමුත් ඇවිත් තියෙන්නේ 180ක් පමණයි. 700ක් මදි ඒත් එන්නේ ඉතා අඩු ගණනක්. අපි යාපනේ ගිහිල්ලත් මේ ප්‍රශ්න කතා කළා. මේක රට පාවලා දෙන එකක් නෙවෙයි. මෙතැනින් අපි ඉදිරයට ගිහින් මේ ප්‍රශ්න විසඳාගන්න ඕන. මේ අවස්ථාව අරගෙන අපි ඉදිරියට යන්න ඕන.මේ කැච් එක අල්ලාගත්තොත් මැච් එක දිනනවා. කැච් එක ඩ්‍රොප් කළොත් මැච් එක පරදිනවා. ඒ නිසා අපි කැච් එක අල්ලාගන්න ම ඕනෑ.
මෙම අවස්ථාව සඳහා ස්වදේශ කටයුතු අමාත්‍ය වජිර අබේවර්ධන, නීතිය හා සාමය සහ දක්ෂිණ සංවර්ධන අමාත්‍ය සාගල රත්නායක, ඉඩම් හා පාර්ලිමේන්තු ප්‍රතිසංස්කරණ අමාත්‍ය ගයන්ත කරුණාතිලක, විදේශ රැකියා නියෝජ්‍ය අමාත්‍ය මනූෂ නානායක්කාර, ගාල්ල දිස්ත්‍රික් සම්බන්ධීකරණ කමිටු සම සභාපති පාර්ලිමේන්තු මන්ත්‍රී විජේපාල හෙට්ටිආරච්චි, පාර්ලිමේන්තු මන්ත්‍රී බන්දුලලාල් බණ්ඩාරිගොඩ ඇතුළු මැති ඇමතිවරු පිරිසක් ද සහභාගී වී සිටියහ.
