උපුල් වික්‍රමසිංහ
සංචාරක, ඉඩම්, ක්‍රීඩා සහ යෞවන කටයුතු අමාත්‍ය හරීන් ප්‍රනාන්දු සහ කම්කරු හා විදේශ රැකියා අමාත්‍ය මනූෂ නානායක්කාර යන අයගේ පක්ෂ සාමාජිකත්වය අහෝසි කිරීමට සමගි ජන බලවේගය ගත් තීරණය නීත්‍යනුකූල බවට ඉකුත් සිකුරාදා (09දා) ශ්‍රේෂ්ඨාධිකරණය තීන්දු කිරීමත් සමග ඔවුන්ට තමන් දැරූ අමාත්‍ය ධුරවලින් හා මන්ත්‍රී ධුරවලින් ද ඉවත් වීමට සිදු විය.
ඒ අනුව මනූෂ නානායක්කාර වෙනුවට ඔහුට පසුව එම දිස්ත්‍රික්කයෙන් වැඩිම මනාප ලබා ගත් බන්දුල ලාල් බණ්ඩාරිගොඩ පාර්ලිමේන්තුවට පත් වීමට නියමිත අතර හරීන් ප්‍රනාන්දු වෙනුවට පත් කරන්නේ කවුද යන්න ඉකුත් සිකුරාදා සවස වන විටත් සමගි ජන බලවේගය තීරණය කර නොතිබිණි. එම මන්ත්‍රී ධුරයට හිරුණිකා ප්‍රේමචන්ද්‍රගේ නම යෝජනා වී ඇති බව පක්ෂයේ අභ්‍යන්තර ආරංචි මාර්ග ඔස්සේ දැනගන්නට ලැබේ.
2020 පාර්ලිමේන්තු මැතිවරණයෙන් සමගි ජන බලවේගය යටතේ පාර්ලිමේන්තුවට තේරී පත් වී රනිල් වික්‍රමසිංහට සහය පළ කිරීම නිසා ඔවුන් දෙදෙනා පක්ෂයෙන් නෙරපා හැරීමට සමගි ජන බලවේගය තීරණය කළ අතර පක්ෂයේ එම තීරණය අභියෝගයට ලක්කරමින් හිටපු මන්ත්‍රීවරුන් දෙදෙනා ගොනු කළ පෙත්සමට අදාළ තීරණය ලබා දෙමින් ත්‍රිපුද්ගල විනිසුරු මඩුල්ල පක්ෂයේ තීරණය නීත්‍යනුකූල බව දැනුම් දුන්නේය.
