විවිධ ගුප්ත ශාස්ත්‍රයන් මගින් මිනිස් ජීවිතවල අතීත - වර්තමාන - අනාගත කාල පිළිබඳ තොරතුරු ඉදිරිපත් කරන අයුරු හා අනාවැකි පළකරනු දැකගත හැකියි. ඒ අනුව අංක විද්‍යාව නම් වූ ගුප්ත ශාස්ත්‍රය ඇසුරෙන් කෙනෙකුගේ උපන් දිනය අනුව එම පුද්ගලයාගේ ස්වභාවය හා ඔවුන්ගේ 2025 වසර ගතවන්නේ කෙසේද? යන්න අද කතා කරන්න සිතුවා.
අපේ ජීවිතවලට වැදගත් වන විශේෂ අංක කිහිපයක් ම අංක ශාස්ත්‍රඥයෙක් විසින් ලෝකයට අනාවරණය කර තිබේ. ඒවා
දෛව අංකය
මාස්ඵල අංකය
පාලන අංකය
අධිකත්ව අංක
ණය ගනුදෙනු අංකය
ලෙස දක්වන්න පුළුවන්.
ජීවිතවලට වැදගත් වන තොරතුරු අනාවරණය කරන මේ අංක අතුරින් මෙහිදී කතා කරන්න බලාපොරොත්තු වෙන්නෙ පාලන අංකය පිළිබඳවයි.
සරලව ගතහොත් පාලන අංකය ලෙස දක්වන්නේ ඔබ මෙලොව උපත ලබන දිනය තනි අගයක් ලෙස ගණනය කරගත් පසු හිමිවන 1ත් 9ත් අතර සංඛ්‍යාවයි. එනම් මෙලොව සියලුම ජීවීන් කිසියම් අවුරුද්දක, කිසියම් මාසයක, කිසියම් දවසක උත්පත්තිය ලබා තිබෙයි. එලෙස උත්පත්තිය ලබන දවස ඕනෑම මාසයක පළමුවෙනිදා සිට 31 වෙනිදා දක්වා විය හැකියි. එම දිනය තනි අංකයක් බවට පත්කිරීමෙන් පසු ඔබගේ පාලන අංකය හඳුනාගත හැකියි. උදාහරණයක් ඇසුරෙන් මෙය පැහැදිලි කළහොත් - ඔබ ඉපදෙන්නෙ ඕනෑම මාසයක පළමුවැනිදා සිට නව වැනිදා දක්වා දිනයක නම්, ඔබේ පාලන අංකය වන්නේ උපන් දින අංකයමයි. එනම් උපන්දින අංකය 8 නම් පාලන අංකයත් අංක 8 ම වේ. නමුත් ඔබ 10 වැනිදා සිට 31 වැනිදා අතර යම් දවසක ඉපදුණහොත්, එහිදී ඔබේ උපන්දින අංකය තනි අගයක් බවට සුළු කිරීමෙන් පසු - ඔබගේ පාලන අංකය නිර්මාණය වේ. උදාහරණයක් ලෙස ඔබ උපන්නේ 10 වැනිදා නම් 1+0=1 ලෙස සුළු කිරීමෙන් 1 යන පාලන අංකය සකස් කරගත හැකියි. ඔබ උපන්නේ 15 වැනිදා නම් 1+5=6 ලෙස පාලන අංකය හඳුනාගත හැකියි. ඒ අනුව පළවෙනිදා සිට තිස්එක් වැනිදා දක්වා තම උපන්දින අංකය හිමි ඕනෑම අයෙකුට තම පාලන අංකය 1ත් 9යත් අතර ඉලක්කමක් ලෙසින් සුළු කරගත හැකියි.
පාලන අංකයට අනුව 2025 ගතවන්නේ කෙසේද?
එහිදී මූලිකවම 2025 වසර අංක විද්‍යාවට අනුව පැහැදිලි කරගත යුතුයි.
2025 - අංක විද්‍යාත්මකව අංක 9 ට අයත් අංකයකි.
2+0+2+5=9
9 යනු කුජට අයත් අංකයකි.
කුජ යනු අග්නිකාරක, ගිනිකාරක, යුධකාරක, භූමි පුත්‍ර, පොෙළවට අධිපති ග්‍රහයෙක්. ඒ අනුව 2025 වර්ෂය කුජ ග්‍රහයාගේ බලය වැඩි වර්ෂයක් ලෙසින් දක්වන්න පුළුවන්.
පාලන අංකය අංක 1
අංක 01 යන පාලන අංකය හිමිවන්නේ උපන් දිනය 1/10/19/28 යන දිනවල යෙදී තිබෙන අයටයි. අංක 01 රවිට අයත් අංකයකි. සාමාන්‍යයෙන් පාලන අංකය අංක 1 හිමි ඔබ කිසිම කෙනෙකුට හිස නමන්නේ නැති බොහොම ඍජු ප්‍රතිපත්තීන් සහිත අවංක පුද්ගලයන්. ඒවගේම ප්‍රතිපත්තියකට අනුව වැඩ කරන, තව කෙනෙකුට අණ දෙන්න/ නායකත්වය දෙන්න සුදුසු අයෙක්. පාලන අංකය අංක 1 හිමි ඔබගේ ජන්ම පත්‍රයේ රවි බලවත් වුණොත් - ඔබ ඕනෑම තැනක නායකත්වයට, මූලිකත්වයට ඉතාම සුදුස්සෙක් බවට පත්වෙනවා.
මේ දින හතරෙන් එකක උපන් ඔබගේ පාලන අංකයට අනුව 2025 වර්ෂයේ ඔබේ පලාඵල ගැන මීළගට අවධානය යොමු කරමු. මුලින් සඳහන් කළ පරිදි 2025 වර්ෂයේ සමස්ත බලය රඳා පවතින්නේ අංක නවයට අදාළවයි. එනම් කුජට අදාළව යි. එවිට කුජ, අංක 01 හිමි රවිත් සමග නෛසර්ගික මිත්‍රභාවයක් තියෙනවා. මේ රවි - කුජ යෝගය නිසාවෙන් වර්ධනය කරන සටන්කාරක - යුදකාරක නිසා ඔබට 2025 වර්ෂය ජව සම්පන්න බවින් වැඩි වසරක් වෙනවා. එමෙන්ම ශරීර ශක්තිය වර්ධනය වෙමින් නායකත්වයේ ලක්‍ෂණ නිරායාසයෙන්ම මතු වෙනවා. රවි කුජ සමග දක්වන මිත්‍රතාව නිසාත්, දෙදෙනාම අග්නිකාරක / ගිනිකාරක ග්‍රහයන්වීම නිසාත්, මෙම වසර ඇතුළත ඔවුන් තමන්ගේ යුතුකම් සහ අයිතිවාසිකම් වෙනුවෙන් සටන් වදින්න උත්සාහ කරයි. එය තම වෘත්තිය තුළ, අධ්‍යාපන කටයුතු තුළ, නැතිනම් තමන්ගේ ව්‍යාපාරය තුළ ආදී ඕනෑම අවස්ථාවක විය හැකියි. නමුත් මේ තත්ත්වය නිසාම තරමක් දුරට කලබලකාරී අවස්ථා ඇතිකරන්න මෙන්ම හදිසි තීරණවලට එළඹෙන්නත් පුළුවන්. ඒ නිසාම විවිධ ගැටලු ඇතිවිය හැකි නිසාවෙන් මේ හදිසිය, කලබලය, විශේෂයෙන්ම ආවේගශීලීභාවය පාලනය කරගත යුතුයි.
පාලන අංකය අංක 02
ඕනෑම මාසයක ඔබ 02/11/20/29 යන දිනවල උපත ලබා ඇත්නම් ඔබට හිමිවන පාලන අංකය අංක 02 යි. පාලන අංකය අංක දෙකෙන් උපන් ඔබගේ ජන්ම පත්‍රයේ චන්ද්‍රයාගේ බලය ඉතාම ඉහළින් විද්‍යමාන වෙයි. ඔබ නායකත්වයට වඩා අනුගාමිකත්වයට සුදුසු අයෙක් බවට පත්වෙයි. ඔබ ආකර්ෂණීය, ප්‍රියමනාප අයෙක් වේවි. ඔබ ඔබේ යටත් පිරිස තලා පෙලා කටයුතු කරන්නට උත්සාහ නොකරන, ඉතා මානුෂීය ගති ඇති පුද්ගලයෙක්. ඔබේ සෞම්‍ය ගති පැවතුම් නිසාම ඔබ අනිත් අයට උදව් කරන්න වගේම, අනිත් අයගේ උදව් නිරායාසයෙන් ලැබෙන අයෙක් වේවි. 2025 වර්ෂයේ බලය කුජ සතුවීම නිසාත්, අංක දෙක තුළ චන්ද්‍රයා බලවත් වීම නිසාත්, මේ එකතුවෙන් චන්ද්‍ර-මංගල යෝගය නිර්මාණය වේවි. එවිට ඔබ ජලය සම්බන්ධ, දියර වර්ග, තෙල් වර්ග හෝ ගලා හැලෙන දෙයක් සම්බන්ධ ව්‍යාපාරයක් කරන කෙනෙක් නම් - ඔබට එම ව්‍යාපාරවලින් තව තවත් ඉහළටම දියුණු වීමේ හැකියාව ලැබෙයි. නමුත් සමහර අවස්ථාවල මේ එකතුවෙන් විවාහ දෝෂයක් වන චන්ද්‍ර-මංගල දෝෂය ඇති වුවහොත්, ඔබ ඔබගේ මව සහ මව් පාර්ශ්වයේ අයත් සමග වැඩකටයුතු කිරීමේ දී සහ ගනුදෙනු කිරීමේ දී ඉතාමත් ප්‍රවේශම් සහගත විය යුතුයි.
එමෙන්ම ඔබගේ විවාහයට සහකරුවෙක් හෝ සහකාරියක් තෝරා ගැනීමේදී ත් 2025 වර්ෂයේ කලබල නොවී, හදිසි නොවී, හොඳින් ඇසුරු කර බලා සුදුසුයි යැයි හැඟේනම් පමණක් විවාහ ගැළපීමකි. පසු විවාහය පිළිබඳ තීන්දු තීරණ ගත යුතුයි.
පාලන අංකය අංක 03
පාලන අංකය අංක තුන හිමි වන්නේ ඕනෑම මාසයක 3/12 /21/30 යන දිනවල උපන් අයටයි. අංක තුන ගුරුට අයත් අංකයකි. මේ පාලන අංකය හිමි ඔබ මූල්‍ය ක්ෂේත්‍රයට හොඳින්ම ගැළපෙන අයෙක්. ප්‍රශ්න විසඳීමේ දී සාධාරණ සහ මධ්‍යස්ථ මතයක් දරයි. ජීවිතය සම්බන්ධව පරිණතව සිතයි. මේ දිනයන් එකක උප්පත්තිය ලබන ඔබගේ ජන්ම පත්‍රයේ ගුරු බලවත්ව සිටියහොත්, බොහෝ ලැබීම් ලැබෙයි.
එමෙන්ම ඔබ මුදලට එහා ගොස්, අසාධාරණයට විරුද්ධව පෙනී සිටින, සාධාරණ ප්‍රතිපත්තියේ සිට කටයුතු කරන අයෙකි. ඒ නිසාම ඔබ වටා ඔබට ප්‍රියකරන සමාජ කණ්ඩායමක් නිර්මාණය වේවි. ඔබ ඇත්තෙන්ම හොඳ පරාර්ථකාමියෙක්. එමෙන්ම විපතක දී තව කෙනෙක්ට පිහිටවීමේ ගුණය ඉතා ඉහළින් ඔබ සතුව පවතියි. 2025 වර්ෂයේ දී කුජ මූලිකවීමත්, තුනට මූලික ග්‍රහයා ගුරුවීමත් නිසා ඔබට මෙම වසර සුභ වේවි.
එයට ප්‍රධාන හේතුව මෙම ග්‍රහයන් දෙදෙනා අතිශය මිත්‍ර ග්‍රහයන් දෙදෙනෙක් වීමයි. එනිසා කුජ ග්‍රහයා 2025 වර්ෂය ජයග්‍රහණය කිරීම සඳහා උපකාර කරයි. ඔබ ගුරු වෘත්තිය සම්බන්ධ ව්‍යාපාරයක්, කවුන්සලින් සම්බන්ධ ව්‍යාපාරයක් හෝ අලෙවිකරණය සම්බන්ධයෙන් අලුත් දෙයක් ආරම්භ කිරීමේ බලාපොරොත්තුවෙන් පසු වන්නේ නම් - එයට මෙම වර්ෂය ඉතා යහපත්. කුජගේ බලය ඔබට ඉතාම ඉහළින් හිමිවන නිසාවෙන් පහළ මට්ටමකින් හෝ ව්‍යාපාරය ආරම්භ කළහොත් ඔබට ව්‍යාපාරික වශයෙන් ඉතා ඉහළ තැනකට ගමන් කිරීමේ හැකියාව ලැබේවි.
පාලන අංකය අංක 04
මෙම පාලන අංකය හිමි වන්නේ 04/13/22/31 යන උපන්දින අංක හිමි අයටයි. මෙම පාලන අංකය හිමි බොහෝ දෙනෙක් Travel Service වල හිමිකාරයෝයි. බස් හිමියෝයි. නිතරම ගමන්බිමන් කරන, ඇවිද යමින් ව්‍යාපාර කරන පුද්ගලයෝයි. එමෙන්ම සංචාරක ක්ෂේත්‍රය, ආනයනය- අපනයනය සම්බන්ධ ව්‍යාපාරවල නියුතු තැනැත්තන්. අංක 4 හිමි ඔබ සතු ප්‍රබලතම දුර්වලතාව කලබලකාරී බවයි. ඔබගේ ජන්ම පත්‍රයේ මේ වනවිට රාහු බලවත්ව පැවතුණහොත් කලබලකාරී සහ හදිසි තීන්දු තීරණවලට එළඹීමේ ප්‍රවණතාව ඉහළයි.
විශේෂයෙන්ම 2025 වර්ෂය කුජට අයිතිවීමත්, පාලන අංකය රාහුට අයත්වීමත් නිසා මේ තුළ නෛසර්ගික වශයෙන් හතුරුභාවයක්, විප්ලවකාරී ස්වභාවයක් පැවතිය හැකියි. එහිදී පාලන අංකය හතර හිමි ඔබට ඒ බලය නිසා ජීවිතේ කරගන්න බැරිවූ බොහෝ දේවල් ඉටුකර ගැනීමට මේ බලය යොදාගන්න පුළුවන්. කුජගේ බලයත්, රාහුගේ බලයත් නිසා තවත් විටෙක 2025 තුළ අනිසි කලබලතාවක් ඇතිවෙන්න පුළුවන්. ඒක ඔබ පාලනය කරගත යුතුයි.
ඒවගේම මේ තත්ත්වය නිසා ඔබ කරන කියන දේ ප්‍රසිද්ධවීමට සහ පැතිර යාමට ඉඩකඩ නිර්මාණය වෙයි. ඔබ කරන කියන දේවල් හොඳින් හෝ නරකින් ප්‍රසිද්ධියට පත්වේවි. එනිසා ඔබ කරන කියන දේවල් ඉතා කල්පනාකාරීව කරන්න වග බලාගත යුතුයි. නමුත් මේ තත්ත්වය මනා සිහියෙන් යුතුව යොදවන්න උත්සහ කළහොත් මේ වසර තුළ ඔබේ ජීවිතය උඩුයටිකුරු කරගන්නත් පුළුවන්.
පාලන අංකය අංක 05
ඔබ උපන් දිනය 5/14/23 යන දින නම් ඔබට හිමි පාලන අංකය අංක 05යි. ඔබ හරිම උපක්‍රමශීලියි. පහ බුදට අයිති අංකයකි. එනිසා ඔබට නිවී සැනසිල්ලේ සිට වැඩකටයුතු කිරීමේ හැකියාවක් තියෙනවා. ඔබේ කේන්දරයේත් මේ වසර තුළ බුද බලවත් වූවොත්, අධ්‍යාපන ක්ෂේත්‍රයේ ලොකු ගමනක් යන්න හැකියාව ලැබේවි. එමෙන්ම ඔබට ඕනෑම ක්ෂේත්‍රයක ඉහළටම යෑමේ හැකියාව හිමියි.
අංක 05 හිමි අය නිවැරදිව මිනිස්සු තේරුම් ගනිමින් වැඩ කිරීමේ හැකියාවක් තිබෙන අයයි. එමෙන්ම හාස්‍ය උත්පාදන නිර්මාණාත්මක කටයුතුවල යෙදෙන බොහෝ දෙනෙක් මෙම අංකය හිමි අයයි. 2025 වර්ෂය අංක විද්‍යාත්මකව ඔබට බලපාන ආකාරය ගැන බැලුවහොත් 2025 කුජට අයත් අංකයක්වීමත්, ඔබේ පාලන අංකය බුදට අයත් වීමත් නිසා බුදට කුජගේ බලය ඉතාම හොඳින් පැමිණේ.
කේන්දරයේ බුධ - කුජ යෝග වෙලා බලවත් වෙලා සිටියහොත් විශිෂ්ට අධ්‍යාපනික යෝගයක් හිමිවේවි. මේ නිසා අධ්‍යාපනය ලබන දරුවන්ට විභාගවලින් ඉහළ සාමාර්ථ ලබාගැනීමේ හැකියාව ලැබේවි. එනිසා තරග විභාගවලට බිය නොවී මුහුණ දෙන්න. රැකියාවක් අරමුණු කරගෙන අධ්‍යාපනය ලබනවා නම්, ඔබට ඒ කටයුතු ඉතාම ඉහළින් සාර්ථක කර ගත හැකිවේවි. බුධගේ තිබෙන සූක්‍ෂමභාවයත් කුජගේ තියෙන එඩිතරභාවයත් එකතුවීමත් ඔබට ඕනෑම තැනකට නොබියව, අභීතව ඉදිරිපත් වීමේ හැකියාව ලැබේවි.
පාලන අංකය අංක 06
මෙම අංකය හිමි වන්නේ ඕනෑම මාසයක 6/15/24 යන දිනවල උපන් ඔබටයි. ඔබ නිර්මාණාත්මක, කලාත්මක, සෞන්දර්යාත්මක, වින්දනීය පුද්ගලයෙක්. ඔබ කුමන ව්‍යාපාරයක, කුමන සමාජ තත්ත්වයක සිටියත් ඔබට හරිම කලාත්මක, නිර්මාණාත්මක ඇහැක් තියෙනවා. එනිසා අංක හය හිමි අයෙකුට ලැබෙන ආකර්ෂණය බොහෝ වැඩියි.
ඒ වගේම හොඳ ජනප්‍රියතාවයක් ලැබෙයි. මේ දිනවල උපත ලබා සිකුරුත් කේන්දරේයේ බලවත් වුණොත්, ඔවුන් තරමක් මනමාලයි. ශෘගාරයට, ලිංගිකත්වයට සහ කාමයට දක්වන කැමැත්ත බොහෝම ඉහළයි. 2025 වර්ෂය ඔබට බොහොම සුබයි. 2025ට අදාළ කුජ බලයත්, අංක හයට අදාළ සිකුරුගේ බලයත් එකතුවීම නිසා කාම යෝගයක් නිර්මාණය වේ. කාමයෝගයේ ප්‍රතිඵලයක් හැටියට ඔබේ ආදරණීය සිතුවිලි වර්ධනය වේවි.
විරුද්ධ ලිංගිකයන් දෙසට ඇදී යන ස්වභාවය වැඩියි. ඇස, කන, නාසය, දිව, සම කියන පංචේන්ද්‍රියයන් පිනවන්න පුළුවන්. රසවත් කෑම ලබන්න පුළුවන්. ඒ වගේම ඔබ කරන කියන දේ ජනප්‍රිය වේවි. ප්‍රසිද්ධ වේ. ඒ හරහා ඔබට ලොකු ආකර්ෂණයක් ලැබේවි. එමෙන්ම ඔබට මේ වර්ෂය තුළ ධන ලාභ ලැබීමේ වරමක් ද හිමියි. මෙම බලයන් නිසා අනිත් අයගේ සිත් දිනා ගනිමින් ඔබේ කටයුතු ආකර්ෂණීයව කරගන්න පුළුවන් හැකියාව හිමිවේවි.
පාලන අංකය අංක 07
අංක හත පාලන අංකය ලෙස හිමි වන්නේ ඕනෑම මාසයක 07/16 /25 වැනි දිනවල උපන් ඔබටයි. දෙවියන්ගේ ආශිර්වාදය, ආකර්ෂණය වැඩි වශයෙන් හිමි අංකයක් ලෙසින් පාලන අංක හත පෙන්වාදිය හැකියි. මේ අයට අනිත් අයව කියවීමේ හැකියාව තිබෙනවා. අනිත් අයව තේරුම් ගත හැකිවේ. ඔබට මිනිසෙකුගේ අභ්‍යන්තරයටම කිඳා බැස එම පුද්ගලයා දැකීමේ හැකියාව පවතීවි.
මේ දිනයන්හි උප්පත්තිය ලබා කේතු ද බලවත් වුණු අය ලෝකයේ රහස් ඔත්තු සේවාවලට, බුද්ධි අංශවලට ඉතාම හොඳින් ගැළපෙන අයවලුන් වේ. ඔබට අධ්‍යාපනික වශයෙන් ඉතාම ඉහළ දැනුමක් හිමියි. ජ්‍යෝතිෂය ඇතුළු විශ්ව ශක්තීන් සම්බන්ධ කටයුතු, අංගම් පොර ආදී සටන් කලාවන් පිළිබඳ සැඟ වී තියෙන ශාස්ත්‍රීය දැනුමක් ඔබ සතුයි. ඔබට ඔබේ මනස ඉතාම ඉහළට දියුණු කර ගැනීමේ හැකියාවක් තිබේ. සමහර විටෙක කේතු දුර්වල වෙමින් කේන්දරයේ විවාහ දෝෂ තිබුණහොත්, විවාහයන් ආශ්‍රිතව යම් යම් අසාර්ථකවීම් ඇතිවිය හැකියි.
ඔබට 2025 වසර කෙසේ බලපාන්නේ කියන දේ ගැන අවධානය යොමු කළහොත් 2025 කුජට අයත් නිසාවෙන් එය අග්නිකාරකයි. හතට තියෙන්නේ කේතුගේ බලයයි. මේ නිසා කේතුගේ පවතින සූක්ෂමභාවයට කුජගේ පවතින නෛසාර්ගික බලය එකතුවීමන් තවත් බලය වැඩෙනවා. ඔබටත් මේ වසර අධ්‍යාපනික දැනුම හොඳින් ඥානනය වෙන අවුරුද්දකි. ඔබ ව්‍යාපාරයක් ආරම්භ කළහොත්, ඔබේ උපක්‍රමශීලීභාවය වැඩි වෙනවා.
පාලන අංකය අංක 08
ඕනෑම මාසයක 8/17/26 යන දිනවල උපත ලැබූ අයවලුන්ගේ පාලන අංකය වන්නේ අංක 08යි. ඔබ ජීවිතේ එක කාලයක බොහෝ දුක් කම්කටොලු විඳි කෙනෙක්. ඒ වගේම අඳුරෙන් ආලෝකය කරා යන අයෙකි. මෙලොව පරලොව දෙලොවම ගැන සිතා වැඩකටයුතු කරන අයෙකි.
මේනිසා ඕනෑම තැනක වැඩ කිරීමේ හැකියාව ඔබ සතුයි. පීඩිත පංතියේ මිනිසාගේ දුක හඳුනගනියි. කාලයකදී බොහෝ දුක් කරදර වින්දත්, නැවත ජීවිතයේ ඉහළටම ගමන් කිරීමට හොඳ හැකියාවක් තියෙනවා. තමන්ගේ ජීවිතයේ සීමාවක් නැතුව ඉහළට යන්න පුළුවන්. 2025 ඔබට කෙසේ බලපායිද යන්න අවධානය යොමු කළහොත්, 2025 හි 9 යට හිමි කුජගේ බලයත් පාලන අංක 08ට හිමි සෙනසුරුත් නිසා ශනි කුජත් සමග යෝග වීමෙන් ශනි මංගල දෝෂය ඇතිවේවි.
එය විවාහයන්ට නුසුදුසුයි. පාලන අංක අට හිමි අය ආදරය, ප්‍රේමය, විවාහය මෙන්ම හවුල් ව්‍යාපාර ආදියේ දීත් තමාට සුදුසු අය ළං කරගන්න උත්සාහ කළ යුතුයි. ඔබ පතල් කැනීම් කරන කෙනෙක් අයෙක් නම් ඔබට මෙම වර්ෂය සුභයි. එමෙන්ම කෘෂිකර්මාන්තය, ඉංජිනේරු සේවා, පොළව භූමිය සම්බන්ධ, රාජ්‍ය ආරක්ෂක අංශයට සම්බන්ධ දේවල් කරන්නේ නම් ඔබේ උත්පත්ති කේන්ද්‍රයේ සෙනසුරු බලවත් වෙලා සිටීනම් 2025 ඔබේ හොඳම වසරයි.
පාලන අංකය අංක 09
ඔබේ උපන් දිනය 9/18/27 යන දිනවලට අයත් නම් ඔබේ පාලන අංකය වන්නේ අංක 09 යි. ඔබ ඉතාම සටන්කාමී, යුධකාමී, යුක්ති සහගත, අයුක්තිය අසාධාරණය වෙනුවෙන් පෙනී සිටින අයෙකි. ඔබ මේ දිනවල උපන් අයෙක් නම් ඒත් සමග කුජත් බලවත්ව සිටියොත් හොඳට හොඳයි. නරකට නරකයි. ඔබ කැත්තට පොල්ල වගේ වැඩකරන කෙනෙක් කිව්වොත් නිවැරදි. කීවොත් කරනවා, කරොත් කියනවා එහෙම චරිතයක්. පාලන අංකය අංක නවය හිමි කෙනෙක් නම් ඔබ භූමිය, ඉඩකඩම්, දේපළ සම්බන්ධ ලාභ ප්‍රයෝජන ලැබෙනවා.
2025 යෙහි අංක විද්‍යාත්මක බලය පාලන අංක නමය හිමි ඔබට නිරන්තරයෙන් ලැබෙන නිසා ඔබේ සැර වැඩිවෙන්න පුළුවන්. ඒ නිසා සැර බාල කරගන්න උත්සහ කරන්න. වෙනදට වඩා උද්වේගකාරී, සටන්කාමී, ජවසම්පන්න ස්වභාවයන් ඇතිවෙන්න පුළුවන්. ඔබ ක්‍රීඩකයෙක් නම්, ඔබ සටන්කරුවෙක් නම් මෙම වර්ෂය ඔබට සුභයි. නමුත් ඔබ සරල සාමාන්‍ය රස්සාවක් කරන කෙනෙක් නම් පමණට වඩා ජවසම්පන්න ස්වභාවය වැඩිවීම දුර්වලතාවයක් වෙන්නත් පුළුවන්. පාලන අංකයේ තිබෙන බලවත්කම 2025 වර්ෂයේ ඔබට භුක්ති විඳීමේ හැකියාව ලැබේවි.
දුලක්ෂි ලියනගේ
