(විනීතා එම්. ගමගේ)
කටුනායක, දක්ෂිණ සහ කොළඹ පිටත වටරවුම් පාර යන අධිවේගී මාර්ග තුනම අධිකාරියකට පවරා ඒ හරහා ඩොලර් මිලියන 600 කට චීනයේ ෂැංඩොංග් කියන සමාගමට විකිණීමට රජය සියල්ල සූදානම් කර ඇතැයි පිවිතුරු හෙළ උරුමය නායක, පාර්ලිමේන්තු මන්ත‍්‍රී උදය ගම්මන්පිල මහතා ප‍්‍රකාශ කළේය.
විකුණාගෙන කෑම සිය ජීවිතය කරගත් වත්මන් ආණ්ඩුවේ අලූත්ම ගොදුරවී ඇත්තේ අධිවේගී මාර්ග තුන යැයි කී ගම්මන්පිල මහතා මේ සතියේ ඇමැති මණ්ඩල රැස්වීමට මේ පිළිබඳ ඇමැති මණ්ඩල පති‍්‍රකාව ඉදිරිපත් කිරීමට නියමිතව ඇති බව ද සඳහන් කළේය.
සියල්ල විකුණා අවසානයේ අප‍්‍රිකානුවන් වහල්කමට ඇමෙරිකාවට විකුණූ අන්දමින් ජනතාවත් විකුණන්නට ආණ්ඩුව පියවර ගනු ඇතැයි කී ගම්මන්පිල මහතා ඒ දිනය උදා වෙනතුරු බලා නොසිට මේ විකිණීමට එරෙහිව පාරට බහින්නැයි ජනතාවගෙන් ඉල්ලා සිටින බව ද ප‍්‍රකාශ කළේය.
පිවිතුරු හෙළ උරුමය නායකයා මේ අදහස් පළ කළේ පිටකෝට්ටේ පිහිටි එම පක්ෂයේ මූලස්ථානයේ ඊයේ (21) පැවැති මාධ්‍යහමුවක් අමතමිනි. එහිදී තවදුරටත් අදහස් දැක්වූ ගම්මන්පිල මහතා මෙසේ ද කීය.
‘‘ නෑ නෑ අපි විකුණන්නේ නෑ වසර 35කට බදු දෙනවා කියලා කියාවි. වසර දහයකට වඩා බදු දෙනවා නම් එය විකුණුමකට සමාන බවටයි තක්සේරු කිරීමේ දී සලකන්නේ.
මේ පිළිබඳ පසුගිය ඇමැති මණ්ඩල සාකච්ඡාවේදීත් අවධානය යොමු වුණා. එතැනදී විශ‍්‍රාමික දේශපේ‍්‍රමී ඇමැතිවරයකු හොඳ යෝජනාවක් කරලා. අධිවේගී මාර්ග තුන විකුණනවා කීවාම ලොකු විරෝධයක් සමාජයේ නැගෙනවා. ඒ නිසා අපි අලූතෙන් අධිකාරියක් හදලා ඒකට අධිවේගි මාර්ග පවරලා ඒකෙන් කොටස් ප‍්‍රතිශතයක් විතරක් චීනෙට විකුණමු කියලා. මොන වෙස් මුහුණු බැන්දත් අපි මේ විකිණීමට විරුද්ධයි.
මෙහෙම විකුණාගෙන ගිහින් අන්තිමට මේ රටේ මොනවාද ඉතිරි වෙන්නේ? අන්තිමට ණයට හිලව් වෙන්න විකුණන්න ඉතිරි වෙන්නේ මේ රටේ අහිංසක ජනතාව විතරයි.
අධිකරණයට මේ තරම් ඇඟිලි ගැසූ යුගයක් ලංකා ඉතිහාසයේ මීටපෙර තිබුණේ නැහැ. රජ තුන් කට්ටුවක් ඉදිරියේ රාජපක්ෂවරුන්ගේ නඩු අහන්නට කැබිනට් මණ්ඩලය තීරණය කළ බවට රාජිත සේනාරත්න අමාත්‍යවරයා කරන ප‍්‍රකාශයෙන්ම ආණ්ඩුව අධිකරණයට කරන බලපෑම පෙනෙනවා.
අගවිනිසුරුවරයා විසින් නීතිපතිගේ ඉල්ලීම මත ගතයුතු තීරණයක් වන ත‍්‍රීපුද්ගල විනිසුරු මඩුල්ලක් පත් කිරීම අමාත්‍ය මණ්ඩලය විසින් තීරණය කරනු ලබන්නේ නම් එය සෘජුව අධිකරණයට අතපෙවීමක් නේ ද?
යම් පුද්ගලයකුට හෝ පවුලකට දඩුවම් කිරීම සඳහා වෙනමම අධිකරණයක් පිහිටුවන්නට ව්‍යවස්ථාවෙන් ඉඩක් නොමැති බව වත්මන් ආණ්ඩුවේ නායකයන් නොදන්නා බව ඔවුන්ගේ ප‍්‍රකාශවලින් පෙනී යනවා.
එජාපයේ ඉන්නා මන්ත‍්‍රීවරුන් සියලූදෙනා එක හඬින් කිව්වේ රාජපක්ෂවරුන්ට දඬුවම් කරන්න විශේෂ අධිකරණ පිහිටුවන්න කියා. ඒක කළේ නැති වුණාම රාජපක්ෂවරු රකිනවා කියලා විජයදාස ඇමැතිතුමාට දොස් කියනවා. ඒකාබද්ධ විපක්ෂයත් එක්ක ඞීල් දාල කියල චෝදනා කරනවා. නමුත් විශේෂ අධිකරණ පිහිටුවීමට ව්‍යවස්ථාවේ ඉඩක් නැහැ. එසේ ඉඩක් නැති නම් විජයදාස ඇමැතිතුමා මොනවා කරන්න ද?
දැන් විශේෂ අධිකරණ පිහිටුවන්න බෑ කියන්නේ කවුද? හිටපු නීතිපති තිලක් මාරපන සහ ජනාධිපති නීතිඥ විජයදාස රාජපක්ෂවගේ නීතිය මෙලෝ හසරක් නොදන්න අය. විශේෂ උසාවි පිහිටුවිය යුතුයි කියන්නේ කවුද? හිටපු අගවිනිසුරු රාජිත සේනාරත්න. ජනාධිපති නීතිඥ රන්ජන් රාමනායක. නීතිය පිළිබඳ මහාචාර්ය පා. ච. රණවක. දැන් ඉතින් කාරණය පැහැදිලියිනෙ.
අවසානයේ දී රාජිත ඇමැතිතුමා තමන්ගේ ගැලවුණු රෙද්ද යළි ඇඳ ගැනීමේ අරමුණින් කියනවා විශේෂ අධිකරණයක් වෙනුවට ත‍්‍රිපුද්ගල විනිසුරු මඩුල්ලක් ඉදිරියේ රාජපක්ෂවරුන්ගේ නඩු ඇසීමට ඇමැති මඩුල්ල තීරණය කළාලූ. මුළු ඇමැති මණ්ඩලයටම නීතිය දන්න එක් කෙනෙකුවත් හිටියේ නැද්ද? අපේ රටේ නීතියේ හැටියට නම් ත‍්‍රීපුද්ගල විනිසුරු මඩුල්ලක් නැතිනම් රජතුන්කට්ටුවක් නඩුවක් ඇසීමට පත් කරන්නේ නීතිපතිගේ ඉල්ලීම මත අගවිනිසුරුයි. ඒ මිස ඇමැති මණ්ඩලයට නඩු ඇසීම් පිළිබඳ තීන්දු ගන්න බෑ.
නාට්‍යයක් ගැන පාර පුරා පෝස්ටර් අලවලා තිබෙනවා මම පසුගිය දවසක දැක්කා. ඒකේ නම -කන්නයි ආවේ, කාලා තමයි යන්නේ’’ ඇත්තටම බැලූවහම මේක වේදීකාවේ රඟ දක්වන නාට්‍යයකට වඩා ආණ්ඩුව විසින් මාධ්‍ය හරහා රඟ දක්වන්නේ මේ නාට්‍යය තමයි. මට පේන්නේ අපි හැමෝම මාධ්‍ය හරහා දකින්නේ ඒ නාට්‍යය තමයි.
ඇමැති මණ්ඩලය තමයි මේ නාට්‍යයේ රඟ පාන්නේ. අපි කට ඇරගෙන නාට්‍යය දිහා බලගෙන ඉන්නා අතරේ අපිවත් හොඳ ගණනකට විකුණලා දාන තුරු අපිම දන්නේ නෑ.
පළාත් පාලන මැතිවරණ සංශෝධන පනත් කෙටුම්පත 24 දා විවාදයට ගැනීමට නියමිතයි. විවාදය තුළ දී ආණ්ඩුව සංශෝධන ඉදිරිපත් කරනවාලූ. ඒක සාමාන්‍ය තත්වයක්. ආණ්ඩුව ඉදිරිපත් කරන සංශෝධන අපේ අතට පත්වී තිබෙනවා. පක්ෂ නියෝජිතයන්ගේ රැුස්වීමේදී ගනු ලැබු තීරණ කියල ආණ්ඩුවේ රාජ්‍ය භාෂාවෙන් තමයි මේ වාර්තාව හදල තියෙන්නේ. ඒ අතරේ අලූත් කරුණුත් ඉදිරිපත්කර තිබෙනවා.
සමානුපාතික ක‍්‍රමයට පත්වන ප‍්‍රතිශතය සියයට 30 සිට 40 දක්වා ඉහළ නැංවීම වගේම ජර්මානු මැතිවරණ ක‍්‍රමය හඳුන්වා දීමත් අලූත් කරුණු අතරේ තිබෙනවා. කෙටුම්පත් සංශෝධනයක දී අලූත් කරුණු හඳුන්වාදීම ව්‍යවස්ථාවට විරුද්ධයි. ව්‍යවස්ථාවේ 78 වගන්තිය අනුව යම් පනත් කෙටුම්පතක් පාර්ලිමේන්තුවට ඉදිරිපත් කරන්න අවම වශයෙන් සති දෙකකට කලින් ගැසට් මගින් ප‍්‍රසිද්ධ කළ යුතුයි. මොකට ද? මේ රටේ පරමාධිපත්‍යය තිබෙන ජනතාවට ඒවා අධ්‍යයනය කර අදහස් ප‍්‍රකාශ කරන්න. ඒ වගේම ව්‍යවස්ථාවට පටහැනිව තිබුණොත් උසාවිය ඉදිරියේ අභියෝගයට ලක් කරන්න.
නමුත් පාර්ලිමේන්තුවේ දී අලූත් කරුණු ඉදිරිපත් කරන සංශෝධන ආවොත් ජනතාවට ඒවා සම්බන්ධයෙන් අධ්‍යයනය කරන්න තම මතය පළ කරන්න කාලයක් නෑ. ඒ වගේම ඒවා ව්‍යවස්ථාවට පටහැනි වුණත් ජනතාවට උසාවි යන්න විධියක් නෑ. මේක අමු අමුවේ ව්‍යවස්ථාව උල්ලංඝනය කිරීමක්. ඒ විතරක් නොවේ නරක පූර්වාදර්ශයක්.
අලූත් ව්‍යවස්ථාවත් මේ විධියටම ගේන්න පුළුවන්. ගැසට් මගින් ප‍්‍රසිද්ධ කරන කෙටුම්පතේ තිබෙන්නේ ඒකීය රාජ්‍යයකට ගැළපෙන කරුණු විතරයි. පටහැනි කරුණු කිසිවක් නෑ. කවුරුත් හරිම ෂෝක් කියනවා. ආණ්ඩුව ඇතුළේ ඉන්න විශ‍්‍රාමික දේශපේ‍්‍රමියෝත් ඕක තමයි අපි කිව්වේ කියලා අපට ඔච්චම් කරනවා.
නමුත් පාර්ලිමේන්තු විවාදය අතරේ මහ ? පෙඩරල් වගන්ති ටික හඳුන්වා දෙනවා. අධිකරණය ඉදිරියේ අභියෝගයට ලක්නොවී ජනමත විමසුමකට යන්නේ නැතිවම පෙඩරල් වගන්ති සම්මත වෙනවා. ඒකීය රාජ්‍යයේ නිදා ගන්නා අපි පසුවදා පෙඩරල් රාජ්‍යයේ අවදි වෙනවා. කොහොම ද අගමැතිගේ ටිකිරි මොළේ?
දහතුන්වැනි ව්‍යවස්ථා සංශෝධනයට විරුද්ධව මුළු රටම ගිනිගනිද්දී ජේ. ආර්. ජයවර්ධන ජනපතිතුමන්වත් මෙලෙස හොර පාරෙන් ව්‍යවස්ථා විරෝධී දේවල් පනත් කෙටුම්පතකට ඇතුළු කරන්න උත්සාහ කළේ නෑ. මාමා කළදේ බෑනා නොකොළොත් ඌ නොට්ටිගෙ බෑනා වෙනව කියලයි ඒ කාලෙ කිව්වේ. මේ බෑනා නම් මාම කලදේත් කරල ඊට එහා ගිහිල්ලත් කරනව කියල තමයි අපිට නම් පේන්නේ. මෙම මාධ්‍ය හමුවට පක්ෂයේ නියෝජ්‍ය නායක මධු මාධව අරවින්ද සහ අවිස්සාවේල්ල ආසන සංවිධායක අරුණ දිවිගල්ල යන මහත්වරුද සහභාගි වූහ.
